Z usioj krainy

Z usioj krainy

Pravasłaŭnaja carkva pakul nia vykazałasia

Paabiacanaha na minułym tydni aficyjnaha kamentaru ad Biełaruskaha ekzarchatu Rasiejskaj pravasłaŭnaj carkvy z nahody zakryćcia “Hołasu dušy” my tak i nie dačakali. U pres-słužbie mitrapalita Fiłareta “NN” adkazali, što mohuć prapanavać tolki kamentar archimandryta Iaana, sakratara Mienskaha jeparchijalnaha ŭpraŭleńnia Biełaruskaha ekzarchatu Maskoŭskaha patryjarchatu, dadzieny im Kiestonskaj słužbie navinaŭ. Maŭlaŭ, kali jość heta, to turbavać samoha ŭładyku nia varta. U stužcy Kiestonskaj słužby navinaŭ, dasłanaj nam z pres-słužby Fiłareta, nam nie ŭdałosia znajści ani słova archimandryta Iaana, jakoje b tyčyłasia zakryćcia “Hołasu dušy”. Toj tolki skazaŭ, što na Pieršym biełaruskim radyjokanale iduć subotniaja pravasłaŭnaja prahrama, a taksama jahonaja niadzielnaja kazań.

Ihnat Čakacki

Škłoŭski Łas-Vehas

Za Škłovam na Łysaj hary pabudujuć kulturna-zabaŭlalny centar. Kažuć, ideju padkazaŭ Uładzimier Kanaploŭ. Buduć kaviarni, damki dla siamiejnaha adpačynku, kancertnaja placoŭka, spartovaja zala. Načalstva, vidać, nia viedaje, što ŭ narodnaj śviadomaści Łysaja hara — miesca hulbiščaŭ viedźmakoŭ i čarciej.

Mahiloŭskija śviatłafory

Specyjalisty Mahiloŭskaha instytutu prykładnoj optyki raspracavali novy śviatłafor. Jon spažyvaje ŭ 5 razoŭ mieniej elektryčnaści, maje harantavany termin pracy 10 hadoŭ, a kaštuje ŭdvaja mienš za impartnyja analahi.

Symon Hłazštejn, Mahiloŭ

Chvarejuć na trychineloz

U Słonimie — uspyška trychinelozu (heta takija duža ŭjedlivyja hlisty). Špitalizavanyja piaciora. Jašče ŭ vaśmioch lohkaja forma zachvorvańnia. Krynicaj zaražeńnia stałasia miasa ŭpalavanych dzikoŭ, jakoje nie prajšło adpaviednaj veterynarnaj ekspertyzy. Źjaviŭsia trychineloz i ŭ Siańnie na Viciebščynie — tam zachvareli piać čałaviek. Kab nie zarazicca, treba praviarać miasa svojskich i dzikich žyviołaŭ u vetlabaratoryjach. Letaś na trychineloz chvareli 33 čałavieki, u 2000 h. — 69.

Pavodle “Hazety Słonimskaj”

Małpy źmierźli

Bieraściejcy amal nie naviedvajuć Tulskaha źviaryncu, što staić zaraz tabaram kala Kobrynskaha mostu. Pavodle damovy, hości z Tuły musiać prabyć u Bieraści da kanca lutaha, ale nieviadoma, ci datryvajuć: hrošaj niama, a darma miascovyja miasakambinaty karmić źviaroŭ nia chočuć. Šče adna biada — biełaruskija marazy. Najbolš bajacca choładu straŭs i małpy.

U komie — čatyry miesiacy

Dva zahadčyki adździaleńniaŭ Pinskaje radzilni časova pazbaŭlenyja svaich pasadaŭ z-za taho, što adna maładaja dziaŭčyna voś užo čatyry miesiacy znachodzicca ŭ komie. Jana nie pračnułasia paśla aperacyi, i medyki pakul nia mohuć dać rady. Pryčynaj komy stałasia, vidać, nadmiernaja doza narkozu pierad pačatkam aperacyi.

Zamaroziła harełka

Z pačatku zimy ad pieraachałodžańnia na Bieraściejščynie zahinuli 15 čałaviek. Usie śmiarotnyja vypadki adbylisia ŭ śniežni. Samaja vialikaja kolkaść achviaraŭ zarehistravanaja ŭ Baranavičach — 7 čałaviek. Z abmaražeńniami zbolšaha traplajuć niećviarozyja ludzi.

