Pakul Iłan Mask raspracoŭvaje čyp Neuralink, Kitaj abyšoŭ jaho ŭ hetaj technałohii
U Kitai całkam paralizavany mužčyna pačaŭ pracavać i kiravać robatami siłaj dumki — dziakujučy biespravadnoj sistemie, jakuju ŭžyvili ŭ jaho mozh.
Jak piša vydańnie Interesting Engineering, śpiecyjalisty Centra pieradavoha vopytu ŭ halinie navuki ab mozhu i intelektualnych technałohij Kitajskaj akademii navuk paviedamili, što z dapamohaj ich inavacyjnaj raspracoŭki poŭnaściu paralizavany čałaviek zmoh znoŭ uzajemadziejničać z navakolnym śvietam.
Hałoŭnym hierojem daśledavańnia staŭ mužčyna, jakoha daśledčyki nazyvajuć «spadar Čžan», jaki ŭ 2022 hodzie ŭ vyniku padzieńnia atrymaŭ surjoznuju traŭmu pazvanočnika. Traŭma pakinuła jaho całkam paralizavanym, z zachavańniem ruchomaści tolki ŭ vobłaści hałavy i šyi. Paśla doŭhaha pieryjadu biezvynikovaj reabilitacyi Čžan pahadziŭsia na ekśpierymient.
Sioleta ŭ červieni ŭ adnoj z balnic Šanchaja mužčynie ŭžyvili ŭ mozh biespravadnuju sistemu WRS01. Jana składajecca z malusieńkich datčykaŭ z hnutkimi elektrodami, jakija ŭvodziacca ŭ mozh, i mikračypa, raźmieščanaha ŭ pahłybleńni čerapa.
Dla pracy pryłady Čžan nosić śpiecyjalna raspracavany kapialuš, jaki zabiaśpiečvaje biespravadnoje siłkavańnie impłanta i sčytvaje impulsy jaho mozhu. Takaja schiema dazvalaje abyścisia biez pravadoŭ, jakija vychodziać praz skuru, što značna biaśpiečniej dla zdaroŭja i pazbaŭlaje ad nieabchodnaści ŭžyŭlać unutranyja batarejki.
Jak adznačaje vydańnie, hety navukovy praryŭ šmat u čym pieraklikajecca z kancepcyjaj Telepathy prajekta Neuralink Iłana Maska, adnak kitajskim daśledčykam atrymałasia prasunucca dalej u praktyčnym prymianieńni.
U toj čas jak amierykanskija vyprabavańni pakul zasiarodžanyja na bazavych zadačach, takich jak videahulni ci prostyja kamunikacyi, kitajskaja sistema ŭžo intehravanaja ŭ paŭsiadzionnaje žyćcio i prafiesijnuju dziejnaść.
Vyniki trenirovak akazalisia ŭražvalnymi: usiaho praz dva-try tydni trenirovak mužčyna navučyŭsia kiravać kursoram kampjutara siłaj dumki i ŭładkavaŭsia stažoram u kampaniju, jakaja zajmajecca handlovymi aŭtamatami. U jaho zadaču ŭvachodzić dystancyjna paćviardžać vydaču tavaraŭ.
Akramia pracy, mužčyna atrymaŭ značnuju aŭtanomiju ŭ pobycie. Navukoŭcy padklučyli da interfiejsu i fizičnyja abjekty. Ciapier Čžan moža karystacca razumnym invalidnym vazkom, jaki dazvalaje jamu pieramiaščacca pa vulicy i navat samastojna spuskacca pa leśvicy. Taksama jon kamanduje robatami-sabakami, zdolnymi prynosić jamu ježu.
Daśledčyki padkreślivajuć, što taki pośpiech staŭ mahčymym dziakujučy raźvitaj technałahičnaj ekasistemie Kitaja, jakaja ŭklučaje sietki 5G i 6G, vytvorčaść paŭpravadnikoŭ i prasunutuju robatatechniku.
Navukoŭcy adznačajuć, što sistema pracuje nadzvyčaj chutka: zatrymka pamiž impulsam mozha i reakcyjaj techniki składaje mienš za 100 milisiekund, što navat chutčej za pryrodnuju reakcyju čałavieka.
Pry hetym u chodzie vyprabavańniaŭ zaŭvažyli niezvyčajny efiekt: mozh pacyjenta pastupova «pryvyk» da interfiejsu i staŭ pracavać bolš efiektyŭna. Kali napačatku dla vykanańnia dziejańnia patrabavałasia praca vialikaj kolkaści niejronaŭ, to z časam za spravu ŭziałasia tolki vuzkaja hrupa kletak. Heta značyć, što z kožnym dniom kiravańnie stanovicca dla mužčyny bolš naturalnym i patrabuje ŭsio mienš razumovych namahańniaŭ.
Zaraz kitajskija daśledčyki rychtujuć da vyprabavańniaŭ nastupnuju viersiju čypa WRS02 z 256 kanałami suviazi. Jany spadziajucca, što pavieličeńnie mahutnaści pryłady dazvolić u budučyni nie tolki kiravać technikaj, ale i dapamoža paralizavanym ludziam «ahučvać» svaje dumki naŭprost praz kampjutar, navat kali jany całkam stracili mahčymaść havaryć.
Ciapier čytajuć
Žonka adhavorvała padpałkoŭnika DFR brać chabary, a toj kazaŭ: «Atrymaju pałkoŭnika — i na piensiju». Pieršaja piensija pryjšła ŭžo na aryštancki rachunak12
Žonka adhavorvała padpałkoŭnika DFR brać chabary, a toj kazaŭ: «Atrymaju pałkoŭnika — i na piensiju». Pieršaja piensija pryjšła ŭžo na aryštancki rachunak
Topavy pierakładčyk pajechaŭ u Biełaruś mianiać pašpart — i sieŭ za danaty. «KDB pahladzieŭ na sumu i vyrašyŭ, što nichto ŭ zdarovym rozumie nie moža vydatkavać stolki ŭłasnych hrošaj»1515
Kamientary