Naviny

 Naviny

Rada demakratyčnych siłaŭ rašyła pašyryć kolkaść apazycyjnych akcyjaŭ “Viasny 2000” da vaśmi. Try hadziny zasiadała Rada ŭ štab-kvatery “Narodnaje Hramady” i pryniała zajavu, što “Viasnu 2000” maje raspačać Marš Svabody 15 sakavika.

25 sakavika adbudziecca śviatkavańnie Dnia Voli z nahody čarhovych uhodkaŭ BNR. 26 krasavika - Čarnobylski Šlach. 2 krasavika — antyintehracyjnaja akcyja, u traŭni — akcyja suproć źbiadnieńnia žycharoŭ z udziełam prafźviazaŭ, 14 traŭnia — akcyja na ŭhodki referendumu, 1 traŭnia — tradycyjnaja akcyja salidarnaści sacyjał-demakrataŭ.

Chadziŭ za movu dziadźka z Mahilova

U Mahilovie staršynia haradzkoj supołki TBM i aŭtar «Našaj Nivy» Michaś Bułavacki pravioŭ adnaasobnaje šeście pa Pieršamajskaj vulicy praktyčna praz uvieś horad, niesučy na sabie plakaty «Ja mahu dobra vučyć matematycy», «Ja chaču vučyć biełarusaŭ na ich rodnaj movie», «U Mahilovie ŭłady nie žadajuć adkryć nivodnaha biełaruskaha kłasu», «U 99 hodzie 20 medalistaŭ-mahiloŭcaŭ pravalili matematyčnyja ispyty ŭ VNU».

Jak patłumačyŭ vašamu karespandentu sam Michaś Bułavacki, jon, viadomy navat za miežami krainy vykładčyk matematyki, amal 2 hady źjaŭlajecca biespracoŭnym. Adzinaje jahonaje žadańnie — vykładać svoj pradmiet pa-biełarusku. Dyk voś, nie dajuć.

Akcyja była dazvolenaja ŭ małaludnym rajonie. Biespracoŭny vykładčyk parušyŭ hetuju zabaronu. Pad čas šeścia Michaś Bułavacki nie sustreŭ varožaha staŭleńnia z boku milicyi. Zatoje biespracoŭny pedahoh zaŭvažyŭ prykmietnuju abstavinu: akazvajecca, bolšaść z prachožych nia ŭmiejuć biehła čytać. Michasiu Bułavackamu prychodziłasia spyniacca, kab ludzi mahli paśpieć pračytać jahonyja karotkija plakaty. Tak što nia tolki ličyć nia ŭmiejem, ale i čytać taksama.

Symon Hłazštejn

Viarenič, jaki vyjhraŭ spravu ŭ ministerstva

Maskoŭski sud Miensku admoviŭ u zadavalnieńni pazovu Ministerstva ŭ spravach nadzvyčajnych sytuacyjaŭ Biełarusi da vypusknika pažarnaje vučelni Siarhieja Viareniča, jaki admoviŭsia padpisvać kantrakt ab prymusovym raźmierkavańni.

Siarhiej Viarenič pastupiŭ u pažarnuju vučelniu ŭ 94-m hodzie. Administracyja ničoha nie paviedamiła studentam pra toje, što paźniej im daviadziecca padpisvać niejkuju damovu. Pra kantrakt, u adpaviednaści ź jakim kožny vypusknik musić adpracavać nia mienš jak piać hadoŭ, studenty daviedalisia tolki na čaćviertym kursie. Pavodle kantraktu, toj, chto nie padparadkujecca, musić vypłacić hrošy za navučańnie — a heta kala tysiačy piacisot dalaraŭ. Pry hetym administracyja pahražała adličeńniem tym, chto nie padpiša kantraktu. Mnohija, bajučysia, pajšli na chitryki: na blanku svaje źviectki napisali, a podpisaŭ nie pastavili, spadziejučysia na toje, što ŭ hetym vypadku kantrakt budzie niesapraŭdnym. Siarod ich byŭ i Siarhiej Viarenič. Ale kali praz hod jon atrymaŭ dyplom, vyśvietliłasia, što jahony podpis kimści padrobleny. Aburany vypusknik nie pahadziŭsia vykonvać umovy kantraktu. Ministerstva źviarnułasia tady ŭ sud. Sud pryznačyŭ ekspertyzu j vyśvietliŭ: podpis na ŭsich asobnikach kantraktu zrobleny adnoj asobaju, ale kim — nieviadoma.

