Kamitet pa pravach čałavieka AAN zarehistravaŭ skarhu na ŭmovy ŭtrymańnia na Akreścina

Kamitet pa pravach čałavieka AAN zarehistravaŭ skarhu biełaruskaha pravaabaroncy Valancina Stefanoviča na ŭmovy ŭtrymańnia ŭ Centry izalacyi pravaparušalnikaŭ (CIP) HUUS Minharvykankama, jaki raźmieščany na vulicy Akreścina.

Jak paviedamiŭ Stefanovič, skarhu ŭ Kamitet AAN pa pravach čałavieka (KPČ) jon nakiravaŭ u 2010 hodzie. Pravaabaronca skardziŭsia na ŭmovy ŭtrymańnia ŭ CIP, kudy byŭ źmieščany paśla akcyi pratestu suprać śmiarotnaj kary, jakaja prajšła 23 sakavika.

Źviarnucca ŭ mižnarodnuju strukturu Stefanovič vymušany byŭ paśla taho, jak jaho skarhu na ŭmovy ŭtrymańnia ŭ CIP praihnaravali sud Maskoŭskaha rajona stalicy i Minski haradski sud.

Zvarot pravaabaroncy tyčyŭsia parušeńnia art. 5 Usieahulnaj dekłaracyi pravoŭ čałavieka i art. 7 Mižnarodnaha pakta ab hramadzianskich i palityčnych pravach, zhodna ź jakimi nichto nie pavinien źviedvać katavańni abo žorstkaje, biesčałaviečnaje abychodžańnie i pakarańnie, jakija źnievažajuć hodnaść.

Biesčałaviečnym abychodžańniem Stefanovič paličyŭ toje, što ŭmovy ŭtrymańnia nie adpaviadajuć bazavym sanitarna-hihijeničnym normam.

Jaho indyvidualnaja skarha zarehistravana ŭ KPČ AAN pad numaram 2882/2012, užo pačalisia pracedury pa vyvučeńni spravy.

«Zaraz Kamitet pa pravach čałavieka paprosić biełaruskija ŭłady prakamientavać maju skarhu. Potym ja mahu napisać svoj vodhuk na hety kamientaryj, i tolki zatym skarha budzie razhledžana. U pryncypie, na heta patrabujecca zvyčajna try-čatyry hady, i možna za hety čas jašče nie raz trapić u CIP», — zaŭvažyŭ Stefanovič.

Pry hetym pravaabaronca adznačyŭ, što

rašeńni KPČ AAN biełaruskaja ŭłada, jak praviła, ihnaruje.

Heta ŭžo nie pieršaja takaja skarha ź Biełarusi, pryniataja da razhladu KPČ AAN. Dniami tam zarehistravali skarhu hramadskaha aktyvista Jahora Babrova, jaki taksama skardzicca na ŭmovy ŭtrymańnia ŭ CIP i «na biesčałaviečnaje, jakoje źnievažaje čałaviečuju hodnaść», abychodžańnie ŭ hetaj ustanovie. Jaho skarha zarehistravana za numaram 2181/2012.

Pra biesčałaviečnyja ŭmovy ŭtrymańnia ŭ CIP na Akreścina nie raz zajaŭlali mnohija demakratyčnyja aktyvisty, jakija tam pabyvali. U červieni hetaha hoda pravaabaronca i juryst Aleh Vołčak zapatrabavaŭ ad prakuratury Minska zakryć CIP «da pryviadzieńnia ŭmoŭ utrymańnia ŭ im u adpaviednaść z zakanadaŭstvam».

• 0
• 0
• 0
• 0
• 0
• 0
• 0
• 0