«Łuka tut nie žyvie. Vybuch...»

15 lipienia sud Centralnaha rajona Homiela pačaŭ razhlad administracyjnaha pratakoła, składzienaha milicyjanierami na siabra Abjadnanaj hramadzianskaj partyi piensijaniera-milicyjanta Uładzimira Niapomniaščych. Jaho abvinavačvajuć u tym, što 31 maja jon zrabiŭ nadpis «Łuka tut nie žyvie. Vybuch…» na papieradžalnym płakacie pra padazronyja pradmiety va ŭniviermahu «Homiel».

Na sudzie Niapomniaščych zajaviŭ, što takija płakaty pałochajuć ludziej i siejuć strach u hramadstvie. «Terakt u minskim mietro raskryty, złačyncy ŭstanoŭleny, navošta ŭvieś čas pałochać ludziej? U mianie daŭno śviarbieli ruki — zrabić nadpis na płakacie, kab niejak supakoić hramadzian. Ja chacieŭ napisać tak: „Łuka tut nie žyvie, vybuchi rabić niama kamu, śpicie spakojna“, ale nie dapisaŭ da kanca, bo mnie heta nie dała zrabić namieśnik dyrektara ŭniviermaha pa ideałahičnaj pracy», — rastłumačyŭ na sudzie Niapomniaščych.

Jon ličyć, što nie ŭčyniaŭ drobnaje chulihanstva, bo hramadski paradak parušany nie byŭ. «Moža, ja pryčyniŭ materyjalnuju škodu milicyi za sapsavany listok papiery, dyk ja mahu kampiensavać jaje. Tym bolš užo paŭtara miesiaca prajšło z taho času, ale novy listok-papiaredžańnie pra padazronyja pradmiety tak i nie źjaviŭsia. Značyć, nikomu hety płakat i nie patrebny», — ličyć aktyvist.

Sudździa Alena Całkova pieraniesła pasiadžeńnie na 29 lipienia dla vykliku śviedak.

Niapomniaščych nieadnarazova zatrymlivaŭsia milicyjaj za nadpisy na majcy «Za Biełaruś biez Łukašenki», «19.12.2010 Kryvavaja niadziela» i «Dałoŭ fašyzm!». 6 lipienia, paśla čarhovaha zatrymańnia, jaho sudzili nibyta za zakliki na Pryvakzalnaj płoščy da masavaha mierapryjemstva. Na sudzie suprać Niapomniaščych śviedčyŭ navukovy supracoŭnik Biełaruskaha dziaržaŭnaha ŭniviersiteta transpartu, jaki zajaviŭ, što jamu nie spadabaŭsia nadpis na majcy Niapomniaščych «Dałoŭ fašyzm!».

Aktyvist nakiravaŭ zvarot kiraŭnictvu BiełDUT, u jakim zapatrabavaŭ tłumačeńniaŭ, ci pracuje ŭ ich taki supracoŭnik i čamu ŭ navučalnaj ustanovie pracujuć ludzi, jakija pavažajuć fašyzm. «Na jakim uzroŭni ŭ VNU ideałahičnaja praca? Čamu mohuć navučyć studentaŭ takija supracoŭniki?» — zapytaŭsia Niapomniaščych.

Z univiersiteta aktyvist atrymaŭ adkaz, što taki supracoŭnik pracuje ŭ VNU i charaktaryzujecca stanoŭča.

Niapomniaščych byŭ aštrafavany na 10 bazavych vieličyń.

• 0
• 0
• 0
• 0
• 0
• 0
• 0
• 0