Jašče para takich spravaŭ lažyć u sudoch. Adkazčykami ŭ ich źjaŭlajucca vypuskniki navučalnych ustanovaŭ, jakija naležać da Ministerstva ŭnutranych spravaŭ.

Pavodle Radyjo Svaboda

Mazyrski zavod abnaŭlajecca

Ahułam na rekanstrukcyju Mazyrskaje rafineryi budzie investavana 125 miljonaŭ dalaraŭ, paviedamiŭ na presavaj kanferencyi Anatol Kupryjanaŭ, dyrektar hetaha pradpryjemstva.

Hrošy daje ŭrad, a taksama kantralavanaja rasiejcami kampanija «Słaŭnafta». Užo zapracavała parahazaelektrastancyja na ŭłasnym vakumnym hazojli, uviedzienaja vytvorčaść nieetylavanych benzynaŭ marak 92 i 95, źjaviłasia mahčymaść dla vypracoŭki 98-ha benzynu. Navučylisia vypracoŭvać ekalahična čystaje dyzpaliva pavodle eŭrapiejskich standartaŭ z utrymańniem siery nia bolej 0,05%. Chutka puściać ustanoŭku kancentravańnia vadarodu. Užo rekanstrujavali ŭstanoŭku vakuumnaj pierhonki mazuty mahutnaściu 1,8 miljonaŭ ton u hod. Druhi etap rekanstrukcyi daviadzie hłybiniu pierapracoŭki nafty da 75%, paśla treciaha j čaćviertaha — pabudovy ŭstanoŭki visbrekinhu hudronu i kompleksu katalityčnaha krekinhu, pad 2003 hod — hłybinia pierapracoŭki dasiahnie 85%. Heta jak u lepšych rafineryjach Eŭropy. Škada tolki, što pad toj čas, mabyć, rasiejskija naftavyja aliharchi, uładalniki Mazyru i ichny Łukašenka ŭžo dazvańnia Biełaruś ad Eŭropy adharodziać.

«Viteła» ŭ Viciebsku

Pieršym rezydentam svabodnaj ekanamičnaj zony ŭ Viciebsku stała «Viteła», daččynoje pradpryjemstva niamieckaha kancernu «Švartaŭ», najbujniejšaha vytvorcy čakaladaŭ. Za dyrektara jany sabie ŭziali Valerja Nieŭšava, byłoha mera Viciebsku. Na abstalavańnie niemcy dajuć 5 miljonaŭ dalaraŭ. Vyrablać fabryka budzie ceły ciahnik čakaladaŭ u miesiac. Padatki ŭ zonie buduć składać na 30% mieniej, čym tak.

Rapno ŭ Miensku

Z 31 studzienia da 17 lutaha ŭ Miensku projdzie retraspektyva filmaŭ Žan-Pola Rapno, pakažuć taksama jahonyja ŭlubionyja kiny. Ciapier kinaklub ładzić hetyja pakazy nia ŭ Profie, jak raniej, a ŭ Domie veteranaŭ na Janki Kupały.

Arestaŭ na čale volnych milicyjantaŭ

Pazaŭčora ŭ Miensku adbyŭsia ŭstanoŭčy schod Lihi aficeraŭ milicyi, stvaraje jakoj byŭ inicyjavaŭ niekali šče Zacharanka. Na kiraŭnika abrali Arestava.

B.T.

Radyjo «Niavola»

U Smurhoniach apošnim časam šmat chto prosić adklučyć im radyjokropki. Sioj-toj tłumačyć prośbu tym, što na pieršaj prahramie radyjo parušajucca ich pravy na atrymańnie praŭdzivaj infarmacyi. U žyćci biespracoŭje, ekanamičny razvał, a na radyjo kažuć, što ŭ Biełarusi nie žyćcio, a raj. Ludzi čakajuć, kab chutčej stali bolš havaryć «Bałtyjskija chvali».

