U Aŭstralii masava zakryvajuć plažy z-za napadaŭ akuł. Jość užo čatyry paciarpiełyja
Za dva dni ŭ aŭstralijskim štacie Novy Paŭdniovy Uels adbylisia čatyry napady akuł na ludziej. Paśla hetaha ŭłady zakryli kala 40 plažaŭ i zaklikali žycharoŭ i turystaŭ nie zachodzić u vadu. Usie incydenty, pavodle źviestak CNN, źviazvajuć z akułami-bykami, ci tuparyłymi akułami.
Pieršym paciarpieŭ 12‑hadovy chłopčyk: u niadzielu na jaho napała akuła ŭ Sidnejskaj havani, kali jon skakaŭ u vadu razam ź siabrami. Dzieci zmahli vyciahnuć siabra na bierah, a ratavalniki nakłali žhuty na abiedźvie nahi. Chłopčyk znachodzicca ŭ balnicy ŭ krytyčnym stanie.
U paniadziełak akuła napała na 25‑hadovaha siorfiera na papularnym turystyčnym plažy Nort-Ścin u rajonie Menli. Mužčynu taksama špitalizavali ŭ ciažkim stanie, jamu dapamahli vybracca z vady ludzi, jakija znachodzilisia na plažy.
U toj ža dzień kala Dzi-Uaj-Pojnt akuła adkusiła kavałak daŭžynioj kala 15 santymietraŭ ad siorfborda 11‑hadovaha dziciaci. Jašče adzin vypadak adbyŭsia na nastupny dzień kala Pojnt-Płomier: akuła schapiła došku siorfiera, mužčyna atrymaŭ niaznačnyja traŭmy i paśla ahladu daktaroŭ byŭ adpuščany dadomu.
Ekśpierty tłumačać pavieličeńnie ryzyki napadaŭ tym, što akuły-byki časta trymajucca ŭ mutnaj vadzie kala vuściaŭ rek, asabliva paśla mocnych daždžoŭ. U apošnija vychadnyja ŭ Sidnei prajšli samyja intensiŭnyja zalevy za apošnija dziesiać hadoŭ, što stvaryła niebiaśpiečnyja ŭmovy.
Pavodle słoŭ kiraŭnika ratavalnaj słužby Styva Pirsa, takija vypadki, kali ŭsie paciarpiełyja stali achviarami realnych napadaŭ, sustrakajucca vielmi redka. Niahledziačy na papiaredžańni, niekatoryja ludzi ŭsio adno zachodziać u vadu. Ratavalniki aścierahajucca, što z-za śpioki i śviatočnych vychadnych na ŭźbiarežža pryjedzie šmat adpačyvalnikaŭ.
Ciapier situacyju kantralujuć ratavalnyja i municypalnyja słužby, jakija vykarystoŭvajuć drony, viertaloty i hidracykły. Śpiecyjalisty adznačajuć, što vadzie moža spatrebicca da tydnia, kab stać prazrystaj, i tolki paśla hetaha ryzyka sustreč z akułami źmienšycca.
Mižziemnaje mora moža stracić vialikich biełych akuł
U Aŭstralii akuła napała na padletka. Jaho vyratavali advažnyja siabry
Navukoŭcy ŭpieršyniu zafiksavali aranžavuju akułu-niańku FOTA
Navukoŭcy pakazali VIDEA, jak vaśminoh katajecca na samaj chutkaj u śviecie akule
Akuły atakavali rasijskich turystaŭ la bierahoŭ Filipin. Adnaho zabili, druhomu adhryźli ruku
Pamiatajecie Asol Śliviec? Žyćcio frystajlistki źmianiłasia da niepaznavalnaści, ciapier jana Abihal7
Kamientary