Vyrašalny miesiac
Až 25 inicyjatyŭnych hrupaŭ źviarnulisia ŭ Centravybarkam pa rehistracyju. Pieršyja ź ich užo zarehistravanyja – u tym liku i hrupa Paźniaka.
Inicyjatyŭnaja hrupa lidera nacyjanał-kanservataraŭ składajecca z 1429 čałaviek. Udzieł Zianona ŭ kampanii istotna źnižaje šancy inšaha pravanarodnickaha kandydata — Siarhieja Antončyka, u hrupie padtrymki jakoha 1160 čałaviek. Hetaje kolkaści moža być dastatkova, kab sabrać za 20 dzion 100 tysiačaŭ podpisaŭ vybarcaŭ, nieabchodnych dla rehistracyi kandydatam u prezydenty, ale nišy ŭ pieradvybarnym raskładzie dla Antončyka nie zastajecca. Pryjdziecca jamu jašče piać hadkoŭ pačakać.
Da piaciorki demakratyčnych kandydataŭ dałučyŭsia novy pierabiežčyk z łukašenkaŭskaha stanu — pasoł u Łatvii Michaił Marynič. Jahonaja hrupa padtrymki nievialikaja (811 čałaviek), a vyłučeńnie adbyłosia chutčej praz asabistuju ambicyju. Heta svojeasablivy kryk sumleńnia maładoje biełaruskaje namenklatury, nie padmacavany, adnak, salidnymi strukturami. Ale j Marynič nia budzie lišni, kali vakoł adzinaha kandydata demakrataŭ stvorycca šyrokaja kaalicyja. Na pazycyjach piaciorki staić taksama lider prafsajuzu ahrarnikaŭ Alaksandar Jarašuk sa svaimi 1210 prychilnikami, taki sabie dublor Hančaryka. Uładzimier Hančaryk, niemałady i chitramudry kiraŭnik Federacyi prafsajuzaŭ maje najbolšuju siarod demakrataŭ inicyjatyŭnuju hrupu (4067 čałaviek). Heta trochi bolej, čym u Siamiona Domaša (3756 čałaviek). Hetyja dva, vidać, i źbiaruć najbolej podpisaŭ siarod kandydataŭ-demakrataŭ. U hrupie Kazłoŭskaha — tolki 1609 siabroŭ, u Kalakina — 2076.
Siarod rusafiłaŭ najbolšuju hrupu padtrymki zarehistravaŭ sam Łukašenka (3830 čałaviek). U reklamavanych rasiejskimi ŚMI Sinicyna i Mašeravaj adpaviedna 1976 i 1282 čałavieki. Apošnija naŭrad ci źbiaruć nieabchodnuju kolkaść podpisaŭ biez padtrymki “administracyjnaha resursu” i/abo nabližanych da ŭłady biznesmenaŭ. A mahčymaść takoj padtrymki nia vyklučanaja. Toje, što ŭłady robiać staŭku na stvareńnie “masoŭki”, jakaja b dezaryjentavała vybarcaŭ, paćviardžajecca vyłučeńniem na prezydenty “hramadzkich dziejačaŭ” kštałtu pradprymalnika Dańkova, dyrektara zavodu chaładzilnikaŭ Kałuhina, deputata pałaty pradstaŭnikoŭ, kiraŭnika ZAT “Handlovy Dom BiełBabajeŭskaje” Siarhieja Skrabca ci vice-prezydenta mižnarodnaj asacyjacyi “Abarona pravoŭ čałavieka” Mikałaja Miakieki. Tamu nia budziem ździŭlacca, kali niejki taki Miakieka ci Mašerava 100 tys. podpisaŭ i źbiaruć.
Narešcie, apošniuju hrupu kandydataŭ składajuć “płyŭcy ŭ mutnaj vadzie” — lider liberał-demakrataŭ Hajdukievič, samotny palityk Ciareščanka (z najbolšaj inicyjatyŭnaj hrupaj — 6069 čałaviek), Valery Levanieŭski (jahonaja j Čyhirova hrupy abjadnali namahańni pa zbory podpisaŭ, što jašče raz dakazvaje, nakolki słabyja tyły maje taki ž “adzinoki” palityk Čyhir z svaimi 1485 zborščykami).
Samo toje, što ŭ krainie jość 20 tysiačaŭ palityčnych aktyvistaŭ, hatovych źbirać podpisy za niezaležnych kandydataŭ, ciešyć. Jak i toje, što ludzi nie bajacca brać udzieł u vybarach. Jak i adstaŭka Čykina z pasady kiraŭnika BT, jakaja nanosić surjozny ŭdar pa pazycyjach rusafiłaŭ u łukašenkaŭskaj administracyi.
Kraina čakaje. Nichto nia moža pradkazać, jak buduć raźvivacca padziei. Miesiac zboru podpisaŭ i rehistracyi vyjavić, chto z kandydataŭ i hrupovak jaki patencyjał maje , ci zdolejuć demakraty vyłučyć adzinaha kandydata, ci buduć vybary elementarna demakratyčnymi. Pacierpim miesiac.
Mikoła
Kamientary