M.V.

Byli biełavieskimi, a stali Naračanskimi

Ź Biełavieskaj puščy ŭ valjery na terytoryi Nacyjanalnaha parku «Naračanski» zavieźli vysakarodnych aleniaŭ. Pakul ich tolki piać, ale abiacali padvieźci jašče.

Marjan Vianhroŭski

Baradzina aryštujuć

Jość u Rasiei niejki Baradzin — ci to achoŭnikam Jelcyna jon byŭ, ci to civunom. Dyk jaho Pucin pryznačyŭ na sakratarstva sajuzu Biełarusi j Rasiei. A štuka ŭ tym, što na hetym tydni švajcarskaja prakuratura vydała mižnarodny order na aryšt hetaha samaha Baradzina za krucielstvy, admyvańnie złačynnych hrošaj i karupcyi. Dobraha hubernatara nam sulić Pucin! Hety Baradzin vystupaŭ na NTV. Žurnalist jamu trapiŭsia taki, što prosta kiški vyjeŭ. Urešcie žurnalist u jaho pytajecca:

— Dyk Vy nie baiciesia aryštu?

— Nia ja bajusia, a mianie bojciesia.

— A sajuz ź Biełarusiaj budzie?

— Nia prosta budzie, a taki budzie Sajuz, što vaša NTV zakryjem.

N.Dz.

Zapčastki dla MIHaŭ

28 studzienia polskaje telebačańnie paviedamiła ab skandale, źviazanym z zapčastkami dla samalotaŭ Mih-29 i Su-22. Ich zakupiła ŭ Biełarusi vajskovaje avijaramontnaje pradpryjemstva z horadu Bydhašč. Košt hešeftu — 5 miljonaŭ dalaraŭ. A skandał usčaŭsia, bo pradpryjemstva nie zapłaciła mytnaha padatku. Pakul nie paviedamlajecca, ci novyja zapčastki zakupali, ci ŭžyvanyja.

Siarhiej Maksimovič

Inhušy na polskaj miažy

Na biełaruska-polskaj miažy ŭ Bruzhach zatrymali 12 inhušoŭ z Inhušecii. Adna žančyna mieła pašpart svajoj siastry, u astatnich u dakumentach znajšli vypraŭleńni. Jany chacieli vyjechać u Polšču, majučy dakumenty, pavodle jakich jany nibyta ŭciekačy z Hroznaha. Im nie pavieryli, zabrali ŭ ich 7000 dalaraŭ — maŭlaŭ, daviedka z banku taksama akazałasia padrobnaj.

Sialanskaja partyja dałučajecca da BNF

Učora na presavaj kanferencyi lider Sialanskaj partyi Jaŭhien Łuhin vystupiŭ z sensacyjnaj zajavaj, što jahonaja partyja dałučajecca da BNF «Adradžeńnie» ŭ jakaści frakcyi «Ziamla i vola». Sialanaŭ dziela małalikaści nie pierarehistravaŭ Miniust. Hetki ich adkaz.

S.M.

Paźniak źbiraje KCHPBNF u Varšavie

Na minuły ŭik-end u Varšavie sabraŭsia Sojm Kanservatyŭna-Chryścijanskaj Partyi BNF (Z.Paźniaka). Mnohija siabry pieražyli pačućcio ščaścia ad sustrečy ź lideram, jakoha nia bačyli ŭžo čatyry hady.

Mienavita pra heta karespandentu Radyjo Svaboda skazaŭ udzielnik Sojmu pinčuk Jaŭhien Šatochin. Što da samoha lidera, dyk jon staviŭ zadačy na budučyniu. Kazaŭ, što najpierš treba skinuć Łukašenku, treba skazać jamu: Łukašenka, sychodź, tvoj čas skončyŭsia. Što vybary pavinien abviaścić Siamion Šarecki. Što ŭ cełym KCHP budzie razam ź inšymi demakratyčnymi siłami zmahacca suprać dyktatury.

