U spravie bandy Marozava pastaŭlena kropka. Za 16 zabojstvaŭ dy inšyja ciažkija złačynstvy vierchavody hrupoŭki adkažuć ŭłasnymi žyćciami, astatnija atrymajuć vialikija terminy źniavoleńnia.
U spravie bandy Marozava pastaŭlena kropka. Za 16 zabojstvaŭ dy inšyja ciažkija złačynstvy vierchavody hrupoŭki adkažuć ŭłasnymi žyćciami, astatnija atrymajuć vialikija terminy źniavoleńnia.
Likvidacyja homielskaj arhanizavanaj złačynnaj hrupoŭki, kiravanaj Siarhiejem Marozavym – najbolš hučnaja kryminalnaja sprava apošniaha času. Na łavu padsudnych trapiła paŭsotni čałaviek. Im zakidali zabojstvy, vykradańni ludziej, handal zbrojaj, rekiet. Kryminalnaja hrupoŭka, jakaja teraryzavała Homiel bolš za 10 hod, mieła nadziejnyja suviazi ŭ strukturach ułady. Były kiraŭnik Upraŭleńnia pa baraćbie z arhanizavanaj złačynnaściu i karupcyjaj UUS Homielskaha abłvykankamu pa vynikach sudu atrymaŭ 18 hadoŭ źniavoleńnia. U źviazku sa spravaj Marozava praciahvajecca śledztva ŭ dačynieńni da dvuch byłych namieśnikaŭ načalnika UUS vobłaści.
Adnak našumiełaja sprava pakidaje šmat pytańniaŭ. Praces prachodziŭ u zakrytym režymie na terytoryi SIZA Miensku. Aficyjna hetaja akaličnaść była patłumačanaja adsutnaściu adpaviednaha kolkaści padsudnych pamiaškańnia i pytańniami biaśpieki. Pry hetym dziaržaŭny telekanał ANT ščyra kanstatavaŭ: pra šmathadovyja źvierstvy «marozaŭcaŭ» viedali ŭsie. Ciapier i sapraŭdy ŭsie viedajuć pra padrabiaznaści stvareńnia i raźvićcia homielskaj hrupoŭki: pra tatalny rekiet biznesoŭcaŭ, zabojstvy kankurentaŭ i vypadkovych asobaŭ, sproby lehalizacyi «biznesu» i zroščvańnie z pradstaŭnikami miascovaj i respublikanskaj ułady. Pra źviaryny noraŭ kiraŭnika bandy Siarhieja Marozava, urešcie.
Niezaležnyja žurnalisty majuć svaje mierkavańni nakont pryčynaŭ zakrytaści pracesu.
Homielskaja žurnalistka Maryja Šymanoŭskaja ličyć, što taki praces musiŭ adbycca tolki ŭ Homieli. Kab mieścičy adčuli narešcie siabie abaronienymi, bo hetyja žudasnyja złačynstvy adbyvalisia mienavita ŭ «cichim» horadzie nad Sožam. Na dumku M.Šymanoŭskaj sprava zamoŭčvajecca praz zamiašanaść u joj milicejskich čynoŭ.
Specyjalist u žurnalisckich raśledavańniach Siarhiej Sacuk miarkuje što «marozaŭskaja» sprava razburaje mit pra stabilnaść biełaruskaha hramadztva. Prezydent hučna zajaviŭ pra kančatkovuju pieramohu dziaržavy nad arhanizavanym kryminalitetam. I tut robicca niemahčymym dalej chavać dzikuju złačynnaść u Homieli, udzielnikam hrupoŭki zakidajuć stvareńnie albo ŭdzieł u złačynnaj arhanizacyi (art.285 KK RB). Jak takoje mahło zdarycca ŭ roskvit biełaruskaj stabilnaści? Kali ŭsim usio było viadoma, to čamu šerah homielskich čynoŭnikaŭ, čyja karjera imkliva rasła ŭ časy staleńnia bandy Marozava, apynuŭsia ŭ vyniku pavyšeńnia ŭ stalicy? I čamu hetyja čynoŭniki maŭčać, pavinny ž być u kursie spravy pavodle słužbovych abaviazkaŭ? Naprykład, Leanid Hłuchoŭski, jaki doŭhi čas byŭ paŭnamocnym pradstaŭnikom prezydenta ŭ Homielskaj vobłaści i zajmaŭ vysokija pasady ŭ strukturach MUS Homielščyny, a paśla i Biełarusi. Jak i Anatol Kulašoŭ dy Alaksandar Rak, jakija peŭny čas zajmali vysokija milicejskija pasady ŭ homielskim abłvykankamie, a potym apynulisia ŭ Miensku.
