Da akruhi prypisana bolš za 70 tysiač vybarcaŭ.
U Minsku stvorana rabočaja hrupa pa arhanizacyi bajkotu ŭ asobnaj Frunzienskaj vybarčaj akruzie № 101. Da akruhi prypisana bolš za 70 tysiač vybarcaŭ.
U hetaj kampanii biaruć udzieł pradstaŭniki Ruchu «Za svabodu», Partyi BNF, hramadzianskaj kampanii «Havary praŭdu», moładzievaj struktury «Zmiena». Pra svajo dałučeńnie da bajkotu ŭ hetaj akruzie zajavili taksama pradstaŭniki partyi «Spraviadlivy śviet».
Adzin z kaardynataraŭ bajkotu ŭ Frunzienskaj vybarčaj akruzie № 101, siabra ruchu «Za svabodu» Juraś Mielaškievič, apavioŭ,
što ŭsia praca budzie bazavacca na kampanii kandydata ad partyi BNF Arcioma Lavy, jaki zarehistravany pa hetaj akruzie.
Ju. Mielaškievič patłumačyŭ (raniej płanavałasia abrać akruhu dla bajkotu, dzie nie było b demakratyčnaha kandydata):
«My karystajemsia jaho ŭdziełam u vybarach, u ahitacyi dla taho, kab razhortvać kampaniju bajkotu. Zakonnyja pracedury dla atrymańnia miescaŭ dla ahitacyi, dla vystaŭleńnia pikietaŭ, dla druku materyjałaŭ abmiežavanyja ŭ vypadku, kali kandydata niama. Kali jaho niama, to ŭ nas niama mažlivaści stajać u pikiecie tak, jak heta moža dazvolić sabie kandydat. I my źbirajemsia mienavita dziakujučy hetamu pravieści bolš vizualnuju, prykmietnuju i dynamičnuju kampaniju. My budziem prysutničać usiudy, dzie tolki možna, budziem raspaviadać pra bajkot, jak i čamu my źbirajemsia bajkatavać hetyja vybary. My vybrali aptymalnuju akruhu, jakaja dazvolić najbolš efiektyŭna spracavać».
Inicyjatary bajkotu ŭ asobnaj akruzie ŭ Minsku pryznačyli pieršuju sustreču z vybarcami na 7 vieraśnia.Taksama jany płanujuć nadrukavać admysłovyja ahitacyjnyja materyjały, užo raspracavanyja łozunhi i zachady dziela taho, kab pierakanać ludziej nie iści na vybary, apavioŭ Juraś Mielaškievič.
«Nie chadzić, nie ŭdzielničać u hałasavańni. My heta budziem danosić praz ulotki, praz sustrečy z Arciomam, jaki budzie kazać, kali vybarcy chočuć jaho padtrymać, to niachaj jany nie iduć hałasavać».
Kamientary