Vyhladaje, što mienšaja častka Frontu, jakaja arhanizavałasia paśla letašniaha raskołu BNF, nia stavić pierad saboj novych i aryhinalnych zadač. Pra baraćbu z režymam nia pieršy hod kažuć i inšyja partyi. Ale ŭ kožnaha ŭ hetaj spravie svaja «specyjalizacyja». Tamu ad KCHP čakałasia nie imknieńnie padmianić ci dapoŭnić saboju inšych, a žorstkija farmuloŭki nacyjanalnych intaresaŭ i stratehii nacyjanalnaha adradžeńnia na ciapierašnim etapie. Bo heta jakraz toje, što ŭ prahramach inšych partyjaŭ akreślivajecca nievyrazna.

Dyj skidańnie Łukašenki — nia meta, kali niama vypracavanaha mechanizmu skidańnia i, što važniej, planu budavańnia na miescy skinutaha zusim inšaje systemy kaštoŭnaściaŭ.

Słovam, nia spraŭdzilisia prahnozy aŭtaraŭ «NN» pra ŭtvareńnie na bazie BNF relihijna-palityčnaj supołki — ci to sekty, ci to biełaruskaha Talibanu. Nijakich zajavak na svaju admietnuju rolu ŭ palityčnym žyćci krainy varšaŭski Sojm nia daŭ.

S.P.

Spalenaja carkva ŭ Pareččy: sataniscki śled

Dahetul nieviadomaja aficyjnaja versija pažaru ŭ vioscy Parečča, što na Pinščynie, u vyniku jakoha zhareła pravasłaŭnaja carkva Rastva Chrystova, pabudavanaja ŭ 1912 hodzie zamiest taksama zharełaj papiarednicy na hrošy pareckaha pana Ramana Skirmunta, staršyni ŭradu BNR u traŭni-červieni 1918 hodu, mecenata, vydaŭca lementaru na pareckaj havorcy. Miascovyja aktyvisty savieckaj ułady pa-źviersku Skirmunta va ŭłasnym majontku uvosieni 1939 hodu. Ciapier voś spalili i jahonuju carkvu, što pierastojeła dźvie vajny.

Pažar adbyŭsia na druhi dzień pravasłaŭnych Kaladaŭ i daščentu źniščyŭ draŭlanuju carkvu, adnu z najpryhažejšych na Paleśsi.

Pradstaŭniki pažarnaj słužby pakul nie dajuć aficyjnaj versii ŭźniknieńnia pažaru. Pa fakcie pažaru ŭzbudžanaja kryminalnaja sprava.

Pravasłaŭnyja śviatary ŭpeŭnienyja, što carkvu naŭmysna padpalili, bo ŭ toj dzień słužba skončyłasia kala hadziny pa abiedzie, a pažar zaŭvažyli až praz 13 hadzinaŭ. Kali b pažar pačaŭsia z-za pakinutaj śviečki ci kadziła, dyk mo spachapilisia b raniej. Choć pažarnyja kažuć, što biez prycioku pavietra, h.zn. kali vokny j dźviery pazakryvanyja, i viaskovaja chata budzie tleć dzień, pakul razharycca.

Cikava, što paru hadoŭ tamu ŭ Bieraści raskryli sektu satanistaŭ, a siarod ichnych dakumentaŭ była mapa, na jakoj siarod cerkvaŭ, što satanisty mielisia źniščyć, byŭ i chram u Pareččy. Dahetul nieviadoma, ci ŭsich satanistaŭ tady vyjavili.

Siarod versijaŭ taksama — padpalvańnie z metaj zamieści ślady rabaŭnictva. U chutkim časie kala papiališča planujecca pabudavać nievialiki draŭlany damok, a pakul nabaženstvy prachodziać u vajskovych namiotach. U perspektyvie — adbudova novaha cahlanaha chramu. Na staruju carkvu jon užo ci budzie padobny...

