Novaja kiraŭnica Departamienta mihracyi Litvy — za bolš strohuju mihracyjnuju palityku, kab nie było złoŭžyvańniaŭ
Prapanujecca, kab hramadzianin treciaj krainy moh atrymać časovy dazvoł na žycharstva i prava na pracu, kali jon adpaviadaje chacia b adnoj z umoŭ: maje adpaviednuju kvalifikacyju abo pracavaŭ nie mienš za adzin hod za apošnija try hady.
Novaja kiraŭnica Departamienta mihracyi (DM) Litvy Indre Haśpiere kaža, što mihracyjnuju palityku ŭ Litvie treba ŭzmacnić takim čynam, kab pieraškodzić złoŭžyvańniam i padrobcy dakumientaŭ hramadzianami trecich krain, jakija prybyvajuć u krainu, piša LRT.
Pa jaje słovach, Litva nie imkniecca skaracić kolkaść mihrantaŭ jak takuju, adnak choča palepšyć kantrol nad imihracyjnym pracesam.
«Pazicyja Departamienta mihracyi jašče nie sfarmulavana, ale, jak ja razumieju, u tym liku i jak były słužboviec Ministerstva ŭnutranych spraŭ, pazicyja MUS zaklučajecca va ŭzmacnieńni mihracyjnaj palityki. Ale ŭzmacnieńnie tolki dla taho, kab nie było złoŭžyvańniaŭ mihracyjnymi pracedurami», — skazała Haśpiere ŭ efiry radyjo LRT u piatnicu.
«Niama takoj mety, kab my chacieli pamienšyć kolkaść mihrantaŭ jak takuju. My chočam ŭzmacnieńnia, kab nie było złoŭžyvańniaŭ, kab nie padavalisia padroblenyja dakumienty, kab ludzi nie pryjazdžali pa adnych padstavach, a znachodzilisia ŭ Litvie pa inšych», — adznačyła jana.
Pa słovach kiraŭnicy departamienta, isnujuć roznyja sposaby manipulacyi imihracyjnym pracesam — naprykład, pryjezd u Litvu na padstavie navučańnia pry faktyčnaj pracy abo zaklučeńnie fiktyŭnych šlubaŭ.
«Jość šmat vypadkaŭ (…) złoŭžyvańniaŭ samim pracesam imihracyi», — padkreśliła jana.
Jak raniej paviedamlała ahienctva BNS, u śniežni Siejm prystupiŭ da razhladu inicyjatyvy ŭrada pa karekciroŭcy mihracyjnaj palityki.
Prapanujecca, kab hramadzianin treciaj krainy moh atrymać časovy dazvoł na žycharstva i prava na pracu, kali jon adpaviadaje chacia b adnoj z umoŭ: maje adpaviednuju kvalifikacyju abo pracavaŭ nie mienš za adzin hod za apošnija try hady. Papraŭkami taksama płanujecca ŭzmacnić paradak pryjezdu studentaŭ.
Novaja kiraŭnica DM taksama padkreśliła, što budzie imknucca da bolšaha intehravańnia mihrantaŭ.
«Kab my supracoŭničali z supolnaściami zamiežnikaŭ i bačyli ahulny intares — što intehracyja ŭ naša hramadstva adpaviadaje i ich intaresam. Ad hetaha vyjhrali b usie my. Tamu ja liču intehracyju i vyvučeńnie litoŭskaj movy vielmi pazityŭnaj źmienaj», — skazała Haśpiere. Jana taksama adznačyła, što zamiežniki pavinny vyvučać litoŭskuju movu, asabliva mihranty, jakija pracujuć u śfiery pasłuh.
«Jany mahli b adaptavacca i vyvučyć litoŭskuju movu chacia b na niejkim uzroŭni. Ciapier varta było b patrabavać siertyfikat uzroŭniu A1 (uzrovień vałodańnia litoŭskaj movaj — BNS) ad usich ludziej, jakija pracujuć u śfiery pasłuh. Tamu što heta prosta znak pavahi da dziaržavy», — skazała Haśpiere.
Šmathadovaja supracoŭnica MUS Haśpiere kiruje Departamientam mihracyi z čaćviarha, źmianiŭšy na hetaj pasadzie Evielinu Hudzinskajcie.
DM vyrašaje pytańni pravavoha stanovišča zamiežnikaŭ u Litvie, ažyćciaŭlaje pracedury adnaŭleńnia, straty hramadzianstva i prysiahi, vydaje dakumienty, jakija paćviardžajuć asobu hramadzianaŭ, prajaznyja dakumienty i dazvoły na žycharstva dla zamiežnikaŭ.
Kamientary