I.Chviedarovič, Kobryń

Sto litraŭ śpirtu

Žychar Litvy ŭ svaim aŭtamabili “nisan” zrabiŭ tajnik, kab vazić śpirt. Źmiaščałasia tudy až sto litraŭ, adno što zakryvaŭsia tajnik, vidać, niedastatkova hiermetyčna, bo pamiežniki na punkcie kantrolu “Katłoŭka” ŭniuchali «hruz». Aŭtamabil i śpirt trapili ŭ Ašmianskuju mytniu dla dalejšaha raźbiralnictva. Litoviec, mabyć, pojdzie dachaty pieški.

Marjan Vianhroŭski, Astraviec

U biblijatecy niama hazetaŭ

U Hłuskuju centralnuju biblijateku ad Novaha hodu pastupaje tolki 12 biełaruskich hazetaŭ. Na inšyja nie chapaje hrošaj.

Ihar Kiryn, Hłusk

Stolinskija “varahi”

Staršynia kałhasu imia Alaksandra Nieŭskaha (Smurhonšyna) Zianon Stelmach zaprasiŭ na pracu 5 čałaviek až sa Stolinščyny, daŭ im žyllo. Stelmach kaža, što palešuki dobra pracujuć, a na svaich užo nadziei niama: nadta łasyja da harełki.

Anton Ahinski, Smurhoni

Milicyja achoŭvaje lebiedziaŭ

Niezvyčajny kłopat uziali na siabie supracoŭniki Kobrynskaha HRUUS. Štoranicy jany spuskajucca pad stary most na Muchaŭcy, dzie vada nie zamiarzaje, kab padkarmić chlebnymi akrajcami dy inšymi prysmakami čarodku biełych lebiedziaŭ, što ź niejkaje pryčyny nie palacieli ŭ vyraj.

I.Chviedarovič, Bieraście

Achviary ŭ Baranavičach

Vialikija marazy dalisia Baranavičam ŭ znaki. Adnak i adliha nie pryniesła palohki: ludzi stali čaściej padać i kalečycca.

Jak raspavioŭ zahadčyk traŭmatyčnaha adździełu Baranavickaj bolnicy Ivan Niamiera, padčas marozu ŭ śniežni — pačatku studzienia abmaroziłasia prykładna 10 čałaviek, ź ich trom daviałosia rabić amputacyi. U asnoŭnym heta pjanicy j bamžy. Ciapieraka vielmi šmat narodu źviartajucca ŭ bolnicu z roznymi traŭmami. Tolki ŭ apošniuju niadzielu, 20 studzienia, kali nie pracavali palikliniki, u haradzki špital źviarnulisia 44 čałavieki ź pierałomami, strasieńniem mazhoŭ i ŭdarami.

Rusłan Raviaka, Baranavičy

Biełaruś sabatuje sajuzny biudžet

Praporcyja ŭnioskaŭ u sajuzny biudžet dla Rasiei i Biełarusi składaje adpaviedna 65 i 35%. U 2001 h. Biełaruś pieraličyła tolki tracinu hrošaŭ ad patrebnaha — 30,2%. U 2000 h. było jašče mieniej — 29,8%. Naša respublika ihnaruje finansavańnie sajuznych prahramaŭ vytvorčaści intehralnych mechanizmaŭ, jakasnaj małočnaj pradukcyi, mašynavytvorčaści dla šviejnaj pramysłovaści, bo nia bačyć u ich vyhady dla siabie.

Drakonaŭski zakonaprajekt ab partyjach

U Pałacie pradstaŭnikoŭ znachodzicca zakonaprajekt, jaki praduhledžvaje zabaronu partyjaŭ za adnarazovaje parušeńnie zakanadaŭstva ab masavych mierapryjemstvach, kali jany paciahnuli za saboj “istotnuju škodu”, takuju jak parušeńnie ruchu transpartu, kalectva ci hibiel ludziej, naniasieńnie ŭronu ŭ pamiery 10.000 minimalnych zarobkaŭ. Analahičnyja papraŭki mohuć być uniesienyja i ŭ zakon “Ab schodach, mitynhach, vuličnych šeściach, demanstracyjach i pikietavańni”.

“Biełaruśkalij” sudzicca z šachciorami

Siońnia Mienski abłasny sud razhladaje pazoŭ “Biełaruśkaliju” pra pryznańnie niezakonnym rašeńnia salihorskich šachcioraŭ pravieści 1 lutaha zabastoŭku pratestu suprać parušeńnia pravoŭ prafsajuzaŭ.

Žurnalisty niezaležnych ŚMI jeduć u ZŠA

Hałoŭnyja redaktary “Pahoni” Mikoła Markievič, “Narodnaj voli” Iosif Siaredzič, Biełorusskoho rynka Viačasłaŭ Chadasoŭski i vice-prezydent BAŽu Andrej Bastuniec naviedajuć 3—10 lutaha Ńju-Jork i Vašynhton na zaprašeńnie Mižnarodnaj lihi pravoŭ čałavieka. U ZŠA biełaruskija žurnalisty sustrenucca z supracoŭnikami AAN, členami Kanhresu ZŠA, žurnalistami tamtejšych ŚMI.

