Ukraina na miažy dziaržaŭnaha pieravarotu

Ukrainskaja apazycyja vyvieła ŭ subotu na Majdan Niezaležnaści 40 tysiač čałaviek, kab zapatrabavać rospusku Viarchoŭnaj Rady i adstaŭki ŭradu Janukoviča.

Adnačasova na susiedniaj Eŭrapiejskaj płoščy sabralisia kala 20 tysiač prychilnikaŭ Janukoviča.

Kožny z bakoŭ vinavacić svaich apanentaŭ u padrychtoŭcy dziaržaŭnaha pieravarotu. Na dumku “aranžavych”, urad ažyćciaŭlaje paŭzučy dziaržaŭny pieravarot, jaki pryviadzie da zhortvańnia demakratyi. “Sinie-čyrvonaja” ŭradavaja kaalicyja peŭnaja, što zakonnych padstavaŭ dla rospusku Viarchoŭnaj Rady niama.

Juščanka na mitynhach nie źjaviŭsia. Mienavita jamu adrasavanyja patrabavańni, ahučanyja na Majdanie: nieadkładna raspuścić parlament. Na Eŭrapiejskaj płoščy jaho zaklikali nie rabić hetaha.

Sam Juščanka ŭziaŭ paŭzu da paniadziełka i praciahvaje kansultacyi.

Viarchoŭnuju radu kantraluje sinia-čyrvonaja kaalicyja. Jana nazyvajecca Forum nacyjanalnaha adzinstva i składajecca z Partyi rehijonaŭ premjera Janukoviča, Sacyjalistyčnaj partyi śpikiera Rady Maroza i kamunistaŭ.

Apazycyju im składajuć “Naša Ŭkraina” prezydenta Juščanki, Blok Julii Cimašenki i strakataja pazaparlamenckaja supolnaść niaŭradavych arhanizacyj.

Nahodaju dla pratestaŭ hetym razam stali vypadki pierakupki deputataŭ apazycyi. “Aranžavyja” bačać za hetym žadańnie dabicca kanstytucyjnaj bolšaści i poŭnaha kantrolu nad uładaj. Jany nie vyklučajuć, što nastupnym etapam moža stać impičment prezydenta.

Raniej, u parušeńnie kanstytucyjnych damoŭlenaść, sinia-čyrvonaja kaalicyja blakavała kandydatury na pasady ministraŭ zamiežnych i ŭnutranych spravaŭ i kiraŭnikoŭ abłasnych administracyj, prapanavać jakich — kanstytucyjnaja prerahatyva prezydenta.

Juščanka patrabuje ad Kanstytucyjnaha sudu pryniaćcia, a ad uradavaj kaalicyi pryznańnia tak zvanaha “imperatyŭnaha mandatu”, jaki b abmiažoŭžaŭ dla deputataŭ mahčymaść pakidać frakcyju, pa partyjnym śpisie jakoj jany byli abranyja.

Praciŭniki Janukoviča chočuć skarystać sytuacyju, kab spynić adnaŭleńnie zvyčajaŭ epochi kučmizmu, jakoje adbyvałasia ciaham apošniaha hodu.

Ciapier Juščanka moža raspuścić Viarchoŭnuju Radu abo praciahnuć składanaje suisnavańnie z uradam Janukoviča.

Jurydyčnyja padstavy dla rospusku chistkija, tamu ŭ stanie Janukoviča i nazyvajuć mahčymy rospusk “dziaržaŭnym pieravarotam”.

Pavodle acenak sacyjolahaŭ, u vypadku daterminovych vybaraŭ “aranžavyja” i “sinia-čyrvonyja” atrymajuć prykładna takuju ž kolkaść hałasoŭ, jak i na vybarach 2006 hodu i jak Juščanka ŭ pieršym tury ŭ 2004 hodzie — kala 40%. Na takuju ž kolkaść hałasoŭ mohuć raźličvać razam rehijanały j kamunisty. Adnak kolkaść deputackich manadataŭ prychilnikaŭ Juščanki j Cimašenki moža vyraści. Reč u tym, što minułym razam častka hałasoŭ pamarančavych raścierušylisia miž drobnymi partyjami, jakija nie adoleli 3%-ha vybarčaha barjeru.

