Biełaruskaja IT-kampanija adpraviła litoŭski ekipaž na rali «Dakar-2025»
Viadomaja biełaruskaja IT-kampanija Gurtam, jakaja paśla padziej 2020 hoda rełakavałasia ŭ Vilniu, stała tytulnym partnioram litoŭskaha ekipažu na znakamitym rali-rejdzie «Dakar-2025», jaki prachodzić u Saudaŭskaj Aravii. Kamanda vystupaje pad nazvaj Gurtam Toyota Gazoo Racing Baltics.
Za styrnom spartyŭnaha balida Toyota Hilux pad numaram 216 znachodzicca lehienda litoŭskaha aŭtasportu Bieniadziktas Vanahas, dla jakoha heta ŭžo 14‑y «Dakar». Jaho šturmanam staŭ daśviedčany Ajvidas Palukienas.
«Hłytali pył, kab nie zabić mašynu»
Honka ŭ Saudaŭskaj Aravii ŭžo ŭ samym razhary. Druhi etap rali pieratvaryŭsia dla ekipaža ŭ sapraŭdnaje vyprabavańnie na tryvałaść. Vanahas i Palukienas vybrali taktyku «vyžyvańnia»: jany prajechali 400 kiłamietraŭ pa kamianiach i vysachłych rečyščach rek, imknučysia źbierahčy techniku.
«Heta byli 400 kiłamietraŭ vyžyvańnia. My nie pamylilisia, kali dumali, što buduć daminavać kamiani, ale atrymali ŭsio adrazu. Kali ja kažu, što my nie jedziem na samaźniščeńnie, ja maju na ŭvazie, što my nie chočam vylecieć z «Dakara» raniej času», — prakamientavaŭ etap Bieniadziktas Vanahas.
Nie abyšłosia biez pryhod: ekipažu pryjšłosia mianiać prabitaje koła, a finišavali jany ź jašče adnoj paškodžanaj šynaj. Akramia taho, litoŭcy prapuścili napierad bolš chutkija ekipažy hrandaŭ — Karłasa Sajnsa i Macijasa Ekstroma. Heta džentlmienski ŭčynak kaštavaŭ im bačnaści: bolšuju častku šlachu pryjšłosia jechać u hustym pyle ad čužych aŭto.
Pa vynikach etapu kamanda Gurtam zaniała 24‑ie miesca, adstajučy ad lidara prykładna na 16 chvilin.
Što źviazvaje biełarusaŭ i litoŭskaha honščyka?
Heta nie pieršy dośvied supracoŭnictva: Gurtam staŭ partnioram Vanahasa jašče na «Dakary-2024».
Kampanija Gurtam była zasnavana ŭ Minsku ŭ 2002 hodzie Alaksiejem Ščurko i jahonym baćkam. Jany stvaryli suśvietna viadomuju sistemu manitorynhu transpartu Wialon, da jakoj padklučana bolš za 4 miljony aŭtamabilaŭ va ŭsim śviecie.
U 2020 hodzie Ščurko ŭvachodziŭ u pieršy skład Kaardynacyjnaj rady. Paśla pačatku represij kampanija evakujavała supracoŭnikaŭ u Litvu. Z pačatkam vajny va Ukrainie kampanija syšła z rasijskaha rynku, dzie była lidaram, i likvidavała tam jurydyčnuju asobu, a ŭkrainskim klijentam dała biaspłatny dostup da servisaŭ. Siońnia Gurtam uvachodzić u topy najbujniejšych padatkapłatnikaŭ Litvy ŭ IT-siektary.
Zasnavalnika Gurtam Alaksieja Ščurko i Bieniadziktasa Vanahasa abjadnoŭvaje nie tolki biznes, ale i luboŭ da techniki i chutkaści — abodva zachaplajucca piłatavańniem samalotaŭ. Letaś Vanahas navat zapisaŭ vialikaje intervju ź biełaruskim biznesoŭcam, dzie toj raskazaŭ pra pryncypy pabudovy kampanii i žyćcio ŭ emihracyi.
«Naša Niva» — bastyjon biełaruščyny
PADTRYMAĆCiapier čytajuć
Jak u halečy śpivałasia radnia Łukašenki? Małaviadomyja fakty20
Kamientary