Akcyja ŭ Breście: Dziasiatki čałaviek, apładysmienty i adzinkavyja zatrymańni
Karespandent «Briestskoj haziety» Stanisłaŭ Koršunaŭ pieradaje ź miesca padziejaŭ.
U hety raz čarhovaja niesankcyjanavanaja «maŭklivaja» akcyja prachodzić u Breście nie na płoščy Lenina, a kala kinateatra «Biełaruś». Karespandent «Briestskoj haziety» Stanisłaŭ Koršunaŭ pieradaje ź miesca padziejaŭ.
18.29
Stanisłava Koršunava na rahu vulic 17-ha vieraśnia i Budzionnaha spyniŭ milicejski kardon. Da kinateatra jaho nie prapuścili, tak jak u redakcyjnym zadańni była vyjaŭlena niedakładnaść: stajała staraja data — 13 lipienia. Pryjšłosia terminova vypraŭlać zadańnie. Vypravili i advieźli.
18.38
Naš karespandent padyšoŭ da miesca praviadzieńnia akcyi. Kala kinateatra «Biełaruś» niešmatludna. Ludziej, jakija pryjšli na akcyju, ciažka adroźnić ad tych, chto prosta pryjšoŭ adpačyć na Savieckuju. U hałoŭnaha ŭvachodu ŭ kinateatr z boku vuł. Savieckaj kala 25 čałaviek.
Na vulicy 17-ha vieraśnia naš karespandent zaŭvažyŭ 1 aŭtazak, 1 śpiecaŭtobus i 2 UAZika.
18.44
Kala kinateatra cicha i niešmatludna. Ništo nie kaža ab tym, što tut budzie akcyja. U kinateatry 4 supracoŭnika milicyi ŭ formie, ale bejdžaŭ u ich nie vidać. Pa słovach Stanisłava, nie było bejdžaŭ i ŭ supracoŭnikaŭ milicyi, jakija spynili jaho na padychodzie da kinateatra.
18.58
Jak pieradaŭ Stanisłaŭ Koršunaŭ, źjaviłasia infarmacyja, što na padychodzie da vulicy Savieckaj zatrymali aktyvista AHP Marata Nieściarenku i žurnalistku Alisu Pol dla vyśviatleńnia asoby.
19.05
Kala «Biełarusi» kala 30 čałaviek. Vakoł kinateatra stajać supracoŭniki milicyi.
19.15
Situacyja nie mianiajecca. Kala 30 čałaviek stajać la hałoŭnaha ŭvachodu. Nie plaskajuć. Za tym, što adbyvajecca nazirajuć supracoŭniki milicyi.
19.18
Naš karespandent źviazaŭsia pa telefonie z Alisaj Pol. Jana raspaviała, što na padychodzie da kinateatra «Biełaruś» ich spynili supracoŭniki milicyi z patrabavańniem pradjavić dakumienty. Alisa i Marat Nieściarenka pradjavili pašparty. Tym nie mienš ich praviali ŭ Leninski RAUS. Pa słovach žurnalistki, akramia ich, u Leninskim RAUS znachodzicca Alaksiej Koŭtun, moładzievaje kryło BSDP (H).
19.30
Udzielniki akcyi zaplaskali. Milicyja pakul nijak nie adreahavała. Ludzi pačynajuć razychodzicca.
Jak stała viadoma, u 19.10 na vulicy Bresckich dyvizij byŭ zatrymany Źmicier Šurchaj, aktyvist arhkamiteta pa stvareńni BCHD.
19.39 Akcyja zaviaršyłasia.
Kamientary