Cichanoŭskaja pavinna syści, kab ciapier niechta inšy «ni na što nie ŭpłyvaŭ» i «rabiŭ pustyja zdymki z Rute ci Tuskam»?
U časy majoj rańniaj maładości biełaruskaja apazicyja viečna abjadnoŭvałasia. A ciapier jana pastajanna vyśviatlaje, chto maje być naviersie, adnačasova padkreślivajučy, što heta i tak ni na što nie ŭpłyvaje, piša ŭ fejsbuku žurnalist Dźmitryj Hurnievič.
1. Cichanoŭskaja — ništo. Usie jaje sustrečy ni na što nie ŭpłyvajuć, heta spatkańni dla zdymka, palityčny turyzm.
2. Cichanoŭskaja pavinna syści, jana pavinna addać svaju pasadu nam, bo jaje termin skončyŭsia.
Mnie składana zrazumieć hetu łohiku. Addać pasadu, kab što? Kab ciapier niechta inšy ni na što nie ŭpłyvaŭ i rabiŭ pustyja zdymki z Markam Rute ci Donaldam Tuskam? Kab Ofis Śviatłany Cichanoŭskaj uznačalvaŭ Babaryka, Paźniak ci Prakopjeŭ? Ale kali jaje dziejnaść roŭnaja nulu, kali jaje mandat skončyŭsia, to navošta prasić jaje syści? Ihnarujcie jaje. Ale ŭsio atrymlivajecca naadvarot — za joj biehajuć, kab kazać, nakolki jana im abyjakavaja.
Dla mianie baraćba ŭnutry demsiłaŭ — viečnaja zahadka. U časy majoj rańniaj maładości biełaruskaja apazicyja viečna abjadnoŭvałasia. A ciapier jana pastajanna vyśviatlaje, chto maje być naviersie, adnačasova padkreślivajučy, što heta i tak ni na što nie ŭpłyvaje. Heta absurd.
Dapuścim, što vychłap ad dziejnaści kamandy Cichanoŭskaj mizerny. Dyk na hetym fonie hienijalnyja idei, dziejańni i plon inšych siłaŭ pavinna vyłučacca, chočaš — nie chočaš. U časy kamunizmu ŭ Polščy isnavała «Salidarnaść» i paralelna «Zmaharnaja Salidarnaść». Apošnija vinavacili pieršych u miakkaści, zhodnictvie i śćviardžali, što rašučaja baraćba z kamunistami — heta akurat jany, a nie zvyčajnaja «Salidarnaść». Ale viadomaja ich adna «rašučaja akcyja» — vybuch dźviarej u pustym budynku, źviazanym z kamunistami.
Dapuścim, Cichanoŭskaja nie zmahajecca, a prosta katajecca z achovaj pa śviecie i havoryć. Jak u tym aniekdocie, dyk i vy havarycie. Chto i što zaminaje ŭsim tym, chto curajecca «ofisnaj» palityki, zmahacca tak, jak jany žadajuć?
U Biełarusi zabaranili jutub, instahram, tyktok, elektronnuju poštu, vatsap i stała niemahčyma ahitavać, pierakonvać u svajoj racyi biełarusaŭ? U nas tuzin niezaležnych miedyja. My što, spračajemsia, chto ŭ nas hałoŭny? Kožny robić svajo, dla svajoj aŭdytoryi, časam lepš, časam horš.
Cichanoŭskaja što, błakuje internet, kab niechta nie moh kamunikavać ź biełarusami ŭ Biełarusi ci ŭ zamiežžy? Vuń biełarusy za noč prymusili viarnuć Łukašenku aśviatleńnie na vulicy, zvyčajnym abureńniem u sacsietkach. Ja školnikam razvoziŭ ulotki ŭ susiednija vioski na rovary, byvała što i na kani. Ciapier ža i kania zaprahać nie treba. Vuń u tredsie pałova Miensku siadzić i tracina čynoŭnikaŭ. Prychodź, dakazvaj, pierakonvaj! Akučvaj!
Ciapier čytajuć
U Minsku adbylisia masavyja zatrymańni vydaŭcoŭ i kniharaspaŭsiudnikaŭ5
Kamientary
Śvieta nie imiejet prava skryvať zarpłatu. I takich prietienzij mnoho
Nijakich inšych na jaje miesca abo novych pasadaŭ u ofisach-kabinietach nie treba. Kali niechta nakštałt Prakopjeva kudyści lezie, heta zvyčajny prajdziśviet.
Chaj usie hetyja pazbaŭlenyja sensu struktury samaraspuskajucca kali tam šče zastalisia sumlennyja ludzi, katoryja ŭ stanie dać abjektyŭna acenku svajoj dziejnaści. Tam dzie sapraŭdy treba, biełarusy samaarhanizujucca.