Kandydat ad AHP Jarasłaŭ Ramančuk da apošniaha dnia ciahnuć z padačaj dakumientaŭ u CVK nie staŭ.
Kandydat u prezidenty ad Abjadnanaj hramadzianskaj partyi Jarasłaŭ Ramančuk da apošniaha dnia ciahnuć z padačaj dakumientaŭ u CVK nie staŭ. Padaŭ u pieradapošni.
Ramančuk źjaviŭsia na płoščy Niezaležnaści ŭ kampanii z kiraŭnikom štabu, pradprymalnikam Lvom Marholinym, kiraŭnikom inicyjatyŭnaj hrupy, byłym prarektaram BDU Anatolem Paŭłavym i pres‑sakratarom Hannaj Krasulinaj.
Da pinžakoŭ AHPistaŭ byli prymacavanyja žoŭta‑zialonyja znački. Hetyja kolery i stanuć aficyjnymi kampanii Jarasłava Ramančuka.
Zrešty, sam ekanamist nie vyklučaje takoj imaviernaści, što adziny kandydat ad apazicyi jašče moža być vyłučany, ale ŭžo paśla etapu zboru podpisaŭ. «Budziem razmaŭlać z apazicyjnymi kandydatami. Mahčyma, tam buduć i adbielvalniki Łukašenki. Naturalna, što ź imi razmovy być nie moža», — zaznačyŭ Ja.Ramančuk.
Pa jahonych słovach, AHP užo zaraz maje dastatkova śpiecyjalistaŭ, jakija zmohuć farmiravać urad. Ahułam u inicyjatyŭnuju hrupu ŭvajšło 1423 čałavieki.
Pakul Ramančuk nasiŭ podpisy ŭ vybarčuju kamisiju, žurnalisty ledź nie zavierbavali jašče adnaho. Ale milicyjant, što pryjšoŭ pravieryć, čamu tak mnoha ludziej sabrałasia razam, skazaŭ, što jon pa‑za palitykaj.
Rašeńnie pa rehistracyi inicyjatyŭnaj hrupy projdzie ŭ paniadziełak. Sam Jarasłaŭ u hety dzień budzie ŭ Maskvie, dzie projdzie jahonaja pres‑kanfierencyja. U aŭtorak ža jon sustreniecca z rasijskimi žurnalistami ŭžo ŭ Minsku.
Ci nie biantežyć kamandu AHP, što mnohija siabry partyi pierajšli pracavać da Uładzimira Niaklajeva, adkazaŭ Leŭ Marholin.
«Častka našych partyjcaŭ kirujecca kaštoŭnasnymi pryncypami, ale jość i prahmatyki, jakim dzie bolej daduć, tudy jany i iduć. Było rašeńnie Palitrady AHP, što siabry partyi, jakija pierajšli pracavać da inšych kandydataŭ, pavinny chacia b prypynić siabroŭstva ŭ arhanizacyi. Tym nie mienš, viasielnych hienierałaŭ u nas nie budzie. Usie buduć źbirać podpisy», — zaznačyŭ Ł.Marholin.
Ciapier čytajuć
U Minsku pieradumali znosić chruščoŭki. Renavacyja zakranie dvuch-trochpaviarchovyja damy1
Kamientary