Літоўцы і палякі ламануліся запраўляцца ў Беларусь. Вось колькі на гэтым можна зэканоміць
Праз вайну ў Іране, якая выклікала нафтавы крызіс, цэны на паліва ў суседніх краінах ЕС узляцелі. Асабліва прыкметна падаражэла дызельнае паліва.
Літва — ужо 2 еўра за літр дызеля
Дызель у Літве каштуе ўжо па 2 еўра за літр (каля 6,72 рубля). У Беларусі — 2,6 рубля, ці каля 80 еўрацэнтаў па цяперашнім курсе. Такім чынам, розніца на адным літры складае 1,2 еўра.
Праз гэта паездкі па паліва з Літвы ў Беларусь сталі больш выгаднымі, чым да нафтавага крызісу, калі дызельнае паліва ў Літве каштавала 1,5—1,6 еўра за літр.
Груба кажучы, уласнік Passat B4 з бакам на 100 літраў можа заліць поўны бак у Беларусі за 80 еўра замест 200 еўра ў Літве.
Але агулам сярод легкавых аўто такі аб'ём сустракаецца рэдка. Таму звычайна размова ідзе пра 60—90 літраў.
У выпадку з сярэднестатыстычным бакам на 70 літраў эканомія складае каля 85 еўра.
Праўда, гэта без уліку выдаткаў на аплату пошліны на выезд і рэгістрацыю ў электроннай чарзе (пад 70 рублёў, ці каля 20 еўра). З улікам страхоўкі і выдаткаў на дарогу з 85 еўра застанецца каля 50—55 еўра.
Але жыхары прыгранічча, якія ўсё яшчэ маюць ва ўласнасці нейкі Passat B4 ці Audi A6 C4, на запраўцы ў Беларусі могуць зэканоміць каля 80—85 еўра.
Уласнікам бензінавых аўто ехаць з Літвы ў Беларусь па паліва менш выгадна, бо бензін у Літве каштуе каля 1,7 еўра за літр.
Аднак, калі машына мае яшчэ і газавую ўстаноўку, то агульная эканомія будзе больш адчувальная, бо газ у Беларусі таксама каштуе значна танней — каля 40 еўрацэнтаў супраць 0,75 еўра ў Літве.
А што ў Польшчы?
У Польшчы паліва каштуе крыху танней, чым у Літве. Літр дызпаліва там пад 8 злотых (каля 1,85 еўра). То-бок розніца з Беларуссю атрымліваецца каля 1—1,05 еўра на літры.
Але меншая розніца ў цане кампенсуецца тым, што, у адрозненне ад Літвы, у Польшчу можна ехаць з дадатковымі 10 літрамі паліва ў каністры.
Таму паляк на запраўцы поўнага бака ў Беларусі таксама можа зэканоміць не адзін дзясятак еўра.
Пры гэтым, апроч паліва, з Беларусі ў Польшчу легальна можна везці літр моцнага алкаголю і дзве пачкі цыгарэт, што дадае выгады такой паездцы.
Паездкі па паліва ў Беларусь сапраўды выклікаюць цікавасць у суседзяў.
Так, напрыклад, у інстаграме разыходзіцца відэа, дзе паляк, які жыве за 2 км ад Беларусі, выхваляецца тым, як запраўляе сваю Audi па 3,2 злотага за літр замест 8 злотых.
Відэа падхапілі адразу некалькі паблікаў, дзе ў каментарах абмяркоўваюць, ці сапраўды варта ехаць запраўляцца ў Беларусь. Адны лічаць, што гэта добрая магчымасць зэканоміць і заадно набыць танны алкаголь і цыгарэты. Іншыя наракаюць на небяспеку такіх паездак, а таксама на тое, што яны займаюць шмат часу.
Праўда, многія запэўніваюць, што на паездку ў Беларусь у іх сыходзіць па 2,5—3 гадзіны, таму выгада нібыта відавочная.
У плюсе цяпер і так званыя беларускія саляравозы. Натуральна, што па цэнах, як на запраўцы, ніхто паліва не прадае, але па 5,5—6 злотага за літр (каля 1,4 еўра) з улікам апошняга падаражання перапрадаць яго ў Польшчы цалкам рэальна.
Таму Passat B4 з бакам на 100 літраў цяпер можа прыносіць каля 50—55 еўра прыбытку на паліве. Праўда, ездзіць у Польшчу з поўным бакам можна не часцей, чым раз на 72 гадзіны, а месячны ліміт складае 600 літраў.
Праз гэтыя і іншыя абмежаванні многія чаўнакі ездзяць праз мяжу раз на тыдзень, каб можна было правезці не толькі паліва, цыгарэты і алкаголь, але і тавар на зваротным шляху.
Цяпер чытаюць
Як беларусы ў Вільні адзначылі Дзень Волі ШМАТ ФОТА3
Як беларусы ў Вільні адзначылі Дзень Волі ШМАТ ФОТА
Часам нечаканая гісторыя беларускіх гімнаў: «Мы выйдзем шчыльнымі радамі», «Пагоня», «Жыве Беларусь», «Радзіма мая дарагая», «Магутны Божа» (з ВІДЭА)1010
Каментары