Daśje NRM

Lavon. Pit. Juraś. Alezis. Kultura «NRM». Dyskahrafija «NRM». Palityka «NRM».

Lavon

Spraŭlaje dzień narodzinaŭ 14 vieraśnia (Panna). Šyrokaj publicy viadomy jak Volski, ale, zhodna z pašpartnymi dadzienymi, jon Zejdel. Lavonavy prodki — mahiloŭskija niemcy-luteranie. Navat jaho dziadula byŭ nijaki nie Vital Volski, a Vitald Frydrych Karłavič Zejdel. Vo jak. Mo adsiul i niamieckija cytaty ŭ pieśniach? Lavon byŭ u vojsku. Słužyŭ u vajskova-pavietranych siłach u Słucku. Ale na samalocie lotać jamu nie dazvalali.

Maje stabilnuju siamju, haduje dačku Adelu (uviesnu joj budzie šeść hadoŭ). Žonka Hanna dapamahaje ŭ muzyčnych spravach — była pradusarkaj «Krambambuli». Siamja žyvie ŭ Frunzenskim rajonie ŭ internackaj dvuchpakajoŭcy. Lavon kaža, što «vuzka, ciesna, mała», ale zvažaje, što byvaje j horš. Jak kožny veteran VPS, maryć pra «zapasny aeradrom»: prastornuju chatu dzie-niebudź u vioscy, kab pobač — les, voziera. Jeździć Lavon na «Mazda-323».

Drennych zvyčak amal nia maje. Palić zredčas — na roznych zastollach, kali lahčej palić, čym nie palić. Apošni miesiac alkaholu nie spažyvaje naahuł, pačaŭ navat na trenažorach zajmacca. Horła lubić pramačyć dobraj francuskaj mineralnaj vadoj. Choć u marazy nia suprać vypić hlintvajnu dy harelicy hramaŭ sto pad čyrvonuju rybu (br-r, tolki nia piva ŭzimku!). Dobra hatuje, ale pra kankretnyja ŭpadabańni nie havoryć. Maŭlaŭ, pry najaŭnaści času moža zhatavać usio što zaŭhodna. Pavodle adukacyi mastak, ale maluje ciapier tolki «z nahody» — kali treba zrabić kamuści padarunak. Na žyćcio asabliva nie narakaje.

Pit

Naradziŭsia 7 listapada (Skarpijon). A zvać jaho nasamreč Piatrom. Asnoŭny zaniatak — hitara, akrom ihrańnia ŭ šerahu hurtoŭ daje pryvatnyja ŭroki. Spačatku vučyŭ biaspłatna, ale vučni prapuskali zaniatki. Jak pryznačyŭ płatu — dyk čerhi stajali. Žyćciovy pryncyp: być maksymalna ščyrym. Pavodle ŭłasnaha pryznańnia, zanadta burklivy, nievynosny ŭ pobycie dy jašče j vychvalaka. Pry hetym z žonkaj, mastačkaj Zojaj Łucevič, žyvie ŭžo dziesiać hadoŭ. Praŭda, šlub hramadzianski, bo nia choča Pit padnačalvacca «hramadzkim abradam». Synu Janu-Vincentu siem hadoŭ. Siamja zdymaje dvuchpakajoku na vuł.Zacharava. Jaduć u zali, bo ŭ kuchni — chatniaja muzyčnaja studyja. Zatoje majuć ažno dźvie mašyny — «Ford Sierra» i «Audi». Pravoŭ u Pita niama («lanota!»), tamu mašynaj kiruje žonka. Pit nia pje, nia palić, zajmajecca sportam (płavańniem, u pryvatnaści). Lubić miasa, pieradusim śvininu, zasmažanuju vialikimi kavałkami. Antyalkaholik («Fu! Jakaja brydota!»), amatar žuravinavaha napoju. Słužyŭ u pavietrana-desantnych vojskach.

Juraś

Vinšavać z narodzinami 23 červienia (Rak). Pracuje staršym technikam Instytutu prablemaŭ jadravaj fizyki BDU. Adziny z «eneremaŭcaŭ», chto nie słužyŭ u vojsku: «adkasiŭ» u svoj čas. Absalutna ščaślivy ŭ šlubie, z žonkaj Dzinaj razam piać hadoŭ, dačce Jani — taksama piać hadoŭ. Žyvuć u trochpakajoŭcy i taksama marać pra «domik u dziareŭni» na pavierchi dva. Jeździć Juraś na zvyčajnaj «siamiorcy». Upeŭniena trymaje ŭ rukoch i instrumenty niemuzyčnyja. Lubić zaniacca «chatnimi mužčynskimi spravami»: što-niebudź padpravić, zrabić meblu z nula, pakłaści parkiet, skrucić reaktar... Nikoli nia suprać spažyć draniki sa śmiatanaj. Z napojaŭ pieravahu addaje kavie, kali-nikali harelicy. Maje saramlivy charaktar, jak i bolšaść basistaŭ.

