ES vyrašyŭ nie adklikać pasłoŭ ź Minska
I maje namier u najbližejšyja miesiacy pierahledzieć abmiežavalnyja miery adnosna Biełarusi.
ES nie budzie adklikać jeŭrapiejskich pasłoŭ ź Minska i maje namier u najbližejšyja miesiacy pierahledzieć abmiežavalnyja miery adnosna Biełarusi. Ab hetym zajaviŭ staršynia Kamiteta pa palitycy i biaśpiecy Savieta ES Ołaf Skooh 10 žniŭnia na bryfinhu pa vynikach pazačarhovaha pasiažeńnia kamiteta ŭ Brusieli.
Nahadajem, ciapier 243 pryvatnyja asoby i 32 pradpryjemstvy Biełarusi traplajuć pad vizavyja i ekanamičnyja sankcyi Jeŭrasajuza. ES ličyć ich adkaznymi za "surjoznyja parušeńni pravoŭ čałavieka abo represii adnosna hramadzianskaj supolnaści i palityčnaj apazicyi", a taksama "atrymańnie vyhady ad režymu abo jaho padtrymku".
Skooh adznačyŭ, što rašeńnie pra abmiežavalnyja miery budzie prymacca ŭ kastryčniku z ulikam apošniaha dypłamatyčnaha kanfliktu pamiž Biełaruśsiu i Šviecyjaj.
Pavodle jaho słoŭ, usie ŭdzielniki pasiadžeńnia vykazalisia ŭ padtrymku Šviecyi, a taksama ŭ padtrymku zajavy viarchoŭnaha pradstaŭnika ES Ketryn Eštan ad 3 žniŭnia, u jakoj vykazana surjoznaja zakłapočanaść situacyjaj.
"Usim biełaruskim pasłam na praciahu niekalkich najbližejšych dzion budzie pieradadziena vielmi vyraznaje paviedamleńnie z vykazvańniem poŭnaj salidarnaści Šviecyi", — zajaviŭ Skooh.
Pavodle jaho słoŭ, usie ŭdzielniki pasiadžeńnia taksama zhadzilisia, što hetaja situacyja zakranaje nie tolki adnosiny Biełarusi sa Šviecyjaj, ale i jaje adnosiny ź ES.
Narešcie, Skooh padkreśliŭ prychilnaść ES prasoŭvańniu demakratyi i hramadzianskaj supolnaści ŭ Biełarusi.
Padstavaj dla pazačarhovaha pasiadžeńnia palityčnaha kamiteta ES staŭ dypłamatyčny kanflikt pamiž Minskam i Stakholmam.
1 žniŭnia biełaruskija ŭłady paviedamili Šviecyi ab niepraciahu akredytacyi pasłu Stefanu Eryksanu. Dypłamata abvinavacili ŭ destruktyŭnaj dziejnaści.
U adkaz na heta šviedskija ŭłady zajavili, što nie prymuć novaha pasła Biełarusi, i rekamiendavali dvum supracoŭnikam biełaruskaha pasolstva pakinuć Stakholm.
8 žniŭnia MZS Biełarusi abjaviŭ ab adklikańni ŭsich supracoŭnikaŭ biełaruskaha pasolstva ŭ Stakholmie. Šviedskamu boku rekamiendavana pryniać anałahičnyja miery i adklikać usich svaich dypłamataŭ ź Minska da 30 žniŭnia.
Ciapier čytajuć
Ejsmant: Statkieviča pamiłavali ŭžo paŭhoda nazad, ale tady jon viarnuŭsia ŭ turmu17
Kamientary