Histaryčny majontak va Ušackim rajonie nabyŭ za biescań rasijanin
Histaryčny majontak «Małyja Dolcy», jaki znachodzicca ŭ vioscy Novaje Žyćcio Ušackaha rajona, byŭ pradadzieny na aŭkcyjonie za 101 rubiel hramadzianinu Rasii. Tarhi adbylisia 23 studzienia 2026 hoda na płatformie Biełaruskaj univiersalnaj tavarnaj biržy. Papiaredniaja sproba prodažu ŭ 2024 hodzie nie mieła pośpiechu, bo ŭdzielnikaŭ nie znajšłosia, piša «Anłajnier».
Budynak uźviali ŭ pačatku XIX stahodździa. Spačatku jon naležaŭ siamji Vierańko, a paźniej, u pačatku XX stahodździa, pierajšoŭ da rodu Suščynskich. Na apošnim aŭkcyjonie startavaja cana składała 42 rubli (adnu bazavuju vieličyniu), a krok tarhoŭ — 2,10 rubla. Dla paraŭnańnia, u 2024 hodzie majontak sprabavali pradać za 40 rubloŭ.
Pavodle ŭmoŭ prodažu, pakupnik abaviazany ŭziać na siabie achoŭnyja abaviazki jak ułaśnik historyka-kulturnaj kaštoŭnaści. Akramia samoha budynka, jamu biez dadatkovaha aŭkcyjonu budzie pieradadzieny ŭ arendu i ziamielny ŭčastak. U majontku dazvalajecca vieści lubuju zakonnuju haspadarčuju dziejnaść, ale pačać jaje nieabchodna nie paźniej jak praz try hady paśla zaklučeńnia damovy kupli-prodažu.
Majontak pabudavany ŭ eklektyčnym styli: fasad i vuhły ŭpryhožanyja pilastrami, pa viersie ścien ciahniecca karniz, a z boku parku majecca cokalny pavierch. Raniej pieršy pavierch vykarystoŭvaŭsia dla pražyvańnia, a na druhim znachodziŭsia letni pakoj.
Pieršapačatkova majontak uklučaŭ piać nasielenych punktaŭ, młyn, karčmu, chlebnuju kramu i draŭlanuju Śviata-Mikałajeŭskuju carkvu. U 1880 hodzie tut było 18 dvaroŭ i amal dźvie sotni žycharoŭ. U pačatku XX stahodździa ŭ hetych ścienach pastavili adnu z najpieršych biełaruskich pjes — «Michałka», što ličycca rańnim uzoram nacyjanalnaj dramaturhii.
Paśla vajny ŭ budynku raźmiaščaŭsia internat. Paśla pažaru jon niekalki hadoŭ stajaŭ pustym, ale ŭ 1976 hodzie byŭ adnoŭleny. U saviecki pieryjad tut pracavali kantora kałhasa, sielski kłub, biblijateka, a ŭ padvałach dziejničała majsternia pa vyrabie konskaj zbrui.
Kłub i biblijateka zakrylisia ŭ 2011 hodzie, a pošta i elektrasietki — u 2013-m. Apošnija dvanaccać hadoŭ budynki majontka nie vykarystoŭvalisia. U 2020 hodzie jaho ŭnieśli ŭ śpis materyjalnych historyka-kulturnych kaštoŭnaściaŭ.
Na radzimie apošniaha karala Rečy Paspalitaj pradajuć budynak byłoj plabanii
Pad Vałožynam na prodaž vystavili prybiralniu-špakoŭniu. Prosiać 2280 rubloŭ
Budynak byłoha klaštaru ŭ Hłybokim znoŭ vystavili na aŭkcyjon
Hety budynak u Baranavičach pradavali za adnu bazavuju, ale cana na aŭkcyjonie skoknuła da $40 tysiač
Palitviaźniaŭ pa ŭsioj krainie apytvajuć: paśla pamiłavańnia vy chočacie zastacca ŭ Biełarusi ci źjazdžać?9
Palitviaźniaŭ pa ŭsioj krainie apytvajuć: paśla pamiłavańnia vy chočacie zastacca ŭ Biełarusi ci źjazdžać?
Ahientka Kardaš vykarystoŭvała seks, kab źbirać infarmacyju pra kalinoŭcaŭ i zavierbavać ukrainskaha kamandzira. A kurataru KDB pisała pra jaho: «Moj łoch»3535
Kamientary