Palitźniavolenuju Kaciarynu Novikavu prynamsi dvojčy kidali ŭ ŠIZA za «niavietlivaść»
Žančyna raniej raskazvała, jak jaje «bili ŭsim kabinietam». Ciapier stała viadoma, što jaje nieadnarazova kidali ŭ štrafny izalatar za «niavietlivyja znosiny» ź inšymi viaźniami i psichołaham.
Palityčnuju źniavolenuju Kaciarynu Novikavu nieadnarazova kidali ŭ štrafny izalatar u papraŭčaj kałonii № 4, stała viadoma «Biełsatu».
Apošni raz Novikava trapiła ŭ ŠIZA na 15 dzion u pačatku śniežnia 2025‑ha za «niavietlivyja znosiny ź psichołaham» u kałonii. A raniej — za «niavietlivyja znosiny ź inšymi viaźniami». Taksama «Biełsatu» stała viadoma, što Kaciarynie ŭvieś čas błakujuć listavańnie i pazbaŭlajuć spatkańniaŭ.
Viasnoj 2024 hoda krynicy «Biełsata» pieradali redakcyi list ad Novikavaj na kavałku tualetnaj papiery.
Žančyna apisvała, što pry zatrymańni jaje biŭ bajec HUBAZiKa Ivan Vasilevič, zatym u štabie HUBAZiKu na Revalucyjnaj 3 jaje «stavili na ściah, bili ŭsim kabinietam».
Skazali, što bjuć za jejnyja intervju, za Telegram-kanał i za jejnyja zvaroty. Taksama Novikava pisała, što «ŭpała z druhoha pavierchu łožka, hałavoj ab draŭlanuju palicu», ale joj bolš za miesiac nie paviedamlali vyniku.
Kaciarynu Novikavu zatrymali 15 červienia 2023 hoda. Spačatku joj zakidali «Niezakonnyja dziejańni ŭ dačynieńni infarmacyi pra pryvatnaje žyćcio» i «Raspalvańnie sacyjalnaj varožaści». U vyniku vystavili abvinavačvańni pavodle siami kryminalnych artykułaŭ, u tym liku za «Hvałt ci pahrozu hvałtam» siłavikam i sudździam. Jana pieradavała: «Maimi paciarpiełymi jość tyja, ad kaho ja paciarpieła ŭ 2020-m».
Sudździa Alena Šylko asudziła jaje na 6 hadoŭ i 6 miesiacaŭ pazbaŭleńnia voli i 3000 rubloŭ «kampiensacyi paciarpiełym». Paźniej jaje ŭnieśli ŭ śpisy «ekstremistaŭ» i «terarystaŭ».
Kamientary