Aktyvist mižnarodnaj maładziožnaj arhanizacyi «Małady front» (Čechija) Andrej Cianiuta, jaki słužyć u čaściach vajenna‑pavietranaj abarony ŭ Viciebsku, pakarany dziesiaćciu sutkami haŭptvachty za parušeńni padčas niasieńnia słužby.
Jak paviedamiŭ lider «MF» Źmicier Daškievič, 29 červienia Cianiuta pavinien być dastaŭleny ŭ Minsk dla adbyvańnia pakarańnia. Pakul nieviadoma, za što kankretna pakarany maładafrontaviec. «U jaho byli vialikija prablemy z kiraŭnictvam čaści, — skazaŭ Daškievič. — U pryvatnaści,
Cianiuta sam patrabavaŭ dla siabie alternatyŭnaj słužby, i pad jaho ŭpłyvam jašče troje bajcoŭ čaści napisali zajavu z patrabavańniem alternatyŭnaj cyvilnaj słužby».
Akramia taho, pavodle słoŭ Daškieviča, siaržant Cianiuta addavaŭ zahady tavaryšam na biełaruskaj movie, što taksama nie vitałasia kiraŭnictvam čaści.
Daškievič źviarnuŭ uvahu na toje, što ŭmovy na haŭptvachcie «horšyja, čym u Centry izalacyi pravaparušalnikaŭ na vulicy Akreścina ŭ Minsku, — tam navat zabaroniena pieradavać pieradačy».
Andrej Cianiuta byŭ pryzvany ŭ armiju vosieńniu 2009 hoda. Spačatku maładziožnaha aktyvista pryznali nieprydatnym da słužby ŭ armii z‑za vysokaj stupieni skalijozu, adnak zatym nakiravali na dadatkovaje abśledavańnie i pryznali prydatnym da vajskovaj słužby.
Cianiuta źviartaŭsia ŭ sud Savieckaha rajona Homiela ź iskam da vajenkamata. Jon prasiŭ prypynić jaho pryzyŭ, pakul nie budzie paćvierdžana zakonnaść jaho adličeńnia z Branskaj sielskahaspadarčaj akademii, studentam jakoj jon źjaŭlaŭsia. Sud adchiliŭ isk.
Maładziožny aktyvist prasiŭ vajenkamat nakiravać jaho na alternatyŭnuju słužbu, ale prośba nie była zadavolena.
Ciapier čytajuć
Biełaruska nabiła na ciele partrety Łukašenki i jaho synoŭ, Umki, Pucina dy Si Czińpina15
Kamientary