Alaksiej Dzikavicki

Viciebskich unijataŭ abkrali

U piatnicu z kaplicy Ŭvaskrašenskaj hreka-katalickaj parafii Viciebsku skrali abraz «Uspleńnie Praśviatoj Baharodzicy» ChVIII st. i abrazy «Isus Zbaŭca naš» i «Maci Božaja» XIX st. Vyciahli taksama sejf z achviaravańniami parafijanaŭ, pišučuju mašynku ź biełaruskim šryftam i leki, što pryznačalisia na razdaču biednym. Da pošukaŭ skradzienaha dałučyŭsia tutejšy KHB, piša BiełaPAN.

Rok-karonu atrymali «Kryvi»

My nie pamylalisia ŭ minułym numary, nazvaŭšy subotu 29 studzienia dniom «Rok-karanacyi 99». Adnak pamylilisia tyja, chto pryjšoŭ subotnim viečaram da zali «Miensk». Bo ŭ tym šykoŭnym kompleksie, jaki raniej naležaŭ kamunistam, a ciapier — Łukašenku, adbyvałasia... viasielle. Kažuć, syna niekaha z Administracyi.

Dziŭnyja stasunki składajucca ŭ nas z rokam. Ad pryrody svajoj raźniavoleny j pa aznačeńni demakratyčny andehraŭnd pakrysie pieratvarajecca ŭ Biełarusi ŭ elitarny klub. Ad hodu ŭ hod patrapić na «Rok-karanacyi» stanovicca ŭsio ciažej, usio mienš moładzi ŭ zalach dy ŭsio bolš bolš dychtoŭna apranutych ludziej ź dziećmi. Razam z tym uvieś kancertavy kompleks byŭ pierapoŭnieny achoŭnikami ŭ harniturach i milicyjantami ŭ šapkach. Dajšło da taho, što samich muzykaŭ nie puskali na scenu. Dy zrešty...

Rok-karonu atrymali «Kryvi», rok-kniazioŭnaju stała Veranika Kruhłova z «Kryvi», lepšym klipam hodu staŭ klip «Kryvi» «Za tumanam», u naminacyi «Padzieja hodu» pieramoh albom «Śviaty Viečar», u jakim bahata piesień u vykanańni «Kryvi»...

Lepšym albomam stali «Kačułki j kutrynki» «Nejradziubelu». Lepšaj pieśniaju hodu staŭ «Pavietrany šar» hrupy «NRM». Lepšym muzykam — Siarhiej Truchanovič. Uznaharodzili j «archivaryjusa» Źmitra Padbiareskaha, lepšaha žurnalista hodu. U naminacyi «Słuchaj svajo» vybrali Viktara Šałkieviča, čyj samotny śpieŭ pra muzyku Siarožu vidavočna dysanavaŭ sa zvonam kryštalovych karonaŭ, blaskam bukietaŭ i čynavienskaj architekturaju zali «Miensk»... Kaliści prostyja rečy...

Kasiu Kamockuju nazvali Žanaju d'Ark biełaruskaha rok-n-rołu. A «Naša Niva» padaryła Kasi svoj pryz: novyja knihi z seryi «Vostraja Brama» j kvietki... Hetym razam našaja naminacyja zvałasia «Za pašyreńnie svabody».

Amatar

Haradzienščyna žyviolnaja

29 studzienia «Moładzievaja inicyjatyva za pravy žyvioł» vystaviła pikiet pratestu kala Domu pijaneraŭ, u basejnie jakoha ciapier płavajuć dva delfiny i marski leŭ

