«Zdymu žyllo za paŭcany ad rynkavaj»

Dziaržaŭnaje žyllo, usie kvatery jakoha buduć zdavacca ŭ arendu, płanujecca pabudavać u mikrarajonie «Vulka-3». «Heta budzie 9-paviarchovy80-kvaterny dom, pabudavany z vykarystańniem novaj sieryi ścienavych panielaŭ i pierakryćciaŭ, vypusk jakich u 2011 hodzie asvoiŭ zavod KKD pradpryjemstva «Brestžyłbud», — kaža namieśnik staršyni Bresckaha harvykankama Vasil Kavalčuk. Pavodle jaho słovaŭ, kvatery ŭ hetym domie buduć adna- i dvuchpakajovyja. Heta značyć, mienavita tyja, jakija ciapier na rynku žylla bolš za ŭsio zapatrabavanyja.

Dziaržaŭnaje arendnaje žyllo ŭ Biełarusi zaklikanaje vyrašyć dźvie važnyja zadačy.

Asabliva ciapier, kali abjomy budaŭnictva žylla z pryciahnieńniem ilhotnych kredytaŭ istotna skarociacca. Miarkujecca, što arandavać žyllo ŭ dziaržavy budzie našmat tańniej, čym u «pryvatnika». Pytańnie: nakolki tańniej?

Pad kaniec 2011 h. Saviet ministraŭ RB pryniaŭ pastanovu № 1739, jakoj ustalavanaja bazavaja staŭka płaty za karystańnie žyłymi pamiaškańniami kamiercyjnaha vykarystańnia dziaržaŭnaha žyllovaha fondu. Jana składaje 0,2 bazavaj vieličyni za 1 kv. mietr ahulnaj płoščy žyłoha pamiaškańnia ŭ miesiac.

Nahadajem: z 1 krasavika 2012 bazavaja vieličynia ŭ Biełarusi składzie 100 000 rubloŭ. Heta značyć, płata za arendnaje žyllo budzie vyznačacca z raźliku 20 000 rubloŭ za kv. m ahulnaj płoščy z ulikam kaeficyjentaŭ, jakija vyznačać abłvykankamy. Kali pryniać kaeficyjent za 1, to płata za arendu kvatery płoščaj 40 m kv. składzie 800 tysiač rubloŭ u miesiac (krychu bolš za 90 dalaraŭ pa ciapierašnim kursie).

Pavodle infarmacyi ahienctva nieruchomaści «Alfa-aktyŭ», ciapier u Breście arenda adnapakajovaj kvatery (bieź jeŭraramontu i darahoj mebli) pačynajecca ad 120 dalaraŭ u miesiac. U Minsku — ad 200 u.a. Značyć,

kab u Breście arendnaje žyllo było pa-sapraŭdnamu pryvabnym dla kvateranajmalnikaŭ, karektavalny kaeficyjent pavinien być prykmietna nižejšy za adzinku.

Pry dvajnoj roźnicy ŭ košcie arenda kvater u dziaržaŭnym kamiercyjnym žyłym fondzie biezumoŭna budzie zapatrabavanaj, i popyt moža ŭ razy pieravysić prapanovu. Adnak u adpaviednaści z ukazam № 512 ad 8 listapada 2011 h. «Ab niekatorych pytańniach vykarystańnia dziaržaŭnaha žyllovaha fondu», pieršačarhovaje prava na arendu takich kvater budzie naležać hramadzianam, jakija stajać na ŭliku tych, chto maje patrebu ŭ palapšeńni žyllovych umovaŭ, i tolki zatym — inšym achvotnikam.

«Pałažeńnie ab paradku pradstaŭleńnia arendnaha žylla jašče raspracoŭvajecca. Nie vyklučana, što takoje žyllo budzie ŭ pieršuju čarhu davacca maładym śpiecyjalistam, jakija pryjazdžajuć u naš horad i ŭ jakich Brest adčuvaje vostruju nieabchodnaść. Da prykładu, daktaram abo spartovamu trenierskamu składu», — tłumačyć namieśnik mera Bresta.

U adpaviednaści z ukazam prezidenta, damova najmu moža zaklučacca na termin nie bolš za piać hadoŭ, i paśla jaje zakančeńnia najmalnik kvatery maje pieršačarhovaje prava na padaŭžeńnie damovy. Miarkujecca, što za hety čas najmalnik (da prykładu, małady śpiecyjalist) zmoža pabudavać ułasnaje žyllo.

U pačatku novaha hoda BiełTA sa spasyłkaj na krynicy ŭ Minarchitektury raspaŭsiudziła infarmacyju, što na budaŭnictva arendnaha žylla ŭ Bresckaj vobłaści budzie vydzielena 25 młrd rubloŭ ź miascovaha biudžetu. Adnak u kamitecie pa architektury i budaŭnictvie abłvykankama nazyvajuć ličbu 20 młrd rubloŭ. Heta taja suma, jakaja ciapier praduhledžanaja ŭ abłasnym biudžecie.

Prystupić da ŭźviadzieńnia 80-kvaternaha arendnaha doma padradčyk zmoža paśla zaćvierdžańnia hrafikaŭ budaŭnictva. Astatnija pytańni, u tym liku ab paradku pradstaŭleńnia žylla i pamiery arendnaj płaty, jašče buduć raspracoŭvacca i abmiarkoŭvacca. Nie vyklučana taksama, što ŭ razrad kamiercyjnaha žylla buduć pieraviedzienyja niekatoryja svabodnyja abo vyzvalenyja kvatery, jakija znachodziacca ŭ dziaržaŭnaj ułasnaści.

• 0
• 0
• 0
• 0
• 0
• 0
• 0
• 0