AAN paprasili inicyjavać daśledavańnie ab niezaležnaści biełaruskich advakataŭ

Centr pravavoj transfarmacyi 7 červienia 2012 źviarnuŭsia da śpiecyjalnaha dakładčyka AAN pa pytańniach niezaležnaści sudździaŭ i advakataŭ Habryele Knaul z ekstranym paviedamleńniem ab praciahu cisku na advakataŭ, jakija zajmalisia i praciahvajuć zajmacca akazańniem jurydyčnaj dapamohi hramadzianskim i palityčnym dziejačam, jakija apynulisia pad kryminalnym pieraśledam paśla padziej 19 śniežnia 2010.

Dadzienaje paviedamleńnie źviazana z zabaronaj na vyjezd z krainy advakatu Marynie Kavaleŭskaj, jakija ažyćciaŭlali abaronu Andreja Sańnikava — byłoha palityčnaha źniavolenaha, kandydata ŭ prezidenty ŭ 2010 hodzie.

Biełaruskija pravaabaroncy rasceńvajuć heta jak formu cisku na advakata Kavaleŭskuju i nahadvajuć, što raniej cisku padvierhlisia advakaty Pavieł Sapiełka, Tamara Sidarenka, Andrej Varvaševič, Aleh Ahiejeŭ, Taćciana Ahiejeva, Dźmitryj Łajeŭski. Niekatoryja advakaty byli vyklučany z kalehii advakataŭ.

U Centry pravavoj transfarmacyi miarkujuć, što zvarot da śpiecdakładčyka AAN pa pytańniach niezaležnaści sudździaŭ i advakataŭ paciahnie za saboj naležnaje reahavańnie z boku instytutaŭ Arhanizacyi Abjadnanych Nacyj. U tym liku — inicyjuje praviadzieńnie daśledavańnia ŭ śfiery niezaležnaści sudździaŭ i advakataŭ ŭ Biełarusi, u dadatak da daśledavańnia, praviedzienaha rabočaj hrupaj u 2000 hodzie.

Biełaruskija pravaabaroncy zaklikajuć Habryel Knaul raspačać pracoŭny vizit u Biełaruś i pravieści admysłovaje śledstva pa pytańniach niezaležnaści sudździaŭ i advakataŭ u krainie na siońniašni dzień. Zhodna z rezalucyi Savieta AAN pa pravach čałavieka 8/6 ad 18 červienia 2008, śpiecdakładčyk AAN pa pytańniach niezaležnaści sudździaŭ i advakataŭ ŭpaŭnavažany rasśledavać usie pradstaŭlenyja jamu istotnyja śćviardžeńni ab zamachu na niezaležnaść advakataŭ.

Situacyju, kamientuje ekśpiert i juryst Centra pravavoj transfarmacyi Tamara Sidarenka: «My pamiatajem, što ŭ sakaviku hetaha hoda šerahu palitykaŭ było admoŭlena ŭ vyjeździe za miažu. Pra toje, što jany «nievyjaznyja», hetyja asoby daviedvalisia tolki na miažy. Pry zvarocie ŭ terytaryjalnyja padraździaleńni pa hramadzianstvie i mihracyi pryčyn ŭklučeńnia ich bank danych ab hramadzianach, prava na vyjezd jakich z Respubliki Biełaruś časova abmiežavana, vyśviatlalisia kurjoznyja fakty. Pra heta ŭ presie paviedamlałasia.

Za abaronaj parušanych pravoŭ u sud źviarnulisia H.Pahaniajła, A.Hułak i inšyja asoby, rašeńniaŭ niama da hetaha času.

Užo tady vyklikaŭ ździŭleńnie toj fakt, što ŭsie «nievyjaznyja» ab takim svaim statusie paviedamlenyja nie byli. Miž tym, heta ŭ pryncypie niemahčyma, kali vykonvajecca Zakon Respubliki Biełaruś «Ab paradku vyjezdu z Respubliki Biełaruś i ŭjezdu ŭ Respubliku Biełaruś» (dalej — Zakon).

6 červienia 2012 h. situacyja paŭtaryłasia z advakatam M.Kavaleŭskaj: na miažy jana raptam daviedałasia, što jaje prava na vyjezdu chtości abmiežavaŭ. Chto i za što, prychodzicca daznavacca pa miescy žycharstva ŭ adździele pa hramadzianstvie i mihracyi. Niešta nie da ładu ŭ «dackim karaleŭstvie», a dakładniej, u Respublicy Biełaruś z realizacyjaj prava hramadzian na vyjezd».

«My ličym, što advakatura pavinna pierahledzieć praktyku, — kaža kiraŭnik Centra pravavoj transfarmacyi Alena Tankačova, — bo bieź niezaležnaj i jakasnaj pravavoj dapamohi adpraŭleńnie pravasudździa ŭ Biełarusi, tym bolš u palityčna matyvavanych sudovych pracesach, budzie zastavacca nieadpaviednym mižnarodnym standartam i nie vyklikajuć davier jak u prafiesijnaj supolnaści, tak i hramadzian».

• 0
• 0
• 0
• 0
• 0
• 0
• 0
• 0