Michał Zaleski. Nad Buham i nad Śvisłačču

pazytyvy

Nad Buham i nad Śvisłačču

Zachodniaja Biełaruś. Bieraście. Abłvykankam. 16 červienia 2000 hodu. 8-ja ranicy.

Pierad uvachodam aŭtamabili sialanaŭ i dyplamataŭ, bujnych čynoŭnikaŭ i kapitalistaŭ. Na hanku vielmi prystojnyja milicyjanty (biez kamuflažu). Lotajuć karespandenty ź mikrafonami i telekamerami.

A dziela čaho ŭsio hena? Dy prosta na zamienu ramantyčnamu tryźnieńniu nakont taho, chto ŭratuje, nakormić i h.d., pryjšło prahmatyčnaje imknieńnie zarablać hrošy na vytvorčaści i prodažu praduktaŭ charčavańnia.

Apantanyja idejaj dachodu hramadzianie susiednich eŭrapiejskich krainaŭ źjechalisia (za svoj košt), panapryvozili svajoj pradukcyi i reklamy, aktyŭna papracavali. Sponsaraŭ i hrantasosaŭ nie nazirałasia. Patencyjnyja investary i partnery pa kamercyi viali havorku pra kankretnyja pytańni. Pryniali adozvu (pa-polsku i biełarusku) da hramadzianaŭ, ustanovaŭ i uradaŭ Polščy i Biełarusi, kab spryjali dobraj spravie.

Potym smačna padjeli i, adpačyŭšy, pajechali sabie pracavać dalej, damoviŭšysia nastupny raz sustrecca ŭ Biełaj Padlaskaj.

Tym časam nad Śvisłačču

Ministar zamiežnych spravaŭ Urał Łatypaŭ paviedamiŭ, što my zajmajem ścipłaje miesca ŭ druhoj sotni suśvietnaha rejtynhu investycyjnych mahčymaściaŭ. Ahulny abjom zamiežnych investycyjaŭ u našu ekanomiku vahajecca kala 60 USD na čałavieka. Mieniej navat u SNH nichto nie atrymlivaje.

Stała viadoma, što 70 000 biełarusaŭ pracuje ŭ sumiesnych z zamiežnikami (SP) albo całkam zamiežnych pradpryjemstvach (ZP). Na žal, ministar nie adznačyŭ, ci mocna pakutujuć našyja braty, jakija patrapili ŭ pastku suśvietnaj kapitalistyčnaj ekspluatacyi ŭ paraŭnańni z volnymi kałhaśnikami.

Uva ŭsiakim razie, prykutyja da kalaśnicy imperyjalistyčnaha Małocha ziemlaki, kolkaść jakich składaje 1,5% zaniatych ŭ nacyjanalnaj ekanomicy, vyrabili amal dziasiatuju častku VNP i ekspartnaj pradukcyi. Niebaraki pracujuć takim čynam u siem razoŭ bolej za siaredniaha hiehiemona, a atrymlivajuć jany tolki ŭ try-čatyry razy bolej.

Darma, zdajecca, spasyłaŭsia ministar na palityčnyja nieparazumieńni i 250 błytanych zakonaŭ pra SP i ZP, pryniatych našymi stachanaŭcami-deputatami. Jość hłybiejšyja pryčyny, ź jakich 95% zamiežnych torbaŭ z hrašyma bajacca siniavokaj respubliki-partyzanki.

U interviju BT Hałoŭny Načalnik sp.Łatypava skazaŭ: «My svaje pradpryjemstvy nie pradajem navat siabram».

A jak na maju dumku, dyk biełaruskuju formułu supracoŭnictva vydumlać nia treba: «Žyvicie sabie, jak braty, ale rachujciesia, jak žydy».

Michał Zaleski

P.S. Dla supracoŭnikaŭ orhanaŭ pa baraćbie z presaj. Hetaja prymaŭka nie nakiravanaja na raspalvańnie mižnacyjanalnaj varožaści, adno padkreślivaje schilnaść habrejaŭ da matematyki i ekanomiki, pavahu biełaruskaha narodu da vialikaha habrejskaha narodu i nieprynaležnaść aŭtara da sijanisckich i antysemickich uzbrojenych farmavańniaŭ.