Miadźviedzieŭ zaklikaŭ Miaśnikoviča padumać pra pierachod na adzinuju valutu

Staršynia ŭrada Rasijskaj Fiederacyi Dźmitryj Miadźviedzieŭ zaklikaŭ svaich kalehaŭ pa Mytnym sajuzie, prem'jer-ministraŭ Biełarusi i Kazachstana Michaiła Miaśnikoviča i Karyma Masimava, da prapracoŭki pytańnia nakont uviadzieńnia adzinaj valuty.

Pra heta jon zajaviŭ siońnia na biźnies-forumie «AEP: novyja mahčymaści pramysłovaha raźvićcia».

«Treba dumać dalej, treba dumać užo ŭ maštabie Jeŭrazijskaha sajuza, da jakoha my idziem i jaki pavinien uźniknuć z 2015 hoda, uklučajučy i takija pytańni, jakija pakul, moža być, nie źjaŭlajucca pradmietam biahučych razmoŭ, ale pra jakija treba dumać, asabliva z ulikam niestabilnaści na hłabalnych rynkach, majučy na ŭvazie pytańni ŭviadzieńnia niejkich raźlikovych adzinak i ŭ kančatkovym vyniku, moža być, vychad na adzinuju valutu, — skazaŭ Miadźviedzieŭ. —

Heta nie źjaŭlajecca pradmietam zakłapočanaści siońniašniaha dnia, ale dumać ab hetym treba — jakija našy pierśpiektyvy».

Pavodle słoŭ rasijskaha premjera, svoj układ u abmierkavańnie hetaha pytańnia pavinien unieści ekśpiertny saviet biźnies-supolnaścikrain-udzielnic (Rasii, Biełarusi i Kazachstana), jaki płanujecca stvaryć dla bolš efiektyŭnaha ŭzajemadziejańnia biźniesu ź Jeŭrazijskaj ekanamičnaj kamisijaj i nacyjanalnymi ŭradami.

Miadźviedzieŭ taksama adznačyŭ, što pieravahami Adzinaj ekanamičnaj prastory (AEP) i Mytnaha sajuza troch krain mohuć karystacca tolki dziaržavy-ŭdzielnicy.

«Mytny sajuza zapracavaŭ. Dla nas u čymści heta karyść, chacia i nie dla ŭsich, jość ekanamičnyja prablemy, — pryznaŭ Miadźviedzieŭ. — Dla šerahu dziaržaŭ, jakija z nami handlavali i handlujuć, ź jakimi ŭ nas svaje asablivyja adnosiny, — heta vyprabavańnie, i nie ŭtaju, što jany nam pieryjadyčna pradjaŭlajuć pretenzii. Ale my zychodzili i budziem zychodzić ź biassprečnaha fakta, što ŭsimi pieravahami, jakija źviazany sa stvareńniem Adzinaj ekanamičnaj prastory i funkcyjanavańniem Mytnaha sajuza, mohuć karystacca tolki tyja krainy, jakija ŭ hetym Mytnym sajuzie znachodziacca, jakija pryniali na siabie ŭsie abaviazacielstvy, źviazanyja z padpisańniem vielizarnaj kolkaści dakumientaŭ», — zajaviŭ rasijski premjer.

«Ja chacieŭ by, kab heta jašče raz pačuli: i vy, i našy partniory, jakija čamuści raźličvajuć na toje, što jany padpišuć apošnija dziesiać papier i paśla hetaha taksama zmohuć znachodzicca ŭnutry hetaha našaha Mytnaha sajuza, — heta niemahčyma», — padkreśliŭ Miadźviedzieŭ.

Jon taksama zakranuŭ pytańnie ab uvachodžańni Rasii ŭ Suśvietnuju handlovuju arhanizacyju.

Pavodle słoŭ Miadźviedzieva, stvareńnie Mytnaha sajuza nie stała pieraškodaj dla dałučeńnia Rasii da SHA i nie pieraškodzić inšym udzielnikam abjadnańnia dałučycca da hetaj arhanizacyi.

«U niejki momant nam usim pasłali dakładny niedvuchsensoŭny sihnał: kali vy heta zrobicie (majecca na ŭvazie ekanamičnaje abjadnańnie ź Biełaruśsiu i Kazachstanam. — BiełaPAN.), my vas nie prymiem u SHA. Ničoha, prymajuć. I vas prymuć — usich prymuć», — zajaviŭ rasijski premjer, źviartajučysia da biełaruskich i kazachstanskich udzielnikaŭ biźnies-forumu.

«Ja vam bolš skažu — Mytny sajuz paskoryŭ dałučeńnie našych krain da hetaj arhanizacyi», — padkreśliŭ Miadźviedzieŭ.

Rasija, zapeŭniŭ jon, u lubym vypadku budzie akazvać svaim partnioram pa Mytnym sajuzie ŭsialakaje sadziejańnie ŭ dałučeńni da SHA.

Delehacyju Biełarusi na biźnies-forumie ŭ Sankt-Pieciarburhu ŭznačalvaje prem'jer-ministr Michaił Miaśnikovič.

BiełaPAN.

• 0
• 0
• 0
• 0
• 0
• 0
• 0
• 0