Prarasiejskaja zajava sacyjał-demakrataŭ

BSDP (NH) vykazała zakłapočanaść z nahody admovy biełaruskich uład ad vykanańnia raniej dasiahnutych pahadnieńniaŭ z kampanijaj “Bałtyka” pa pryvatyzacyi AAT “Krynica”. Sacyjał-demakraty śćviardžajuć, što Łukašenka nia choča prytrymlivacca damoŭlenaściaŭ, bo ekanamičnyja reformy mohuć abmiežavać jahonuju adzinaasobnuju ŭładu. Upieršyniu biełaruskaja palityčnaja siła vystupiła ŭ padtrymku rasiejskaha ŭłaśnika nasupierak pašyranamu mierkavańniu pra nieabchodnaść tarmazić prychod rasiejskaha kapitału ŭ Biełaruś. Zrešty, mo pryčyna ŭ tym, što “Bałtyka” naležyć švedam?

Novyja pryznačeńni

Alaksandar Pietraš pryznačany pieršym namieśnikam ministra justycyi, Vital Kałuhin, Valery Mackievič, Piotar Falko — namieśnikami ministra justycyi, Anatol Śvierž — pieršym namieśnikam ministra finansaŭ, Ivan Zajaš, Alaksandar Kurłypa, Ivan Šuńko — namieśnikami ministra finansaŭ, Anatol Dazoraŭ — pieršym namieśnikam ministra sielskaj haspadarki i charčavańnia, Mikałaj Papkoŭ i Anatol Rubanik — namieśnikami ministra sielskaj hapadarki i charčavańnia, Piotar Bucin — dyrektaram departamentu pa chlebapraduktach, Vasil Padalaka — pieršym namieśnikam ministra pryrodnych resursaŭ i navakolnaha asiarodździa, Alaksandar Apacki i Valancin Mališeŭski — namieśnikami ministra pryrodnych resursaŭ i achovy navakolnaha asiarodździa.

E.Ł.

Refarmavańnie Akademii

U aŭtorak na naradzie ŭ NAN Biełarusi z udziełam kiraŭnika dziaržavy abmiarkoŭvalisia pytańni refarmavańnia systemy navuki. Mahčyma, NAN atrymaje funkcyi orhanu dziaržaŭnaha kiravańnia, stanie mocna centralizavanaj i budzie adyhryvać rolu ministerstva. Zamiž ahulnaha schodu akademii planujuć zrabić Hieneralnuju asambleju, kudy ŭvojduć pradstaŭniki ŭsich navukovych ustanovaŭ, u jakich pracuje dziesiać i bolej daktaroŭ navuk. Buduć tam pradstaŭniki VAK i Biełpatentu. A ŭ skład Prezydyjumu akademii pavinny ŭvajści pradstaŭniki dziaržaŭnych orhanaŭ, jakija majuć dačynieńnie da kiravańnia navukaj. Nijakaha kančatkovaha rašeńnia jašče nie pryniata. Prafesar Chadyka ŭ interviju radyjo “Svaboda” ŭchvaliŭ miery, prapanavanyja Miaśnikovičam dla refarmavańnia systemy navuki.

paciarpiełyja za Biełaruś

Za arhanizacyju adukacyjnaha seminaru dla niezaležnych naziralnikaŭ na vybarach zvolnienaja pracaŭnica stałoŭki sa Škłova Luboŭ Kavierka. Za raspaŭsiud drukavanych materyjałaŭ KCHP BNF na minułym tydni ŭ Viciebsku zatrymany Ŭładzimier Pleščanka. 22 studzienia Pleščanka zatrymany znoŭ. U Baranavičach spravy niepaŭnaletnich, što brali ŭdzieł 9 śniežnia ŭ Dni abarony pravoŭ čałavieka, razhladaŭ haradzki adździeł adukacyi i pakoj niepaŭnaletnich. Alinie Bołbat, Ramanu Hrynieviču, Alaksieju Jezavitu, Viktaru Pałulechu vyniesiena papiaredžańnie za ŭdzieł u niesankcyjavanym šeści, a baćkam A.Maryfijanskaj vynieśli papiaredžańnie za złosnaje ŭchileńnie ad vychavańnia dački. Kaciu Dziarkač adrazu adpuścili i navat pratakołu nia skłali. Bo jašče dziaŭčynka – 13 hadoŭ joj tolki.