1-3 kastryčnika projduć Jeŭrapiejskija vosieńskija dni nazirańniaŭ za ptuškami

1–3 kastryčnika ŭ Biełarusi projduć Jeŭrapiejskija vosieńskija dni nazirańniaŭ za ptuškami. Mierapryjemstva arhanizavana hramadskaj arhanizacyjaj «Achova ptušak Baćkaŭščyny» (APB) pry padtrymcy Ministerstva pryrodnych resursaŭ i achovy navakolnaha asiarodździa.

Jak paviedamiŭ BiełaPAN supracoŭnik APB Dzianis Kiciel, akcyja tradycyjna pravodzicca pradstaŭnikami mižnarodnaj arhanizacyi Birdlife International prykładna ŭ 30 jeŭrapiejskich krainach z metaj «adciahnuć ludziej ad paŭsiadzionnych kłopataŭ i źviarnuć ich uvahu na pryrodu, prablemy ptušak». Dla ŭdziełu ŭ akcyi ŭsim achvotnym prapanoŭvajecca vyjści na pryrodu, paličyć vidy ptušak, ich kolkaść, a taksama kolkaść ptušak, jakich nie atrymałasia raspaznać. Usie danyja nieabchodna paviedamić u sakrataryjat APB pa telefonie ŭ Minsku (017) 2630613, pa mabilnych telefonach (029) 2230613 (MTS), (029) 1016887 (Velcom), sms na karotki numar 0841 abo pa e-mail: [email protected]. Apošni termin padačy danych — 16.00 3 kastryčnika.

Ranicaj 2 kastryčnika ŭ miežach Jeŭrapiejskich dzion APB taksama arhanizuje placoŭki nazirańniaŭ za ptuškami, na jakich raspaznavać ptušak dapamohuć prafiesijanały. U Minsku nazirać za ptuškami možna budzie ŭ Centralnym bataničnym sadzie i zaaparku, u Breście — na vulicy Nabiarežnaj, u Viciebsku — u Bataničnym sadzie, u Hrodnie — u parku Žylibiera. U Barysavie nazirańnie za ptuškami budzie arhanizavanaje na piešachodnym moście praź Biarezinu, u Kobrynie — u parku imia Suvorava, u Łunincy — na ŭčastku lesu ŭ bok vioski Vulka-1, u Miadziele — na nabiarežnaj voziera Miastra, u Słonimie — u ekałahičnym centry, u Słucku — u ekołaha-bijałahičnym centry navučencaŭ, u Šumilinie — na Šumilinskim voziery.

U Ivanaŭskim rajonie nahladalnaja placoŭka budzie adkryta ŭ škole vioski Lachavičy, u Sieńnienskim rajonie — u škole № 2 haradskoha pasiołka Bahušeŭsk ci Alaksienickaj škole, u Słonimskim rajonie — va ŭročyščach Biekievičy.

Jak adznačyŭ Kiciel, biełaruskija vyniki nazirańniaŭ za ptuškami buduć pieradadzieny jeŭrapiejskamu kaardynataru ŭ Słavakiju. Čakajecca, što danyja z usich krain pašyrać viedy pra asablivaści mihracyi ptušak.

U 2009 hodzie ŭ vosieńskich dniach nazirańniaŭ u Biełarusi ŭziało ŭdzieł 2.358 čałaviek, jakija vyznačyli bolš za 21 tys. ptušak 105 vidaŭ. Pa ŭsioj Jeŭropie było ŭličana bolš za 2,5 młn. ptušak.

Daviedka BiełaPAN. Hramadskaja arhanizacyja «Achova ptušak Baćkaŭščyny» — najbujniejšaja pryrodaachoŭnaja arhanizacyja Biełarusi, jakaja pracuje ŭ śfiery achovy bijaraznastajnaści i ekaadukacyi. APB naličvaje bolš za dźvie tysiačy členaŭ, bolš za 100 školnych kłubaŭ i 14 adździaleńniaŭ.

• 0
• 0
• 0
• 0
• 0
• 0
• 0
• 0