My prybirajem kropki nad “i”!
Siońnia ŭ našym analityčnym klubie razvažajuć pra źmienu kiraŭnika Federacyi prafsajuzaŭ. U dyskusii biaruć udzieł viadomy žurnalist Tykubovič, Zmahar niabačnaha frontu, žurnalist u cyvilnym Kaladop i litaratar-słavianin Kaściam.
Zmahar: Antybiełaruskaja ŭłada rukami svaich ža hramadzianaŭ iznoŭ pieraškadžaje nam viarnucca ŭ Eŭropu nia tolki cyvilizacyjna (my ŭ joj i tak znachodzimsia), ale i arhanizacyjna. U Federacyju prafsajuzaŭ z Administracyi prezydenta padkinuli šparhałki z dadzienymi Kozika i budučymi pramovami. I Franc Vitko zaznaŭ pieraśled režymu! Usio heta nahadvaje Niamieččynu 1933 hodu, kali Hitler pačaŭ baraćbu z partyjami j inšadumstvam!
Kaladop: Jaki Hitler! Vitko ž nie vinavaty, što naradziŭsia biaz zmyčki z uładaj… Voś Kozik — inšaja sprava. Łukašenka nienavidzić jaho za pravał sajuznaje damovy, tamu j abraŭ takuju žachlivuju karu. Nie pasłaŭ atašom ŭ Paŭdniovaludajedzkuju respubliku, nia skinuŭ z hielikoptera ŭ paleskija bałoty, a pastaviŭ kiravać prafsajuzami — kab byŭ pad rukoj na čas vychadu sa stuparu, vyklikanaha adździaleńniem katlet ad much. Voś tady Koziku mała nia budzie!
Kaściam: Kozik rychtuje dziaržaŭny pieravarot! I na tym tydni nad Mienskam lotała viernaja jamu avijacyja! Dumajecie, irackaja delehacyja vypadkova da nas pryjaždžała? Heta Kozik ich pazvaŭ — choča stvaryć z Sadamam Chusejnam žydamasonskuju zmovu suprać našaha słavianskaha viciazia!
Tykubovič: Kalehi, nu što heta za palityčnyja halucynacyi? Vitko ž uvosień abiacaŭ: kali za dva miesiacy nie adnaŭlu sacyjalnaha partnerstva z uładaj — sydu sam. Tak što ciapier majem poŭnaje prava abirać novaha kiraŭnika FPB šlacham hałasavańnia Haranta Kanstytucyi…
Kaladop: Pavodle infarmacyi, atrymanaj šlacham radyjopierachopu, siońniašniaja sytuacyja ŭ FPB vyklikanaja chutčej nie žadańniem ułady ŭziać pad kantrol prafsajuzy praz pryznačeńnie Kozika, ale pamknieńniem raźviazać ruki Vitku. Jość źviestki, što jon užo vybiraje sabie pasadu z prapanavanaha Harantam śpisu.
Kaściam: I ja čytaŭ u “Połymi”, što ŭ chutkim časie jaho pryznačać kiravać Akademijaj navuk. Siońniašni ž jaje prezydent Michaił Miaśnikovič, mocny haspadarnik savieckaje zahartoŭki, zrobicca dyrektaram Kupałaŭskaha teatru. Tam sytuacyja patrabuje nieadkładnaha ŭmiašańnia ŭmiełaha kiraŭnika. Vy tolki padumajcie: dekaracyi cełaj nie zastałosia! A prafsajuzy ja b uvohule źniščyŭ, dałučyŭšy da našaha vydavieckaha chołdynhu. Navošta jany ŭ hramadztvie, dzie kožnaha pracoŭnaha abaraniaje asabista Alaksandar Ryhoravič Łukašenka? My ž nie ŭ Niamieččynie žyviom, dzie pracoŭnych biaźlitasna ekspluatujuć.
Kaladop: Kab nia Kozik — my b užo byli subjektam federacyi!
Talib (uvachodziačy): Jakaja federacyja! Jaki sajuz? Vy što tut — papierahravalisia ŭsie? Pajechali lepiej na Pcič! Ja novy kupalnik nabyła.
Redakcyja ŭściešanaja, što hetym razam uklučać pažarnuju syhnalizacyju i vyklikać psychijatryčnuju bryhadu nie spatrebiłasia.
Adździeł analityki
Kamientary