Krynica: Biełaruś moža zaprasić kredytnuju liniju MVF u vypadku rasijskaha cisku

Biełaruś razhledzić mahčymaść pryciahnieńnia strachavych srodkaŭ Mižnarodnaha valutnaha fondu (MVF) u vyhladzie previentyŭnaj kredytnaj linii (Precautionary Credit Line, PKŁ), paviedamiŭ ahienctvu «Interfaks-Zachad» adzin ź biełaruskich udzielnikaŭ pasiadžeńnia Rady kiraŭnikoŭ MVF i Suśvietnaha banka, jakoje prajšło ŭ Vašynhtonie.

U pasiedžańni Rady MVF brali ŭdzieł staršynia Nacbanku Piatro Prakapovič i vice-premjer Andrej Kabiakoŭ. Takim čynam, krynicaj moh być chtości ź ich abo vysokapastaŭleny supracoŭnik śpiecsłužbaŭ, jaki mieŭ dačynieńnie da arhanizacyi pieramovaŭ.

«U listapadzie hetaha hoda čakajecca misija MVF. Padčas misii my płanujem abmianiacca idejami adnosna dalejšych pierśpiektyŭ supracoŭnictva z fondam. U pryvatnaści, nie vyklučajecca abmierkavańnie mahčymaści pradastaŭleńnia Biełarusi previentyŭnaj kredytnaj linii», — skazaŭ surazmoŭca.

Sa słovaŭ infarmatara łukašenkaŭskaha ahienctva, srodki MVF u vyhladzie PKŁ kampiensujuć «mahčymyja źniešnija šoki». Havorka idzie pra rezkaje pavieličeńnie cenaŭ na rasiejskija enierhanośbity, u vypadku dalejšaha paharšeńnia adnosinaŭ z Rasiejaj

PKŁ, u adroźnieńnie ad kredytu stend-baj, — heta nie žyvyja hrošy, a patencyjnaja mahčymaść skarystacca kredytam u vypadku ŭźniknieńnia nadzvyčajnaj situacyi. Nijakich śpiecyjalnych umovaŭ pry hetym nie vystaŭlajecca.

Previentyŭnaja kredytnaja linija — heta zusim novy miechanizm MVF, raspracavany ŭ minułym vieraśni. PKŁ mohuć adkryvać i dla krainaŭ, ekanamičnaja palityka jakich nie całkam adpaviadaje patrabavańniam MVF.

Surazmoŭca «Interfaksu» padkreśliŭ, što kiraŭniki MVF vysoka aceńvajuć vykanańnie Biełaruśsiu damovaŭ pa prahramie stand-by. Akramia taho, jon raskazaŭ, što ŭ kastryčnickim ahladzie suśvietnaj ekanomiki MVF rezka pavysiŭ acenku rostu ekanomiki Biełarusi ŭ hetym hodzie — z 2,4% da 7,2%. Heta daje biełaruskamu ŭradu arhumienty dla abhruntavańnia rostu zarobkaŭ u biudžetnaj śfiery, jaki raniej MVF krytykavała, bo nie bačyła rostu pradukcyjnaści pracy.

U vypadku adkryćcia previentyŭnaha kredytu MVF budzie vieści rehularny manitorynh prahresu ŭ prablemnych siektarach. Pry hetym kraina-pazyčalnica nie budzie płacić pracentaŭ pa kredycie, kali patreby ŭ skarystańni joju nie ŭźniknie.

Faktyčna,

z vyłučeńniem PKŁ Biełaruś budzie zastrachavanaja ad situacyj kštałtu lipieńskaj, kali kraina elemientarna nie mieła svabodnych hrošaj, kab zapłacić pa raptoŭnych rachunkach «Hazpromu».

Nahadajem, što MVF vyłučyŭ Biełarusi kredyt stend-baj na $ 3,46 młrd dla ŭmacavańnia nacyjanalnaj finansavaj sistemy ŭ časie kryzisu (587,4% ad krainavaj kvoty).

Cikava, što

opcyjaj HKŁ dahetul skarystalisia try krainy — Mieksika, Polšča, Kałumbija. Usie try źjaŭlajucca asabliva blizkimi sajuźnicami ZŠA. Pamier PKŁ dla Biełarusi moža skłaści kala 2,95 młrd dalaraŭ z pavieličeńniem da $5,9 młrd praz 12 miesiacaŭ.

• 0
• 0
• 0
• 0
• 0
• 0
• 0
• 0