Ciapier, jak pakazvajuć apytańni hramadzkaje dumki, akramia Bloku Julii Cimašenki i “Našaj Ukrainy” ŭ Viarchoŭnuju Radu moža prajści i papulisckaja “Narodnaja samaabarona” Jurja Łucenki. Hety palityk raniej uvachodziŭ u Sacyjalistyčnuju partyju. Jon zajmaŭ pasadu ministra ŭnutranych spravaŭ u “revalucyjnym uradzie”. Paśla taho, jak lider sacyjalistaŭ Maroz pajšoŭ na aljans ź Janukovičam, jon raspačaŭ stvareńnie ŭłasnaj palityčnaj siły.

U vypadku daterminovych vybaraŭ mohuć uzmacnicca pazycyi papulistaŭ Julii Cimašenki, a partyja prezydenta “Naša Ŭkraina” stracić kala pałovy ciapierašnich mandataŭ. Tym nia mienš, źjezd “Našaj Ukrainy” ŭ subotu zaklikaŭ prezydenta raspuścić Radu.

Siońnia ŭsie ŭkrainskija palityčnyja siły vyražajuć intaresy roznych finansava-pramysłovych hrupovak. Sproby stvaryć “partyi hramadzianskaje supolnaści”, jakija b nie hruntavalisia na aliharchičnych hrašach, pośpiechu pakul nia mieli. Partyja “Para”, sfarmavanaja na bazie adnajmiennaha studenckaha ruchu, nia zdoleła adoleć vybarčy barjer.

Uradavaja kaalicyja raznarodnaja. Kamunisty zastajucca ćvierdałobymi savietčykami i majuć padtrymku na ŭzroŭni ŭsiaho 3—4% nasielnictva. “Rehijanały” i sacyjalisty na praktycy nie zamachvajucca na dziaržaŭnaść ukrainskaj movy i eŭrapiejski kurs. Partyja rehijonaŭ abapirajecca na ŭschodnija vobłaści, pieradusim Danbas, za jaje hałasujuć rasiejskamoŭnyja vybarcy. Sacyjalisty źbirajuć hałasy sialanaŭ, ale pa śpisach hetaj partyi z hučnaj nazvaj prachodzić niamała kapitalistaŭ.

Cimašenka i Juščanka aryjentujucca na vybarcaŭ Zachadu i Centru Ŭkrainy, ukrainafiłaŭ i prychilnikaŭ zachodniaha vybaru.

Ukrainski palitykum roźnicca ad biełaruskaha, z adnaho boku, pabłažlivym staŭleńniem da karupcyi, ale ź inšaha, kulturaj kampramisu. Ukraina nahadvaje paślavajennuju Italiju. Tam uradavaja čacharda i navat karupcyja nie zaminali ekanomicy j kultury dynamična raźvivacca.

Ukrainskaj demakratyi ad praŭdzivaj demakratyi jašče daloka. Pierakupka deputataŭ ci vykarystańnie vuličnych metadaŭ cisku zastajucca zvyčajnaj źjavaj.

Choć palityki i zajaŭlali ŭ subotu ab tym, što mabilizavali na svaju padtrymku sotniu tysiač vybarcaŭ, ukrainskaje hramadztva zastajecca pieravažna pasiŭnym. Vajna idzie ŭ viarchach.

U sytuacyi hramadzianskaj pasiŭnaści vynik procistajańnia budzie zaležać ad pazycyi siłavikoŭ i finansavych mahnataŭ. Stabilizujučuju rolu niesumnienna budzie mieć imknieńnie abodvuch bakoŭ da pašyreńnia supracoŭnictva z ZŠA i Eŭrasajuzam.

• 0
• 0
• 0
• 0
• 0
• 0
• 0
• 0