Na BT pryniata narakać: pravincyjnaje, savieckaje i ŭvohule vielmi mała biełaruskaje.
Možna było čakać, što paśla pachaładańnia ŭ dačynieńniach Pucina i Łukašenki staŭleńnie da ŭschodniaha susieda musiła b stać bolš krytyčnym. Ale ž nie. Pa-raniejšamu ŭ centry ŭvahi hledačoŭ ATN rasiejskaje: vybary ŭ Rasiei, vizyty jaje kiraŭnikoŭ — i padajecca ŭsio heta mienavita z rasiejskaha hledzišča. Tak, kamentavać rasiejskija vybary na BT zaprašajuć A.Duhina, jaki advodzić Biełarusi rolu adnaje z centralnych pravincyj Rasiei. A toje, što Sylvijo Berluskoni padtrymaŭ dziejańni rasiejskaje ŭłady ŭ Čačenii i ŭ spravie Chadarkoŭskaha, padajecca jak značnaja pieramoha. Choć Eŭraźviaz tut ź italjanskim premjeram nie pahadziŭsia, i ŭvohule jon ličycca fihuraj skandalnaj. Vialikaja ŭvaha nadajecca tłumačeńniam karyści ŭsiamu śvietu ad rasiejska-kitajskaha chaŭrusu.
Nie zabyvajucca i pra savieckija atrybuty. U pieradačy «Vakoł planety» 8 listapada (adtul uziatyja, darečy, i dva papiarednija prykłady) viadučy doŭha razvažaje ab suśvietnym značeńni revalucyi, kali «naš narod akazvaŭ upłyŭ na ŭsiu suśvietnuju historyju» (znoŭ rasiejacentryzm). Pryvodzić prykład Francyi: tam, maŭlaŭ, šanujuć i svajho Napaleona, i svajho Rabespjera. Napaleon — hutarka asobnaja. A voś Rabespjer — postać, jakaja nia vielmi karystajecca prychilnaściu francuzaŭ.
Pryjemna ŭraziła pieradača «Adkryty archiŭ», pryśviečanaja t.zv. «Piśmu biełaruskaha narodu vialikamu Stalinu». Tut možna šmat pra što daviedacca. Pra toje, naprykład, jak marudna išoŭ zbor podpisaŭ i ŭładam daviałosia skaračać aficyjnuju kolkaść padpisantaŭ z troch da dvuch miljonaŭ. Jak źniavolenym uspaminalisia radki pra čornaje minułaje, kali «na abied była nam lebiada», i ludzi dzivilisia, jak mała ŭsio źmianiłasia z tych časoŭ. Litaraturaznaŭca Piatro Vasiučenka ličyć, što hety tvor pryznali b svaim postmadernisty. Mastak Jaŭhien Cichanovič bačyć tut nacyjanalnuju asablivaść biełarusaŭ pakazvać siabie i svaju krainu nie ekzotykaj, a tvorami mastactva. Jość i prosta humarystyčnyja vypadki, źviazanyja z zavučvańniem hetaha tvoru na pamiać.
U nastupnuju subotu budzie praciah pieradačy. Raju pahladzieć jaje.
Usiasłaŭ Šaternik
Kamientary