Vital Skorb, adzin ź jaje lideraŭ, patłumačyŭ, što mučyć biednych žyviolin — złačynstva, i prapanavaŭ i mnie padpisacca pad hetymi słovami na papiery. Pikietčyki razdavali taksama ŭlotki, jakich, praŭda, było vielmi mała, navat karespandentu «NN» nie dastałosia. Va ŭlotkach raspaviadałasia pra pakuty pasažyraŭ, jakija jeduć savieckim ciahnikom Simferopal—Horadnia, i ab pakutach delfinaŭ, jakich viazuć hetym ža šlacham, ale ŭ cysternach. «Kali vy suprać hetkaha ździeku z žyvioły, dyk nie kuplajcie biletaŭ na haradzienskija pradstaŭleńni z udziełam delfinaŭ i marskoha lava!» — zaklikaje ŭlotka. Hastroli Krymskaha delfinaryju raspačalisia pierad samym Novym hodam i praciahnucca da 20 lutaha. U Horadniu delfinaŭ pryvieźli ź Bieraścia. Škada ich, viadoma, ale ja paraiŭ by maładym abaroncam nie čakać nastupnaha pryjezdu delfinaŭ, a pasprabavać što-niebudź zrabić dla našaha zaaparku. Źviary tam strašna mučacca ŭ ciesnacie. Słon Surak, jakoha pryvieźli z HDR, 35(!) hadoŭ prastajaŭ na adnym miescy — pobač svajho nievialikaha chlava, dzie jon śpić i znachodzicca ŭzimku. Hetkaj vialikaj žyviolinie patrebna ž miesca dla špacyru! Dziva što ŭ 1998 h. słon zabiŭ žančynu, jakaja pryjšła jaho karmić. Darečy, u haradzienskaj lakarni dla sabak, katoŭ i chatniaj žyvioły taksama žachlivyja ŭmovy. Dzie čałavieku kiepska žyć, tam i sabakam pahatoŭ. Adzinaje raduje, što choć pamiežnickim pašancavała bolej. Tolki što pieršyja ŭhodki adznačyła kinalahičnaja škoła pamiežnych vojskaŭ u Smurhoniach. Choć tam dla lekavańnia sabak stvorany bolš-mienš ludzkija ŭmovy, jość navat dobra abstalavany radzilny pakoj. Vidać, što pierajmajuć tradycyi Smurhonskaj miadźviežaj akademii. Delfiny, jak i ludzi, musiać vyžyvać, prymać praviły hulni. Adzin ź ich navat «maluje», vysunuŭšysia z vady, kremzaje na papiery zacisnutym u dziubie pendźlem. Chtości z hledačoŭ zapłaciŭ za karcinu piać miljonaŭ (starych) rubloŭ. Ja b taksama zapłaciŭ, kab hetyja hrošy pajšli na vyzvaleńnie žyvioły.

Siarhiej Astraŭcoŭ

Rajonnyja cyrymonii

Pa Haradzienščynie prajšła chvala śviatkavańniaŭ — rajony vobłaści adznačyli 60 hadoŭ. Razdali sotni hramataŭ, padarunačkaŭ, kanvertaŭ z denaminavanymi rublami. Rajony stvaryli 15 studzienia 1940 hodu — zamiest raniejšych pavietaŭ. Paviety ŭ nas praisnavali z 1413 da 1940 hodu. Ale ichnych jubilejaŭ nichto nie śviatkuje.

Vinšavali j sa stalicy. Łukašenka dasłaŭ telehramu tolki ŭ Haradzienski rajon. Astatnich vinšavaŭ Linh, a niekatorych taksama Małafiejeŭ dy Miaśnikovič. Abłvykankam razasłaŭ «padziačnyja listy», pryčym u niekatorych rajonach — kankretnym asobam, a ŭ Voranaŭskim i Ščučynskim tolki «pracoŭnym kalektyvam».

Mary pieršych hadoŭ niezaležnaści, kab pamianiać savieckuju administracyjnuju systemu, — zabytyja, načalstvu ciapierašniaja padabajecca. Reforma adbyvajecca tolki ŭ susiedziaŭ — palakaŭ i litoŭcaŭ. Paviety ŭ nas praisnavali z 1413 da 1940 hodu. Palaki ŭ siabie chočuć ich viarnuć. Zrešty, chaj by i rajony byli, ale ž u karaleŭskaj Horadni jany nazyvajucca «Leninskim» i «Akciabarskim».

