BT vačyma biełarusa
PIEŚNI I SARKAFAHI
U sieradu nia sumna prajšli prahramy «Dobraj ranicy» i «Dobry viečar, Biełaruś!» — pra biełaruskija imiony na hieahrafičnaj mapie. Pakazvali mała, zatoje raskazali šmat, dyj hledačy ŭ žyvy efir zvanili. Uzhadali i pra Damiejku, i pra vyspu Połacak, zabylisia chiba tolki pra hornuju chrybcinu Čerskaha.
Sučasnaje biełaruskaje imia, na žal, mała viadomaje šyrokaj publicy, ułasnaj personaj prysutničała ŭ piatnicu ŭ prahramie «Siońnia z vami...» Słynny majstra, aperatar «Biełaruśfilmu» Jury Jałchoŭ; heta jon źniaŭ lubimyja ź dziacinstva «Pryhody Buracina» dy «Čyrvony Kapialušyk». Raspavioŭ pra svaje pryznanyja ŭ Sajuzie vynachodnictvy, zroblenyja ŭ čysta savieckim styli: prychodziłasia ŭłasnaručna vypraŭlać drennuju savieckuju kinastužku. Sp.Jałchoŭ — prychilnik dumki, što pryhažość uratuje śviet; vielmi lubić zdymać prosta kvietki, jak čystuju krasu, i vielmi nia lubić bačyć vializarny «sarkafah» u centry Miensku, jak čysta zusim advarotnaje...
Uviečary hety sarkafah visieŭ fonam praz uvieś teleraskaz pra śviatkavańnie Novaha hodu ŭ Miensku. Mienčuki, što nie dabralisia ŭ noč na try nuli da Kastryčnickaha placu, i astatnija biełarusy pahladzieli na natoŭp, na dobruju iluminacyju, na standartny kancert dy pasłuchali standartnyja słovy vinšavańniaŭ-zyčeńniaŭ ad artystaŭ dy prostych hramadzianaŭ.
Tancy z fajerverkami naprykancy śviata j teleprahramy vyhladali nia vielmi aptymistyčna, bo byli pad słavutuju temu z «Karminy Burany», zusim nie navahodniuju. Da taho ž, jak ni mudravali aŭtary televersii pry mantažy, usio roŭna bačna było, što tancory drenna viedali, što rabić z tymi ručnymi fajerverkami, dy tolki dumali, jak vočy prykryć.
Uvohule padałosia, što asabliva viesieła dy vidoviščna na Kastryčnickim nie było. Čarhovy kancert na adkrytaj placoŭcy, chiba što ź jełkaj dy pryhožymi hirlandami. A sarkafah, jakija dekaracyi pierad im ni buduj dy pad jakim rakursam ni zdymaj, usio adno budzie vyhladać chiba jak maŭzalej.
Pahladzieć, musić, cikava budzie «Džaz unočy» ŭ aŭtorak — bluz i džaz z festyvalu «Bluz žyvie ŭ Miensku». U čaćvier apoŭdni i ŭ piatnicu pad viečar u «Našy krai» — pra ŭdzieł Biełarusi ŭ pieršaj suśvietnaj vystavie XIX st. Amatary sportu musiać nie prapuścić matč zorak Uschodnie-Eŭrapiejskaje chakiejnaj lihi — subota, 17.00.
Arciom Łukjanovič
Ciapier čytajuć
«Na 15 chvilin vyklučyli śviatło — boža moj, z Ukrainaj paraŭnali». Łukašenka patłumačyŭ, kolki ekanomić na vuličnym aśviatleńni34
Kamientary