Alaksandr Łukašenka nie suprać pryvatyzacyi. Prodaž dziaržpradpryjemstvaŭ patrebny, ale tanna ich nichto nie pradaść, zajaviŭ jon napres-kanfierencyi 17 červienia.
Naprykład, «Biełaruśkalij», pavodle jaho słoŭ, kaštuje 30 młrd. dołaraŭ, rentabielnaść tam składaje 70–100%. «Hetaje pradpryjemstva ŭ lepšyja hady prynosiła 3,5 młrd. dołaraŭ valutnaj vyručki, — adznačyŭ Łukašenka. — Siońnia havorać: pryvatyzuj jaho, MAZ, BiełAZ, naftapierapracoŭku, samyja lepšyja pradpryjemstvy. Niekatoryja razumiejuć reformy ŭ tym, kab pradać dziaržpradpryjemstvy pryvatnikam, ale za małuju canu, i jany buduć bolš efiektyŭnymi».
Kali pryvatnikam pradpryjemstva dastaniecca zadarma, jon nie budzie śpiašacca ŭkładvać u jaho raźvićcio srodki, pierakanany prezident.
Pry hetym jon adznačyŭ, što hatovy pryvatyzavać «Biełaruśkalij» pry ŭmovie jaho raźvićcia, zachavańnia pracoŭnaha kalektyvu i pavyšeńnia zarabotnaj płaty i sacyjalnaj abarony.
Kali ŭ inviestaraŭ niama srodkaŭ na kuplu ŭsiaho pradpryjemstva za 30 młrd. dołaraŭ, skazaŭ Łukašenka, jon hatovy pradać častku akcyj.
Što da raźvićcia vytvorčaści, to, pavodle słoŭ kiraŭnika dziaržavy, nieabchodna raźvivać haliny, «jakija dastalisia ź minułaha». «Kali ŭ nas jość hetyja resursy, nietry, kalij, sol, nafta, kali my možam ich pierapracoŭvać i na rynku jość na ich popyt, — na kalijnyja ŭhnajeńni, na drevaapracoŭku, — ich treba raźvivać, pavoli raźvivać», — skazaŭ Łukašenka.
Dla stvareńnia novych pradpryjemstvaŭ, adznačyŭ jon, patrebny dziesiacihodździ i niemałyja hrošy. «Naša praktyka i palityka zasnoŭvajecca na tym, što nam histaryčna dastałasia, ničoha nie źniščać, treba iści napierad, raźvivajučy hetyja kirunki, navat z peŭnymi stratami», — padkreśliŭ Łukašenka.
Kamientary