Staršynia chakiejnaj fiederacyi: Zarobki chakieistaŭ zavyšanyja

Nieracyjanalnaje vykarystańnie vyłučajemych dziaržavaj srodkaŭ pryviało da kryzisu ŭ junackim i maładziožnym chakiei Biełarusi. Takoje mierkavańnie, pa paviedamleńni BiełTA, vykazaŭ 20 maja na sumiesnym pasiedžańni vykankamaŭ Nacyjanalnaha alimpijskaha kamiteta i Fiederacyi chakieja Biełarusi (FCHRB), a taksama kalehii Ministerstva sportu i turyzmu staršynia FCHRB Jaŭhien Vorsin.

«Ciapierašni dziki pierakos u apłacie pracy hulcoŭ ekstralihi ad trenieraŭ dziciačych škoł niedapuščalny. Naš chakiejny rynak štučna pieraacenieny. Šmatlikija chakieisty atrymlivajuć niezasłužana vysokija zarpłaty, jakija nie adpaviadajuć uzroŭniu majsterstva. I takoje nieracyjanalnaje vykarystańnie dziaržaŭnaj padtrymki pryviało da kryzisu junackaha i maładziožnaha chakieja».

Jaŭhien Vorsin taksama zaniepakojeny tym, što siarod kłubaŭ ekstralihi nazirajecca vialikaje rassłajeńnie ŭ płanie finansavaha dabrabytu kłubaŭ:

«Tolki 5 kłubaŭ (žłobinski „Mietałurh“, salihorski „Šachcior“, „Homiel“, hrodzienski „Nioman“ i minskaje „Junactva“) pracujuć na miažy ŭstalavanaj stoli zarpłat. U toj ža čas navapołacki „Chimik-SKA“, „Viciebsk“, „Brest“, „Mahiloŭ“ mohuć sabie dazvolić vyłučać na zarpłaty hulcoŭ u miežach 40–69% ustalavanaha limitu, kali, viadoma, tut niama niejkich cieniavych schiemaŭ. I ŭ hetaj situacyi atrymlivajecca, što pracujuć hrošy, a nie mazhi trenieraŭ. Masavaje nabyćcio lehijanieraŭ — heta tupikovy šlach, bo zamiežniki nie dapamohuć našaj nacyjanalnaj zbornaj.

Chakieju, jak nijakamu inšamu vidu sportu, u našaj krainie ŭ apošnija hady nadavałasia vielmi šmat uvahi, adnak vynikam 10-letniaj, jak zdavałasia, karpatlivaj pracy staŭ vynik, jaki nie paddajecca łohicy. Zaniaŭšy 14 miesca na pieršynstvie płaniety, nacyjanalnaja zbornaja apuściłasia ŭ suśvietnym rejtynhu na 11 miesca. Heta samy nizki pakazčyk z 2003 hoda, kali kamanda pakidała elitny dyvizijon. Naša junackaja zbornaja pavinna była zmahacca za vyjście ŭ elitu, a ŭ vyniku apuściłasia, u sutnaści, u treci pa ranhu dyvizijon, minimum na dva hady adkłaŭšy viartańnie ŭ kłas samych mocnych. Maładziožnaja zbornaja na chatnim čempijanacie śvietu ŭ Babrujsku prajhrała ŭ vyrašalnym matčy Łatvii i 5 hod zapar zastajecca za bortam elity. Choć, pakłaŭšy ruku na serca, navat kali b „maładziožka“ vyjšła ŭ najmocny dyvizijon, to naŭrad ci tam zamacavałasia choć na hod.

Vytoki ŭ dziciačym chakiei, heta zrazumieła, ale prablema nie tolki tam. Letaś pačali stvareńnie instytuta zbornych kamand na bazie respublikanskaha centra alimpijskaj padrychtoŭki ŭ Raŭbičach, dzie na stałaj asnovie pracuje junackaja zbornaja siarod dziaciej 1994–95 hadoŭ naradžeńnia. Chutka buduć sfarmavany anałahičnyja kamandy i ŭ bolš małodšych uzrostach. Heta pravilny šlach, ciapier pra padobnyja kroki zahavaryli taksama ŭ Rasii. Ale nam abaviazkova treba vyrašyć pytańni finansavańnia hetaha prajekta, ciapier tut šmat niavyrašanych pytańniaŭ. Ale heta šlach, jaki daść svaje płady ŭžo chutkim časam — u 2012–2013 hadach».

Staršynia FCHRB pakazaŭ na nieabchodnaść racyjanalnaha i efiektyŭnaha vykarystańnia srodkaŭ, ale razam z tym vykazaŭ mierkavańnie, što bieź dziaržpadtrymki chakiej nie vyžyvie:

«Ekanamičnaja depresija nakryje prynamsi kožny druhi kłub, a ŭvieś naš chakiej pieratvorycca ŭ amatarski. Treba raspracavać razumnuju i efiektyŭnuju formułu finansavańnia i zrabić usio, kab adpaviedny ŭkaz hałavy dziaržavy byŭ padpisany jašče ŭ pieršym paŭhodździ, pakolki aktyŭnaja praca pa padrychtoŭcy na nastupny siezon viadziecca ŭžo ciapier».

• 0
• 0
• 0
• 0
• 0
• 0
• 0
• 0