Aŭtary idei filii EHU ŭ Hiermanii: Paralelny ŭniviersitet dla rasiejskamoŭnych Jeŭropy

Maładyja ludzi zarehistravali arhanizacyju pad nazvaj «EHU-Förderinitiative e. V.». Na sajcie «EHU-Förderinitiative e. V.», jaki dyzajnam vielmi nahadvaje sajt samoha EHU, havorycca, što inicyjatyva była raspačataja dla «finansavaj i maralnaj» padtrymki EHU. «EHU-Förderinitiative e. V." stavić metami: vyłučeńnie stypiendyjaŭ studentam, jakija nie mohuć navučacca «doma» (to bok u Biełarusi) i mohuć stać abjektam palityčnych represijaŭ; apłatu adukacyjnych materyjałaŭ i pracy lektaraŭ — kab pašyryć śpis navučalnych dyscyplinaŭ. Taksama arhanizacyja abiacaje pryciahvać uvahu niemcaŭ da EHU, naprykład, praz arhanizacyju kanfierencyjaŭ.

«Ideja naradziłasia, kali ja byŭ na moładzievaj kanfierencyi ŭ Vilni. Tam ja daznaŭsia pra EHU, pahutaryŭ z rektaram Anatolem Michajłavym. Tady ja zacikaviŭsia mahčymaściu padtrymki EHU» , — skazaŭ Michael Biechter u intervju «NN».

«Ja viedaju, što ŭ EHU kala 500 čałaviek vyvučaje niamieckuju movu. Im patrebnaja praktyka, uciahnieńnie, ale nie kožny moža dazvolić sabie pajezdku ŭ Hiermaniju. Naša inicyjatyva ŭžo arhanizavała kanfierencyju ŭ Saksonii, u jakoj brali ŭdzieł studenty EHU.», — paviedamiŭ «NN» kaleha Biechtera pa arhanizacyi Maksim Asioma. Na nastupny hod «EHU-Förderinitiative e. V.» užo zapłanavała kanfierencyi, treninhi, letniuju škołu, u jakoj zmohuć uziać udzieł «jeheušniki».

Inicyjatyva «EHU-Förderinitiative e. V.» finansujecca za košt siabroŭskich unioskaŭ i asabistych achviaravańniaŭ. Arhanizacyja ŭžo naličvaje 40 siabraŭ pa ŭsioj Hiermanii, ale «hetaha zanadta mała, kab pasunuć hory».

Ale ŭ intervju niamieckaj haziecie «Dresdner Neueste Nachrichten» pad nazvaj «Sistema Łukašenki budzie padkapanaja zvonku» Majkł Biechter i Maksim Asioma paviedamlajuć pra inšuju metu, nie zhadanuju na sajcie «EHU-Förderinitiative e. V.« — pra stvareńnie adździaleńnia EHU ŭ Drezdenie.

«Pieršasnaja zadača arhanizacyi — usio ž dapamoha EHU ŭ Vilni,« — kaža Biechter. «Tym časam u mianie šmat rasijskamoŭnych znajomych, jakija žyvuć u Hiermanii, ale chacieli b atrymlivać vyšejšuju adukacyju na rasijskaj. Kab dapamahčy takim ludziam, my z Maksimam vyrašyli stvaryć filijał EHU ŭ Drezdenie. Heta našaja ŭłasnaja inicyjatyva ŭ miežach „EHU-Förderinitiative e. V.“.

EHU byŭ abrany mienavita tamu, što heta ŭniviersitet, jaki vydaje jeŭrapiejski dypłom, ale navučacca ŭ im možna pa-rasijsku. U Hiermanii žyvie šmat rasijskamoŭnych hramadzianaŭ. I kali chto-niebudź ź ich maje dypłom rasijskaj VNU, jaho naŭrad ci pryznajuć tut, a kali i pryznajuć, to mohuć dać čałavieku, što pravučyŭsia 5 hadoŭ, stupień bakałaŭra. Vy tolki nie padumajcie, što hetyja ludzi nie viedajuć niamieckaj. Ale, naprykład, vyvučać humanitarnyja dyscypliny na niamieckaj dla tych, čyja rodnaja mova — rasijskaja, vielmi ciažka. EHU moža stać dla ich vyjściem.

