Nabaženstva na byłoj Sabornaj płoščy praviŭ śviatar Biełaruskaj Aŭtakiefalnaj Carkvy ajciec Leanid Akałovič
A siomaj viečara 5‑ha červienia na płoščy Svabody sabrałasia bolš za try dziasiatki viernikaŭ roznych kanfesij. Kataliki, pravasłaŭnyja dy unijaty razam malilisia za adnaŭleńnie Śviata‑Mikałajeŭskaha saboru, a taksama pratestavali suprać budaŭnictva na hetym miescy zabaŭlalnaha moładzievaha centru.
Nabaženstva na byłoj Sabornaj płoščy praviŭ śviatar Biełaruskaj Aŭtakiefalnaj Carkvy ajciec Leanid Akałovič:
«Tut ža śviatoje miesca, namolenaje, tut pavinna panavać duchoŭnaść, Božaje słova, a nia niejkija skoki! Tamu j nielha tut niešta spakušalnickaje budavać!
Ja dumaju, ułady musiać zrazumieć hetuju niedarečnaść. I spadziajusia, budzie adnoŭleny i Śviata‑Mikałajeŭski sabor. Bo treba dumać nia tolki pra nadzionnaje, ale j pra duchoŭnaje, što my možam pakinuć dla svaich naščadkaŭ, dla Baćkaŭščyny našaj!»
Paśla nabaženstva ŭsie achvotnyja mahli pastavić svoj podpis pad zvarotam da haradzkich uładaŭ. Pra hetuju inicyjatyvu raspavioŭ sustaršynia arhkamitetu pa stvareńni partyi «Biełaruskaja Chryścijanskaja Demakratyja» Viktar Šlachcin:
«Našy patrabavańni da ŭładaŭ — heta spynić lubyja pracy ŭ tym miescy, dzie znachodziŭsia Śviata‑Mikałajeŭski sabor, i admianić usie zabaŭlalnyja mierapryjemstvy na reštkach chrama, bo padčas «Słavianskaha bazaru» tut zaŭždy pravodziać dyskateki. Heta prosta hłumleńnie nad śviatyniaj! I ja dumaju, što varta damahacca adnaŭleńnia i hetaha saboru, i inšych viciebskich chramaŭ, kab nasamreč zrabić kulturnaj i duchovaj stalicaj naš horad».
Uvieś čas, pakul išło nabaženstva dy źbiralisia podpisy, na płoščy prysutničali milicyjanty. Supracoŭnikaŭ u formie, nia ličačy tych, chto byŭ u cyvilnym, było kala 15‑ci čałaviek. Adzin ź ich zdymaŭ usich prysutnych na videakamieru. Naŭzboč stajała i niekalki milicejskich mašyn. Namieśnik načalnika Kastryčnickaha rajadździełu Alaksandar Kalinoŭski napačatku skazaŭ žurnalistam, što nabaženstva jość niesankcyjanavanaj masavaj akcyjaj, i ŭdzielniki buduć zatrymanyja. Adnak zatrymańniaŭ nia zdaryłasia.
Ciapier čytajuć
Andrej Švied, architektar represij, pryznačany staršynioj Viarchoŭnaha suda2
Kamientary