«Heta ź milicyi, kali vy nie pryjedziecie, vašaha siabra zatrymajem na 3 sutak»
Takoje SMS pryjšło na numar 24-hadovaj dziaŭčyny, jakuju milicyja sprabavała vyklikać na razmovu.
Vitala vyklikali ŭ kryminalny vyšuk Kastryčnickaha rajona Minska, kab parazmaŭlać pra susiedku Aniu. Pakul jon jechaŭ, dziaŭčyna atrymała SMS: «Heta ź milicyi, kali vy da nas nie pryjedziecie, vaš siabar budzie zatrymany na 3 sutak».
Šukajuć dziaŭčynu, nibyta, kab atrymać tłumačeńni, ci nie maje jana dačynieńnia da asobaŭ, jakija chočuć źvierhnuć uładu. Milicyja nie moža znajści jaje ŭžo miesiac, ale pozvu nie dasyłaje. Učastkovy chadziŭ da jaje 20 razoŭ, ale doma ni razu nie zastaŭ.
Jeŭraradyjo telefanuje pa numary, ź jakoha pryjšła SMS, i vyśviatlajecca, što pa im adkazvaje Vital Busieł, supracoŭnik kryminalnaha vyšuku Kastryčnickaha rajona.
«Dla Jeŭrapiejskaha radyjo ja ničoha kamientavać nie budu», — adkazvaje jon.
Padčas sustrečy ź siabram Hanny, apieratyŭnik tłumačyć: pryjšła papiera ad Upraŭleńnia pa baraćbie z arhanizavanaj złačynnaściu, sprava na kantroli ministra! Tamu dziaŭčynu treba terminova adšukać! Pozvu nie prysyłali, bo… navošta, kali ŭčastkovy prychodziŭ 20 razoŭ.
Pravaabaronca Uładzimir Łabkovič šakavany takimi mietadami i raić źviartacca ŭ prakuraturu.
«Pieršy raz čuju, kab takoje rabili. Byvała, što padmanam zamańvali i aryštoŭvali, jak Vinahradava. Spačatku zaprasili na hutarku, a potym aformili chulihanstva. Ale takoha, kab niekaha ŭziali i prapanavali raźmien… Jany ž joj dźviery nie vyłamvali, chacia takoje prava ciapier majuć. Značycca, jana im była nie vielmi patrebnaja».
Staršynia BCHK Aleh Hułak taksama kaža pra vidavočnaje parušeńnie zakona.
«Kab vyłamać dźviery, patrebnaja farmalnaja padstava. Vidać, što ŭ ich prosta nie było patreby, a jany i padstavy znajści nie mahli. Ja b rekamiendavaŭ źviarnucca ŭ prakuraturu. Ukazać numary telefonaŭ, ź jakich byli SMS, apisać situacyju i chaj jany raźbirajucca».
Aleh Hułak pryhadvaje niezakonnyja mietady, jakimi moža karystacca milicyja, kab vyklikać čałavieka, zamiest taho, kab prosta vysłać pozvu.
«Prośby, pierakanańni, zapałochvańni, vykarystańnie zaležnaj situacyi na pracy. Arsienał šyroki, ale heta ŭsio niezakonna».
Kiraŭnik słužby infarmacyi minskaj milicyi Alaksandr Łastoŭski ŭvohule sumniavajecca ŭ praŭdzivaści situacyi. Bo, kali vieryć słovam udzielnikaŭ padziej, heta parušeńnie, ale naŭrad ci supracoŭnik milicyi stanie zajmacca takim hłupstvam, miarkuje Łastoŭski: «Ja navat nie mahu ŭjavić situacyi, u jakoj by supracoŭnik milicyi pajšoŭ by na parušeńnie zakona».
Dziaŭčyna ŭ milicyju nie pajšła, ale i siabra nie zatrymali. Tolki ŭziali tłumačeńni, a SMS apynułasia chitraściu, što praŭda, niezakonnaj.
Ciapier čytajuć
Vynieśli prysud Palinie Zyl — błohiercy, jakaja stała nulavym pacyjentam spravy Hajuna, bo ŭ jaje znajšli tuju samuju spasyłku ad Matolki10
Kamientary