Novych karystalnikaŭ Signal u Biełarusi nie budzie? Prablemy z rehistracyjaj užo nie tolki z A1
Kod dla rehistracyi nie prychodzić i abanientam MTS.
Dniami źjaviłasia infarmacyja, što karystalniki mabilnaha apieratara A1 u Biełarusi i ŭ roŭminhu za miažoj nie mohuć zarehistravacca ŭ miesiendžary Signal. Prablema ŭźnikaje na etapie paćviardžeńnia numara: na telefon nie prychodzić šaściznačny kod vieryfikacyi.
Čytačy «Našaj Nivy» paviedamlajuć, što padobnyja ciažkaści jość i ŭ abanientaŭ MTS. Abanientam taksama nie prychodzić kod.
Pavodle śviedčańniaŭ karystalnikaŭ, u vypadku z MTS prablema na ŭzroŭni apieratara ŭźnikaje nie pieršy raz.
«Niedzie ŭ 2023‑m sprabavała ŭstalavać Signal — kod doŭha nie prychodziŭ. Atrymałasia z novaj sproby tolki na nastupny dzień», — raspaviadaje adna z čytačak.
Inšaja adznačaje, što sutyknułasia z padobnaj situacyjaj užo ŭ 2025 hodzie:
«Vosieńniu źmianiła telefon i chacieła znoŭ ustalavać Signal. Dadatak spampavaŭsia, ustalavaŭsia, ale kod tak i nie pryjšoŭ. Sprabavała niekalki razoŭ — biezvynikova».
My taksama pasprabavali zarehistravać Signal na biełaruski numar MTS u roŭminhu. Vynik akazaŭsia tym ža — sms z kodam paćviardžańnia nie pryjšło.
U Biełarusi Signal daŭno maje składanuju reputacyju. Padčas zatrymańniaŭ, dopytaŭ ci «razmovaŭ» na miažy siłaviki tradycyjna prahladajuć źmieściva telefonaŭ. Viadomyja vypadki, kali najaŭnaść miesiendžara Signal vyklikała dadatkovyja pytańni i navat ahresiŭnuju reakcyju, pakolki takija dadatki vykarystoŭvajucca dla biaśpiečnaj kamunikacyi. Ličycca, što ŭ «prostaha» čałavieka takoj prahramy prosta nie budzie. A kali jana ŭstalavanaja, to, maŭlaŭ, jość što chavać.
U niekatorych instrukcyjach pa ličbavaj biaśpiecy biełarusam navat rajać vydalać Signal pierad mahčymymi pravierkami, kab nie pryciahvać lišniaj uvahi.
Ciapier čytajuć
U pačatku 2000‑ch troje nastaŭnikaŭ historyi źbiehli va Ukrainu ad «hienacydu biełaruskaha naroda», jaki čyniŭ režym Łukašenki. Jak skłaŭsia ich los?1414
Kamientary
A sama navina ŭ čarhovy raz pakazvaje, jakoj łažaj źjaŭlajecca vyklučnaja mahčymaść rehistracyi ŭ siervisu vyklučna praz numar telefona.