Samy-samy z rajonaŭ, kaniečnie, Haradzienski. Saviety spačatku padzialili były paviet na čatyry rajony, ale potym nazad złučyli. Tolki Druskieniki, jakija zaŭždy byli ŭ składzie Haradzienskaha pavietu, Stalin addaŭ Litvie. Zrešty, sam paviet doŭhi čas byŭ u Trockim vajavodztvie, što natchniaje ciapierašnich niezaležnych litoŭcaŭ, chacia ichnych ziemlakoŭ u nas usiaho žmieńka.

Siońnia Haradzienskim rajonam kiruje tav.Kamarec. Lehiendarnaja ŭ peŭnym sensie asoba. Pačynaŭ jon u kałhasie Volhi Sołamavaj, jaki nieŭzabavie skasavali, dałučyŭšy da inšaha. Pierajšoŭ u kałhas Zasłonava, ale jaho chutka ŭłučyli ŭ «Šlach da kamunizmu». Zatym tav.Kamarec apynuŭsia ŭ «Pabiedzie», ažno i jaje nia stała. A jak uziaŭsia za ŭvieś rajon, dyk nas pryščapili da Rasiei. Lohkaja ruka ŭ čałavieka.

Jak uspaminaje Fiodar Aŭčyńnikaŭ z Uschodniaj Biełarusi, jaki byŭ prysłany ŭ kancy 39-ha składać plan novaha — Haradzienskaha — rajonu, uličvałasia pry hetym — aproč darožnaj sietki abo ekanamičnaha stanu — taksama takaja reč, jak «prychilnaść nasielnictva». Zrešty, i palaki heta ŭličvali. U Haradzienskim paviecie najbolš hałasoŭ nabirali biełaruskija deputaty. Tady na parlamenckich vybarach da Haradzienskaj vybarčaj akruhi dałučyli aŭhustoŭskija miaściny, dzie nasielnictva było niebiełaruskaje... Za raspracoŭku planu-mapy rajonu F.Aŭčyńnikaŭ atrymaŭ padziaku, hrašovuju premiju i dva tydni adpačynku.

Vielmi viasiołym było śviatkavańnie ŭ Iŭi. Ministar abarony prysłaŭ vajskovy ansambal pieśni i plaski — ciešyć publiku, dy padarunki — čatyry «ŭrały» i aŭtakran. Pryjechaŭ asabista tav.Małafiejeŭ, jaki całkam pierajšoŭ na intehratarskija rejki i ŭ piśmovym vinšavańni nazvaŭ krainu «Biełoruśsijej». Abłasnyja ŭłady raptam paviedamili ŭ vinšavalnaj hramacie, što mienavita ŭ Iŭi (a nia ŭ Jeŭi, što za Vilniaj, Vievis ciapier. Zrešty, jakaja im roźnica!) była ŭpieršyniu vydadzienaja hramatyka Mialecija Smatryckaha.

Dyrektar miasakambinatu z susiednich Ašmianaŭ uračysta ŭručyŭ kaŭbasnyja pakunki staršyniam iviejskich kałhasaŭ, astatnim zastałosia tolki paradavacca za lepšych svaich pradstaŭnikoŭ. Zaviaršyłasia ŭsio futbolnaj hulnioj u spartyŭnaj zali. Zbornaja pałaty pradstaŭnikoŭ plus uradu zavitała ŭ pravincyjnaje Iŭje! Kab raźbić miascovuju kamandu ź likam 13:6.

U Ašmianach tym časam vyrašyli, što pakul nie hatovyja da śviatkavańnia ŭhodkaŭ i pieranieśli jaho ažno na 18 lutaha, chacia rajony byli stvoranyja ŭ adzin dzień. Dziva što, kali tamtejšaja rajonka narakaje na miascovy miasakambinat, paviedamlajučy pra pustyja palicy ŭ ašmianskich kramach. Maŭlaŭ, na samym bačnym miescy adno papierki z «normami odpusku» krupaŭ, cukru, muki. Ale aproč makarony, cukierak i darahoha vina, jakoje nichto nie biare, bolš kupić niama čaho. I heta ŭ pamiežnym ź Vilenščynaj miastečku, pa naš bok «žaleznaj zasłony».

Siarhiej Astraŭcoŭ