Deputat Jeŭraparłamienta ad Polščy Marek Mihalski arhanizuje akcyju ŭ padtrymku staršyni Ivianieckaj arhanizacyi nieaficyjnaha Sajuza palakaŭ na Biełarusi Teresy Sobal.
4 žniŭnia Teresu Sobal źniali ź ciahnika ŭ Breście, jaki adpraŭlaŭsia ŭ Polšču, zajaviŭšy, što jana znachodzicca ŭ śpisie nievyjaznych. U Vałožynskim RAUS advakatu Sobal paviedamili, što 3 žniŭnia prakuratura adnaviła spynienuju raniej kryminalnuju spravu ŭ dačynieńni da Sobal.
Sprava była raspačata 18 śniežnia 2009 hoda pa abvinavačańni Sobal u złoŭžyvańniach paśla atrymańnia ŭ 2004 hodzie materyjalnaj dapamohi ad kiraŭnictva SPB. Adnak 24 lutaha jana było spyniena ŭ suviazi z zakančeńniem terminu daŭnaści. Nieŭzabavie jana była adnoŭlena, u domie Sobal 28 červienia byŭ praviedzieny vobysk. Adnak supracoŭniki milicyi nie znajšli ŭkazanyja ŭ pastanovie na vobysk «pryłady złačynstva» — kampjutery i nośbity infarmacyi.
Jeŭraparłamientaryj Marek Mihalski ličyć čarhovaje raspačynańnie kryminalnaj spravy suprać aktyvistki polskaj mienšaści «novym vidavočnym vypadkam parušeńnia pravoŭ čałavieka biełaruskimi ŭładami» i zaklikaŭ padtrymać Sobal, padpisaŭšy adpaviednaje piśmo ŭ Administracyju prezidenta Biełarusi i biełaruskaje pasolstva ŭ Varšavie i nakiravaŭšy jaho elektronnym listom.
U pryvatnaści, u liście prezidentu Alaksandru Łukašenku havorycca pra adnaŭleńnie kryminalnaha pieraśledu aktyvistki niefarmalnaha SPB i ŭtrymlivajecca zaklik «spynić represii ŭ dačynieńni da Sobal i admovicca ad lubych inšych form ucisku na hramadzian Biełarusi». Taksama adznačajecca, što Teresa Sobal — «pažyłaja žančyna, jakaja nie ŭjaŭlaje pahrozy dla biełaruskich uład».
«Mižnarodnaja supolnaść uvažliva sočyć za raźvićciom situacyi z pravami čałavieka ŭ Biełarusi, bo heta asnova dla mahčymaj finansavaj dapamohi krainie», — havorycca ŭ zvarocie da biełaruskaha prezidenta.
Ciapier čytajuć
Andrej Švied, architektar represij, pryznačany staršynioj Viarchoŭnaha suda22
Kamientary