Błohier Budzimir abviaściŭ biesterminovuju haładoŭku
Jon patrabuje vyzvaleńnia palitviaźniaŭ.
Viadomy błohier Dźmitry Hałko (budzimir) abviaściŭ biesterminovuju haładoŭku, patrabujučy vyzvaleńnia palitviaźniaŭ.
30 sakavika ŭ svaim błohu były pazaštatny supracoŭnik «Radyjo Svaboda» Dźmitry Hałko, viadomy pad imiem Budzimir, raspačaŭ biesterminovuju haładoŭku pratestu, patrabujučy vyzvaleńnia palitviaźniaŭ. «Nie mahu pa-raniejšamu pasiŭna nazirać za palityčnym biaźmiežžam, što isnuje ŭ majoj krainie, abmiažoŭvajučysia ščoŭkańniem dziubaj u žeže», — napisaŭ jon u svaim błohu.
Zajavu Budzimira ŭ bajnecie sustreli pa-roznamu. Błohier pessimist2006 nazvaŭ Budzimira śmiarotnikam, zaklikaŭšy internaŭtaŭ davieści da šyrokaha koła ludziej, najpierš da ŭładaŭ usiu surjoznaść situacyi.
«Uličvajučy, što hetuju zbroju słabych da jaho ŭ Biełarusi apašlili i pieratvaryli ŭ błaźnicu ŭsialakija błazny i vyradki — jon śmiarotnik. Kab davieści, što jon nie błazan — jamu daviadziecca pamierci.Adzinaje, što my možam zrabić u hetaj situacyi — heta davodzić da ŭsich (i asabliva da ŭładaŭ), što jon nie žartuje. I što hatovy pamierci za svajo patrabavańnie. Heta adziny šaniec vyratavać jamu žyćcio», — piša pessimist2006. Jaho zaklik padchapili biełaruskija błohiery, pačaŭšy pieradrukoŭvać u svaich dziońnikach infarmacyju pra ŭčynak Budzimira.
U kamientarach da svajho dopisu Budzimir kaža, što jaho natchniła irłandskaja haładoŭka 1981 h. U hutarcy z karespandentam «Našaj Nivy», błohier paćvierdziŭ, što jon nasamreč surjozna nastrojeny iści da kanca. Ciapier jon znachodzicca doma, haładoŭku trymaje mokruju, bo suchaja heta «zanadta chutka».
Jon raskazaŭ, što pakul nie ahučvaŭ svaju akcyju pa-za błoham.
«Zaraz ja źbirajusia kankretyzavać svaje patrabavańni, zvuzić ich da niejkaha peŭnaj prablemy. Tym bolš, što zaraz raspačaŭ haładoŭku Mikita Lichavid. Ja dumaju, što dałučusia da jaho i budu patrabavać jaho vyzvaleńnia».Budzimir miarkuje, što adnačasovaja haładoŭka niekalkich čałaviek daść bolš plonu.
Błohier pryznaje, što dyskredytacyja haładoŭki ŭ Biełarusi, jak sposabu pratestu — heta amal miedyčny fakt. Ale reziervy jašče jość, jak i prykłady taho, što častkova haładoŭka, jak akcyja pratestu, daje mahčymaść dasiahnuć čakanaha efiektu. Budzimir pry hetym pryvodzić prykłady haładoŭki viernikaŭ carkvy «Novaje žyćcio» ŭ 2006 hodzie i kandydata ŭ prezidenty Alaksandra Kazulina ŭ časie źniavoleńnia ŭ kałonii.
«Maja pieravaha ŭ tym, što ja nie palityk. Mianie ciažka źvinavacić u imknieńni pryciahnuć takim čynam da siabie ŭvahu»,— padkreśliŭ Budzimir.
Dźmitry Hałko naradziŭsia ŭ 1979 h. u Minsku. 19 śniežnia 2010 h. uziaŭ udzieł u akcyi pratestu, byŭ zatrymany i adsiadzieŭ 10 sutak administracyjnaha aryštu. 25 sakavika ŭ svaim błohu paviedamiŭ pra sychod z «Radyjo Svaboda», dzie pracavaŭ pazaštatna ahladalnikam biełaruskich błohaŭ.
Ciapier čytajuć
Babaryka zajaviŭ pra viartańnie ŭ palityku i nazvaŭ vinavataha ŭ tym, što źmieny nie adbylisia ŭ 2020-m15
Babaryka zajaviŭ pra viartańnie ŭ palityku i nazvaŭ vinavataha ŭ tym, što źmieny nie adbylisia ŭ 2020-m
Dzieci źlizvali z brudnaj padłohi pralitaje małako. Jakoj pabačyŭ zamiežnik Biełaruś, spustošanuju rasijskimi i šviedskimi vojskami ŭ čas Paŭnočnaj vajny1111
Kamientary