Za hod kolkaść zatrymanych ukrainskich uchilantaŭ, jakija sprabavali ŭciačy ŭ Biełaruś, vyrasła ŭ čatyry razy
Kolkaść ukraincaŭ pryzyŭnoha ŭzrostu, jakija sprabujuć niezakonna trapić u Biełaruś, kab paźbiehnuć mabilizacyi, za dva hady vyrasła bolš jak u trysta razoŭ. Biełaruski rasśledavalnicki centr vyśvietliŭ, kolki moža kaštavać uchilantam nielehalnaje pierasiačeńnie miažy, i jakija jašče krainy jany vybirajuć, kab nie słužyć.
Statystyka ŭciokaŭ
U 2025 hodzie za sprobu pierasiačeńnia ŭkrainska-biełaruskaj miažy ŭkrainskija pamiežniki zatrymali 1424 mužčyny pryzyŭnoha ŭzrostu, paviedamili žurnalistam BRC i ŭkrainskaha vydańnia «Ślidstvo.Info» ŭ Dziaržaŭnaj pamiežnaj słužbie Ukrainy (DPSU). Heta ŭ čatyry razy bolš, čym u papiarednim hodzie (326 čałaviek), i ŭ 356 razoŭ, čym u 2023‑m (4).
«Sioleta (u 2025‑m — red.) my bačym peŭny rost, kali paraŭnoŭvać ź inšymi hadami, kolkaści tych, kaho my zatrymlivajem za sprobu niezakonnaha pierasiačeńnia miažy. […] Napramak miažy ź Biełaruśsiu — jon istotna nižejšy pa pakaźnikach, čym, naprykład, miaža z Rumynijaj abo miaža z Małdovaj. Ale, znoŭ ža, pryrost jość», — skazaŭ žurnalistam pamočnik kiraŭnika DPSU Andrej Dziemčanka.
U minułym hodzie na ŭkrainska-biełaruskaj miažy zatrymali bolš mužčyn, čym na ŭkrainska-polskaj. Kali ŭ 2024‑m na miažy z Polščaj złavili 467 uchilistaŭ, a ź Biełaruśsiu — 326, to letaś kolkaść tych, chto chacieŭ trapić u RB, vyrasła amal u 4,5 razu.
Pavodle danych ukrainskich pamiežnikaŭ, biełaruski napramak uvajšoŭ u piaciorku pa kolkaści zatrymanych vajennaabaviazanych. Vyšej — Vienhryja (1841 čałaviek), Słavakija (2265), Małdova (4937), na pieršym miescy — Rumynija (10066). Za biełaruskaj iduć miaža z Polščaj (511 čałaviek u 2025 hodzie) i z Rasijaj (adzin čałaviek).
Košt uciokaŭ
U kamientary žurnalistam Juryj Šachrajčuk, načalnik pres-słužby 9‑ha pamiežnaha atrada imia Siečavych Stralcoŭ, jaki patruluje ŭkrainska-biełaruskuju miažu, paviedamiŭ, što siłami atrada «ŭžo było vyjaŭlena bolš za 70 arhanizavanych złačynnych hrup, hrupovak, jakija zajmajucca mienavita pierapraŭkaj ludziej praź miažu».
Žurnalist BRC pahutaryŭ z pradstaŭnikom adnoj z takich hrup u Telegram. Toj prapanavaŭ kupić pravierany maršrut uciokaŭ z Ukrainy abo apłacić pasłuhu «pad kluč»: zakazać aŭto z daśviedčanym kiroŭcam, jaki abjedzie błokpasty va Ukrainie i pryviazie da miažy ŭ toj čas, kali na biełaruskim baku budzie dziažuryć «svaja źmiena» pamiežnikaŭ. Za dapamohu ŭ nielehalnym vyjeździe dla dvuch mužčyn surazmoŭca paprasiŭ $16 tysiač. U hetuju sumu ŭvachodzić arhanizacyja ŭciokaŭ u Biełaruś, a potym — u ES.
«Hladzicie, vas zabiaruć z Kijeva, vas zabiaruć ź luboha punkta. U hetym niama nijakaj prablemy. Vas zabiaruć prosta z domu. […] Vy apłačvajecie ŭžo kali siadzicie ŭ mašynie. Vyklučna», — zapeŭniŭ jon.
Padčas dziejańnia vajennaha stanovišča va Ukrainie mužčynam va ŭzroście ad 23 da 60 hadoŭ abmiežavanaja mahčymaść pakidać krainu. Zrabić heta mohuć tolki tyja, chto padpadaje pad praviły pierasiačeńnia miažy i maje dla hetaha adpaviednyja dakumienty, naprykład, tyja, chto straciŭ na vajnie blizkich svajakoŭ.
«Tolki try čałavieki buduć viedać pra vas. Samy pieršy čałaviek krainy». Źjavilisia zapisy razmoŭ špijonki Iny Kardaš z kurataram11
«Tolki try čałavieki buduć viedać pra vas. Samy pieršy čałaviek krainy». Źjavilisia zapisy razmoŭ špijonki Iny Kardaš z kurataram
«Łukašenka pavinien panieści adkaznaść za saŭdzieł u rasijskaj ahresii». Ministr zamiežnych spraŭ Ukrainy raskazaŭ pra novuju palityku ŭ dačynieńni da Biełarusi1818
Kamientary
Vielmi uvažliva da uchilantaŭ biežancaŭ abirajuščych siońnia zaraz rBiełaruś
Paśla 2014 taksama papiaradžał
I što voś jany by adrazu ŭ šturmaviki pajšli by, ale nie mohuć, trymajuć ekanamičny front z Varšavy