Spadar Sacuk kanstatuje, što pieramoha nad «marozaŭcami» nie palepšyła sytuacyju ŭ Homieli. Pa jaho śviedčańniach, tam adbyvajecca imklivy pieradzieł vyzvalenaj terytoryi dy adnaŭlajucca najhoršyja kryminalnyja tradycyi – razborki, rekiet i h.d. U nastupnym hodzie padobnaja sprava ŭ dačynieńni da rečyckaj złačynnaj hrupoŭki, što dziejničała blizu 12 hod, budzie razhladacca ŭ homielskim abłasnym sudzie.
Prysud kiraŭnikam Marozaŭskaj hrupoŭki ahaliŭ jašče adzin aspekt – Biełaruś pa-raniejšamu zastajecca adzinaj eŭrapejskaj krainaj, dzie vykonvajucca śmiarotnyja pakarańni. Praktyka nieprazrystych pracesaŭ, kali na padsudnych mohuć pačapić što zaŭhodna, palityčnyja zabojstvy, naprykład, vyklikajuć niespakoj u pravaabaroncaŭ. Hary Pahaniajła nie vyklučaje takoha varyjantu, bo heta daje zručnuju mahčymaść kančatkova pachavać niazručnuju palityčnuju spravu.
❏
Apytańnie «NN»
Ci zasłuhoŭvali bandyty Marozava śmiarotnaje kary?
Pravaabaronca Michaił Pastuchoŭ: «Z adnaho boku hetaja banda za svaje žudasnyja złačynstvy zasłuhoŭvaje adpaviednaha pakarańnia. Tym nia mienš, liču nieabchodnym kiravacca eŭrapejskaj tradycyjaj, jakaja zabaraniaje śmierć u jakaści pakarańnia. Pryncyp – nie dziaržava daje čałavieku žyćcio, nie jana im i rasparadžajecca».
Pravaabaronca bačyć alternatyvaj śmiarotnamu pakarańniu pažyćciovaje źniavoleńnie, što było b abhruntavana i humanistyčna, i jurydyčna. Hałoŭnaj ža nahodaj dla admieny śmiarotnaha pakarańnia ŭ Biełarusi sp. Pastuchoŭ ličyć patencyjnuju niebiaśpieku h.zv. idealnych zabojstvaŭ, jakija, mahčyma, užo praktykujucca ŭ dačynieńni da palityčnych apanentaŭ. Tamu, na jaho dumku, admieny śmiarotnaha pakarańnia treba damahacca jak najchutčej.
Probašč hreka-katalickaje (unijackaje) parafii Śv.Jazepa a. Andrej Abłamiejka (Miensk) kaža, što kaścioł nie vystupaje naŭprost suprać śmiarotnaha pakarańnia. «Kožnaja asoba, jak tvareńnie Božaje, maje prava na abaronu ad hvałtu, jak i hramadztva – supolnaść ludzkaja, – taksama maje prava na abaronu ad złačyncaŭ, jakija mohuć być izalavanyja ŭ turmie i navat pakaranyja śmierciu. Ale heta takoje ahulnaje tłumačeńnie» – zaznačaje a. Abłamiejka. Kožny kankretny vypadak patrabuje indyvidualnaha i ŭzvažanaha padychodu, miarkuje śviatar.
Śviatar pravasłaŭnaj Śviata-Ŭładzimierskaj carkvy a.Alaksandar Vielisiejčyk (Horadnia) ličyć śmiartnaje pakarańnie dylemaju, što staić pierad sučasnym hramadztvam ad časoŭ kniazia Ŭładzimiera. Kirujučysia zapaviedździu «Nie zabi», dałučany carkvoju da liku śviatych, kniaź paŭstaŭ pierad vybaram: karać ci nie karać śmierciu rabaŭnikoŭ, što teraryzavali kijeŭskija šlachi. Peŭny čas jon nie zabivaŭ lichadziejaŭ, až pakul ich stała niepamysna šmat i pakul nie aburylisia japiskapy. Jany źviarnulisia da Ŭładzimiera sa słovami apostała Paŭła, sens jakich u nastupnym: načalnik – heta božy słuha, jaki niedaremna nosić mieč u pakarańnie tym, chto robić złoje. Z taho času śviaty Ŭładzimier iznoŭ pačaŭ karać śmierciu lichadziejaŭ, ale rabiŭ heta jak načalnik nad ludźmi, hramadzianskaja asoba. Na dumku a.Alaksandra, pytańnie śmiarotnaha pakarańnia naležyć vyrašać u pieršuju čarhu hramadztvu.
Kamientary