Siamaška: Prapanova Rasii pa naftavych pošlinach — najhoršy varyjant dla Biełarusi

Prapanova Rasii pa admienie ŭvaznych pošlin na naftu dla Biełarusi ŭ abmien na viartańnie pošlin na naftapradukty źjaŭlajecca najhoršym varyjantam dla Biełarusi. Pra heta zajaviŭ 22 kastryčnika žurnalistam pieršy namieśnik prem'jer-ministra Biełarusi Uładzimir Siamaška.

Pryčym jon adznačyŭ, što hety varyjant «krychu lepšy, čym toj, što my majem ciapier».

Nahadajem, 21 kastryčnika ministr ekanomiki Biełarusi Mikałaj Snapkoŭ paviedamiŭ žurnalistam, što Biełaruś moža pahadzicca pieraličvać u rasijski biudžet 100% ekspartnych pošlin na naftapradukty ŭ abmien na admovu Rasii ad ekspartnych pošlin na naftu dla Biełarusi. «Jak my možam nie pahadzicca, kali ŭ asnovie hetaj temy lažać roŭnyja ŭmovy dziejnaści i realizacyi na ekspart nafty dla biełaruskich i rasijskich NPZ? My ŭdzielničajem u pieramovach pa hetym pytańni. Heta i jość toje, da čaho my imknulisia», — skazaŭ Snapkoŭ.

U svaju čarhu, Siamaška nie raskryŭ padrabiaznaści chodu pieramoŭ z Rasijaj pa pastaŭkach nafty. «My pakul nie padpisali pahadnieńnie, tamu što ličym jaho niespraviadlivym», — zajaviŭ jon. «Dla adzinaj ekanamičnaj prastory — nonsens uvodzić pošliny na hałošy, valonki, naftu i naftapradukty. Heta niespraviadliva», — ličyć Siamaška.

«My ž amartyzujem zavody, pierapracoŭvajem naftu i ŭsiu hetu ŭvaznuju pošlinu pavinny addać u biudžet Rasii? — zadaŭ pytańnie vice-premjer. — Nam heta [pierapracoŭka nafty] doraha dastajecca. U kožny zavod my ŭkładvajem 150–250 młn. dołaraŭ štohod dla ich raźvićcia».

Pavodle słoŭ Siamaški, takija inviestycyi pryviaduć da taho, što ŭžo ŭ 2013 hodzie Mazyrski i Navapołacki NPZ buduć pracavać z hłybinioj pierapracoŭki 92–93%.

«Heta aznačaje, što z adnoj tony nafty my budziem atrymlivać 920–930 kh śvietłych naftapraduktaŭ, jakija doraha kaštujuć», — skazaŭ pieršy vice-premjer.

«Kali ja adryvaju ad biudžetu, układvaju hrošy, daju zavodam ilhoty i prefierencyi, to čamu ja pavinien addavać hetu pošlinu», — zajaviŭ Siamaška.

«Kali rasijanie pastavili Biełarusi takija ŭmovy, što pastaŭlajuć niejkuju kolkaść nafty biaspošlinna, a lvinuju dolu — try čverci — z pošlinaj, to jakaja roźnica, dzie ciapier kuplać naftu», — skazaŭ jon.

Siamaška adznačyŭ, što, kali nafta była biaspošlinnaj, Biełaruś «adnaznačna kuplała» jaje ŭ Rasii. «Siońnia nas pastavili pierad alternatyvaj: kuplaj u Azierbajdžanie, Kazachstanie, Vieniesuele, Raterdamie. My ŭbačyli, što tam tańniej», — zajaviŭ jon.

Pry hetym vice-premjer adznačyŭ, što vieniesuelskaja nafta, jakaja ciapier pastaŭlajecca ŭ Biełaruś, bolš jakasnaja, čym rasijskaj. Tak, pry apracoŭcy rasijskaj nafty marki Urls atrymlivajecca 30% mazuty, jakaja tańniejšaja za samuju naftu. Vieniesuelskaja ž nafta «Santa Barbara» pry pierapracoŭcy daje 7–8% mazuty i bolš darahuju pradukcyju — bienzin, hazu, dyzpaliva. «Tamu ćviarozy rozum, ekanomika havorać ab tym, što my pavinny pierapracoŭvać toje, što vyhadna i razumna», — zajaviŭ Siamaška.

«My vyžyli ŭ hetaj situacyi pry dapamozie Vieniesueły», — ličyć jon. Pieršy vice-premjer paviedamiŭ, što ź vieraśnia biełaruskija NPZ zahružany na 100% i pracujuć rentabielna. «U dalejšym my budziem pracavać jašče lepš», — ličyć Siamaška.

Pra hatoŭnaść Rasii admovicca ad ekspartnych pošlin na naftu dla Biełarusi ŭ abmien na ŭsie pošliny, jakija Biełaruś budzie atrymlivać ad ekspartu svaich naftapraduktaŭ, zajaviŭ 19 kastryčnika namieśnik ministra finansaŭ RF Siarhiej Šatałaŭ.

«My chočam atrymać [kampiensacyju] ad Biełarusi. Pakul varyjant — heta značnaje pavyšeńnie pošlin na naftapradukty z tym, kab jany pieraličvali nam usie ekspartnyja pošliny na naftapradukty, jakija buduć vyvozicca ź Biełarusi», — skazaŭ Šatałaŭ.

Jon adznačyŭ, što ciapier staŭka pošlin na naftapradukty vyznačana na ŭzroŭni 55% ad pošliny na naftu. «Heta značyć my dacirujem naftapierapracoŭku [Biełarusi]. My nie chočam davać hetyja datacyi biełaruskim pradpryjemstvam», — padkreśliŭ namieśnik kiraŭnika Minfina.

Pavodle słoŭ Šatałava, staŭka pošlin na naftapradukty moža pavialičycca da 85–90% ad pošliny na syruju naftu ŭžo ŭ 2011 hodzie. «Sens u tym, kab pavialičyć u cełym ekspartnyja pošliny na naftapradukty nie tolki dla Biełarusi, ale i dla Rasii», — skazaŭ jon.

Ciapier Biełaruś kuplaje naftapradukty ŭ Rasii z vypłataj 100% pošliny. Z 1 kastryčnika staŭka ekspartnaj pošliny na śvietłyja naftapradukty składaje 191,8 dołara za tonu, na ciomnyja — 103,3 dołara. Pavodle danych Biełstata, za studzień-žnivień siaredniaja cana tony naftapraduktaŭ, zakuplenych u Rasii, pavialičyłasia na 78,6% u paraŭnańni z anałahičnym pieryjadam minułaha hoda.

Kala dźviuch tracin usioj zakuplenaj u Rasii nafty taksama impartujecca Biełaruśsiu z vypłataj 100% pošliny. Z 1 kastryčnika staŭka ekspartnaj pošliny na syruju naftu składaje 266,5 dołara za tonu. Za studzień-žnivień siaredniaja cana adnoj tony rasijskaj nafty pavialičyłasia ŭ paraŭnańni z anałahičnym pieryjadam minułaha hoda na 30,5%.

• 0
• 0
• 0
• 0
• 0
• 0
• 0
• 0