Ihar Varaškievič: «Abrydła biehać pa dvarach»

Lider hurtu «Krama» padzialiŭsia svaimi dumkami z nahody admovy adździełu kultury Mienharvykankama na praviadzieńnie solnaha kancertu hurta, a taksama patłumačyŭ pryčynu svajoj adsutnaści na «Rok‑Karanacyi»: «Ja adłučyŭ pałovu biełaruskich telekanałaŭ na svaim televizary, adnak usio roŭna davodzicca bačyć reklamu jakoha turne Anžaliki Ahurbaš – usie takija ščaślivyja, pracujuć, hrajuć, a «Krama», jakaja ŭsio svajo žyćcio addała rok‑n‑rołu, nikomu nie patrebnaja». Sytuacyju z zabaronaj kancertu «Kramy» kamentuje načalnik adździełu kultury Mienharvykankama Ŭładzimier Ancypovič.

«Krama» ŭžo niekalki miesiacaŭ rychtuje svaju novuju prahramu, jakuju planavała prezentavać u bližejšy čas. «Kankretnaj daty nie było, — tłumačyć Ihar Varaškievič. – Chacieli zrabić kancert nie ŭ maleńkim klubie, a ŭ zali na čałaviek 300‑500 i tamu źviarnulisia pa dazvoł u Mienharvykankam, bo biaź ich zhody pravieści vystup nielha». Dva tydni muzyki čakali rašeńnia kiraŭnika adździełu kultury Ŭładzimiera Ancypoviča: «Adrazu nam nie admovili, ale potym skazali: anijakich tam «kramaŭ» i «varaškievičaŭ z kampanijaj» taksama». Ciapier u nieaficyjnym śpisie zabaronienych muzykaŭ fihurujuć nia tolki nazvy asobnych hurtoŭ, jakim niepažadana davać dazvoł na vystup, ale i kankretnyja proźviščy lideraŭ viadučych ajčynnych rok‑kamand.

Ihar Varaškievič, jaki pačaŭ zajmacca muzykaj jašče za časami Brežnieva‑Andropava, nia vielmi ździŭlajecca siońniašniamu stanu rečaŭ: «Dziŭnaha tut ničoha niama, ale nastolki mnie hetaja «adliha» abrydła. Ja adłučyŭ pałovu biełaruskich telekanałaŭ na svaim televizary, adnak usio roŭna davodzicca bačyć reklamu jakoha turne Anžaliki Ahurbaš – usie takija ščaślivyja, pracujuć, hrajuć, a «Krama», jakaja ŭsio svajo žyćcio addała rok‑n‑rołu, nikomu nie patrebnaja. Jak sabaki musim pa dvarach biehać. Prosta brydka ad usiaho».

Prychilnikam «Kramy» Ihar Varaškievič abiacaje, što jany pačujuć novyja pieśni hurta, praŭda nieviadoma dzie, kali, na jakoj aparatury. Svoj novy albom muzyki chacieli spačatku nazvać na naźvie adnoj ź piesień — «Mein Faterland, auf wiedersehen». Potym nazvu dysku źmianili na «Usio žyćcio – dziŭny son». «Ciapier mnie chočacca jaho iznoŭ nazvać, jak planavałasia pieršapačatkova», — ź nieviasiołaj ironijaj kaža Ihar Varaškievič.

Lider «Kramy» taksama prakamentavaŭ svaju admovu ŭdzielničać u sioletniaj cyrymonii «Rok‑Karanacyja». Planavałasia, što muzyka vyjdzie na scenu, kab vykanać adnu z hałoŭnych piesień minułaha hodu – «Aŭtabijahrafija» z prajektu «Salidarny ź Biełaruśsiu»: «Kab na mianie nichto nie kryŭdziŭsia, chaciełasia by paraić dyrektaru «Kłass Kłuba» Hienadziu Šulmanu. Choć jon i zajmajecca vyklučna hrašyma, možna było by navučyca častavać udzielnikaŭ cyrymonii harbataj dy piečyvam, jak toje robicca va ŭsich cyvilizavanych krainach. Mnie 47 hod budzie, i mnie abrydła badziacca pa hetych kuratnikach za scenaju».

Kiraŭnik adździełu kultury Mienharvykankama Ŭładzimier Ancypovič pryznaŭsia ŭ razmovie z TH, što sam lubić rok‑muzyku. Kaliści jon hraŭ u rok‑hurcie «Radyjacyja» i vučyŭsia razam u Instytucie kultury ź lideram hurta «Pałac» Aleham Chamienkam. Adnak jon nie padzialaje mierkavańnia niekatorych ajčynnych rok‑muzykaŭ: «Maja asabistaja pazicyja takaja – muzykant pavinien zajmacca muzykaj i nie ŭłazić u palityčnyja spravy. Jak hramadzianie – niachaj jany ŭdzielničajuć u jakich zaŭhodna akcyjach dy mitynhach, ale muzyčnam hurtam ŭ hetych spravach, na moj punkt hledžańnia, brać udzieł nie naležyć», — kaža jon na vydatnaj biełaruskaj movie. Na pytańnie, što moža paraić supracoŭnik sfery kultury, jaki vydaje licenzii na kancertnuju dziejnaść, ajčynnym muzykam, jakim pa‑sutnaści zabaraniajuć zajmacca svajoj spravaj, sp.Ancypovič adkazaŭ: «Jany sami viedajuć u čym sprava, iznoŭ uzdymać hetuju temu nia chočacca. Davajcie pakiniem jaje biez kamentaroŭ».

• 0
• 0
• 0
• 0
• 0
• 0
• 0
• 0