My płanujem stvaryć centr dystancyjnaha navučańnia. Heta vielmi zručna, bo lotać u Vilniu na siesii — niatannaja i nialohkaja sprava. A studenty dystancyjnych kursaŭ EHU zmohuć navučacca na adlehłaści i zdavać ekzamieny na miescy, u Drezdenie» — havoryć Majkł Biechter.

«U stvareńni takoha centra dystancyjnaha navučańnia jość jašče adzin pazityŭny bok dla EHU. Niamieckija studenty dystancyjnych kursaŭ mahli b płacić značna bolš, čym płaciać biełaruskija studenty EHU, i heta nie budzie značna abciažarvać pieršych. A hrošy mahli b iści u fond padtrymki biełarusaŭ. Takim čynam, adzin niemiec moh by apłačvać navučańnie adnaho biełarusa», kaža Maksim Asioma.

Centr dystancyjnaha navučańnia ŭ Drezdenie moža pačać pracavać užo ŭ kastryčniku 2013 hoda. Pieršy nabor — ad 20 da 40 čałaviek. «Studentaŭ budzie niašmat, bo treba pahladzieć, jak pojduć spravy», — kaža Majkł.

Sami pradstaŭniki EHU bačać u niezaležnaj inicyjatyvie niemcaŭ patencyjał da raźvićcia ŭniviersiteta i ŭchvalajuć pačynańni «EHU-Förderinitiative e. V.». Biechter i Asioma paćvierdzili, što administracyja EHU aktyŭna dapamahaje «EHU-Förderinitiative e. V." , bo bieź jaje zhody niemahčyma było b vyrašyć niekatoryja aficyjnyja pytańni.

Darus Udrys, prarektar EHU pa raźvićci i kamunikacyjach, patłumačyŭ biełaruskamu partału Generation.by (jaki pieršym paviedamiŭ pra inicyjatyvu maładych niemcaŭ) što, «kali taki padychod [stvareńnie rasijskamoŭnaha kampusa EHU ŭ Drezdenie] budzie paśpiachovym, jon padtrymaje EHU finansava, pašyryŭšy mahčymaści biełarusaŭ pa atrymańni adukacyi ŭ Litvie, Biełarusi i Hiermanii. Moža być, u budučyni u Hiermanii paŭstanie navučalny centr, a ŭniviersitet zaŭvažyć bolšaja kolkaść fundataraŭ».

«Luby sučasny ŭniviersitet imkniecca da aktyŭnaha mižkulturnaha abmienu. EHU tut nie vyklučeńnie, tamu sprabuje realizoŭvać takija abmieny nie tolki praz prahramy Erasmus i Campus, ale i praź inicyjatyvy nakštałt „EHU-Förderinitiative e. V.“. Kali ŭsio atrymajecca, heta daść dobruju hlebu dla reprezientacyi na Zachadzie nie tolki EHU, ale i biełaruskaha akademičnaha asiarodku, jaki, skažam ščyra, dosyć zamkniony na svaim rehijonie i słaba pradstaŭleny ŭ krainach Zachodniaj Jeŭropy», — skazaŭ «Našaj Nivie» Kirył Atamančyk, kaardynatar pa kamunikacyi Studenckaj słužby EHU.

Praŭda, jość i tyja, chto stavicca da inicyjatyvy krytyčna. Na ich dumku, misija EHU — być univiersitetam dla Biełarusi, a nie dla rasiejskamoŭnych uvohule. I što realizacyja idej, padobnych niamieckaj, moža pryvieści da razmyvańnia identyčnaści niezaležnaha ŭniviera.

• 0
• 0
• 0
• 0
• 0
• 0
• 0
• 0