«Havary praŭdu» pazbavili rehistracyi

Haspadarčy sud Minska (HSM) zadavoliŭ isk Minharvykankama ab pazbaŭleńni dziaržaŭnaj rehistracyi daśledča-aśvietnaj ustanovy «Ruch napierad», dyrektaram jakoj źjaŭlajecca pretendent na pasadu prezidenta Biełarusi Uładzimir Niaklajeŭ.

Rašeńnie ab likvidacyi «Ruchu napierad», jaki pravodzić hramadzianskuju kampaniju «Havary praŭdu!», pryniaŭ 12 kastryčnika sudździa Andrej Rybałkin.

U sudzie pradstaŭnik Minharvykankama Dźmitryj Antanievič śćviardžaŭ, što dla rehistracyi «Ruchu napierad» jaho kiraŭniki padali zaviedama niepraŭdzivyja źviestki. U pryvatnaści, pavodle słoŭ Antanieviča, ustanova zaklučyła dahavor arendy pamiaškańnia z TAA «Cina Vłaci» pa praśpiekcie Mašerava, 54–5, viedajučy, što hetyja pamiaškańni źjaŭlajucca handlovymi płoščami. Raźmiaščeńnie ofisa ŭ pamiaškańniach, funkcyjanalnaje pryznačeńnie jakich — handlovaje, nie dapuskajecca, śćviardžajuć u harvykankamie.

Antanievič taksama nahadaŭ, što 29 lipienia HSM zadavoliŭ isk Minharvykankama ab pryznańni dahavora arendy ofisa nikčemnym, a sproby «Ruchu napierad» abskardzić hetaje rašeńnie ŭ apielacyjnym paradku apynulisia biespaśpiachovymi.

U svaju čarhu pradstaŭnik «Ruchu napierad» Viktar Sazonaŭ zajaviŭ u sudzie, što nijakich zaviedama niepraŭdzivych źviestak padčas rehistracyi ŭ Minharvykankam nie pieradavałasia. Pavodle jaho słoŭ, u zakanadaŭstvie niama nijakaj normy, jakaja vyznačaje, jakija pamiaškańni mohuć vykarystoŭvacca dla administracyjnych metaŭ. U kampanii «Cina Vłaci» arandavalisia nie handlovyja, a mienavita administracyjnyja płoščy, padkreśliŭ Sazonaŭ.

Što da pryznańnia dahavora arendy ofisa nikčemnym, to, pavodle jaho słoŭ, užo zaklučany novy dahavor na arendu hetaha ž pamiaškańnia. «Kali arandavanaje pamiaškańnie nie padychodzić pad ofisnaje pa funkcyjanalnym pryznačeńni, to Minharvykankam moža prosta zabaranić vykarystańnie hetaha pamiaškańnia, a nie pazbaŭlać arhanizacyju rehistracyi. Hety arhumient naohuł nie padychodzić pad sutnaść isku — ab padavańni zaviedama niepraŭdzivych źviestak», — zajaviŭ pradstaŭnik adkazčyka.

Sudździa Rybałkin pryniaŭ bok haradskich uładaŭ, dadaŭšy, što pradstaŭniki «Ruchu napierad» mohuć abskardzić hetaje rašeńnie ŭ apielacyjnym paradku ŭ kalehii HSM i ŭ kasacyjnym paradku — u Vyšejšym haspadarčym sudzie.

Jak zajaviła BiełaPAN paśla zakančeńnia pracesu namieśnica dyrektara «Ruchu napierad» Nina Pachłopka, jana abaviazkova skarystaje prava abskardžańnia. «Inšaha rašeńnia ad Haspadarčaha suda Minska my i nie čakali, usio było pradkazalna. Hetaje rašeńnie pakazvaje, što «samy spraviadlivy sud u śviecie» znachodzicca nie ŭ našaj krainie. Tym nie mienš, ja spadziajusia, što i ŭ našych sudach jość sumlennyja sudździ, jakija prymuć spraviadlivaje rašeńnie», — skazała Pachłopka.

Raniej dyrektar «Ruchu napierad» Uładzimir Niaklajeŭ zajaŭlaŭ, što hramadzianskaja kampanija «Havary praŭdu!» budzie praciahnuta ŭ lubym vypadku. «U vypadku admieny rehistracyi „Ruchu napierad“ vyjście adno — zarehistravać novuju arhanizacyju. My zajmalisia hetym pytańniem jašče da sudovych pasiadžeńniaŭ, pakolki mierkavali nie lepšaje dla nas raźvićcio padziej», — havaryŭ Niaklajeŭ u žniŭni.

Na dumku ekśpiertaŭ, u suviazi ź likvidacyjaj «Ruchu napierad» prablem va Uładzimira Niaklajeva, jak pretendenta na pasadu prezidenta, uźniknuć nie pavinna.

Sprava ŭ tym, što pry padačy dakumientaŭ na rehistracyju svajoj inicyjatyŭnaj hrupy Niaklajeŭ u jakaści miesca pracy ŭkazaŭ mienavita hetuju ŭstanovu. Adnak, jak patłumačyŭ BiełaPAN ekśpiert u halinie vybarčaha zakanadaŭstva juryst Siarhiej Alfier, «admova ŭ rehistracyi moža adbycca tolki pa pryčynie padačy zaviedama niepraŭdzivych źviestak». Niaklajeŭ ža «zaviedama niepraŭdzivych źviestak» u CVK nie padavaŭ — jon ukazaŭ dakładnyja źviestki na toj momant, kali padavaŭ dakumienty na rehistracyju inicyjatyŭnaj hrupy. «Akramia taho, likvidacyja ŭstanovy — praces dastatkova doŭhi, i da jaho zakančeńnia Niaklajeŭ zastajecca dyrektaram «Ruchu napierad», — dadaŭ juryst.

• 0
• 0
• 0
• 0
• 0
• 0
• 0
• 0