Aktyvistaŭ niezaležnaha Sajuza palakaŭ u Hrodnie prysudžajuć da vialikich štrafaŭ

Redaktar haziety «Hłos z-nad Niemna» Hražyna Šałkievič pryhavorana da štrafu ŭ 50 bazavych vieličyniaŭ (5 młn. rubloŭ), piensijanierka Stanisłava Civunčyk — u 20 bazavych vieličyniaŭ (2 młn. rubloŭ). Takoje rašeńnie 6 červienia pryniaŭ sud Leninskaha rajona Hrodna, paviedamiŭstaršynia hałoŭnaha savieta niefarmalnaha Sajuza palakaŭ na Biełarusi Andrej Pačobut.

Abiedźvie žančyny pryznany vinavatymi ŭ pravaparušeńni, praduhledžanym artykułam 23.34 Kodeksa ab administracyjnych pravaparušeńniach (parušeńnie paradku arhanizacyi abo praviadzieńnia masavaha mierapryjemstva ci pikietavańnia).

Pavodle słoŭ Pačobuta, raspačaty praces nad hramadskim aktyvistam Eduardam Dmuchoŭskim pavodle anałahičnaha abvinavačańnia pieraniesieny na 7 červienia, bo sudździa zapatrabavaŭ ź milicyi videamateryjały pikieta.

«U sudzie Leninskaha rajona zaraz prachodziać piać pracesaŭ za niesankcyjanavany pikiet. Sudździ navat nie stali rabić pierapynak na abied z 13.00 da 14.00», — zaznačyŭ Pačobut.

***

Nahadajem, 1 červienia ŭ Hrodnie padčas niesankcyjanavanaha pikieta ŭ abaronu polskaj škoły kala budynka abłvykankama byli zatrymany prykładna 20 čałaviek, u tym liku niekalki žurnalistaŭ. Padstavaj dla praviadzieńnia pikieta stała zaniepakojenaść płanami stvareńnia ruskamoŭnych kłasaŭ u hrodzienskaj škole № 36 z polskaj movaj navučańnia.

Prykładna dva tydni tamu pasolstva Polščy ŭ Minsku nakiravała biełaruskim uładam adpaviednuju notu, u jakoj nahadała pra padpisanaje ź biełaruskimi partniorami pahadnieńnie, jakoje harantuje, što škoła № 36 u Hrodnie pavinna zastavacca polskamoŭnaj, bo jaje budaŭnictva poŭnaściu finansavałasia polskimi ŭładami. Suprać uviadzieńnia ŭ hetaj škole ruskamoŭnych kłasaŭ taksama vystupajuć mnohija baćki vučniaŭ. Jany padpisali pietycyju, u jakoj vykazana zakłapočanaść tym, što biełaruskija ŭłady imknucca takim čynam vycieśnić polskamoŭnaje navučańnie.

Načalnik adździeła adukacyi Leninskaha rajona Hrodna Siarhiej Łamieka zajaviŭ, što nichto nie razhladaje pytańnie ab źmienie statusu siaredniaj škoły № 36 Hrodna z polskaj movaj navučańnia. Abmiarkoŭvajecca pytańnie pra mahčymaść raźmiaščeńnia na bazie hetaj ustanovy navučańnia dvuch kłasaŭ susiedniaj škoły, jakaja pracuje ŭ režymie pierahruzki. Łamieka padkreśliŭ, što havorka idzie mienavita pra arendu dvuch navučalnych pamiaškańniaŭ u škole № 36.

• 0
• 0
• 0
• 0
• 0
• 0
• 0
• 0