Alezis

Dzień naradžeńnia 7 lutaha. Uvohule Vadaliŭ, ale kaža, što niama jamu adpaviednaha znaku Zadyjaku. Žyvie zhodna z pryncypam: jak pastavišsia da inšych, tak i jany pastaviacca da ciabie. Uvieś čas zajmajuć bubny j siamja. Šmat siłaŭ idzie na hadavańnie dvuchhadovaje dački Paŭliny. Z žonkaj Inhaj žyvie try hady. Siamja tulicca ŭ ciesnaj «chruščoŭcy» z dakładna nie akreślenaj kolkaściu pakojaŭ. Jak i Lavon, Aleh skončyŭ mastackuju vučelniu. Paśla byli tankavyja vojski. Aleh z radaściu «pažyvicca» śvininaj i kuracinaj. Z mocnych napojaŭ moža dazvolić sabie chiba razbaŭlenaje vino, bo hadoŭ šeść tamu z alkaholem zaviazaŭ. «I biez anijakaha kadziravańnia, na ŭłasnaj sile voli», — chvalicca.

Kultura «NRM»

Zbolšaha «eneremaŭcy» baviacca lohkim čytvom. Alezis i Juraś lubiać francuskija detektyvy 50-ch (Pjer Bualo, Nael Kalef), Lavon adno tolki paśpiavaje prahladać hazety dy kali-nikali pakorpacca ŭ Internecie («spakojnaje isnavańnie treba mieć, kab čytać niešta surjoznaje»). Adzin Pit čytaje ažno dziesiać knih adrazu: na paličcy ŭ jaho lažać apošnija tvory Pialevina, Eka, Taciany Tałstoj dy tomik Karatkieviča.

Što da vizualnaha mastactva, dyk Alezis razam z svajoj Paŭlinkaj całkam zanurany ŭ «sajuzmultfilmaŭskija» tvory, Pit hladzić usio: i kino nie dla ŭsich, i rasiejskija «bajevičuchi». Juraś addaje pieravahu lohkamu kino — klasyčnym vesternam dy filmam farmatu telekanału «TV-1000». Lavon upadabaŭ «Pirataŭ Karybskaha mora» — nadta spadabałasia hetaja atmasfera, što viarnuła jaho ŭ dziciačyja hady. «My z taboj piraty biełaruskich rek», niekali śpiavała «Mroja». Ad «Nastaśsi Słuckaj» uražańni ŭ Lavona dvaistyja.

Cikava, što najlepšyja ajčynnyja muzyki nia nadta cikaviacca ŭłasna muzykaj. Apošniaje, što słuchaŭ Juraś, byŭ trybjut «Viza NRM». Lavon asablivych adkryćciaŭ za apošni čas nie zrabiŭ. Chiba što novy albom «ZZ TOP» i hurt «Queens of the Stone Age». Pit lubić pierasłuchoŭvać albomy «Red Hot Chili Peppers», Stynha, Brehaviča. Alezis pavažaje ciažkuju muzyku, kštałtu «System of Down» dy «Linkin Park».

Dyskahrafija «NRM»

Hrupa maje piać studyjnych albomaŭ dy adzin kancertny. Muzyki brali ŭdzieł va ŭsich supolnych prajektach (ad «Narodnaha albomu» da «Skrypki dryhvy») i trybjutach («Pieśniarok» i «Personal Depeche»). Pieršy albom hurtu zvaŭsia «Lalala» (pavodle zahałoŭnaj pieśni na vieršy Michała Aniempadystava). Tudy ŭvajšli pieśni, napisanyja jašče za časami «Mroi», ale hetkaja «hramadzianskaja liryka» nie pasavała novaj estetycy. «Odzirydzidzina», zapisanaja ŭśled za «Lalala», pryniesła hurtu sapraŭdy masavuju papularnaść: «Partyzanskaja», «My sami pa sabie», «Lepiej nia budzie» pryjšlisia vielmi darečy ŭ tyja «smutnyja» časy. Z «Odzirydzidzinaj» raźviłasia idealohija «NRM» jak virtualnaj dziaržavy: muzyki padzialili mižsobku «ministerskija» paŭnamoctvy. Dalejšymi albomami papularnaść «NRM» tolki zamacoŭvałasia — «Pašpart hramadzianina NRM» prynios adnu z samych admietnych ajčynnych rok-kampazycyjaŭ «Pavietrany šar». Zhadanyja albomy zapisvaŭ Słava Korań. Mienavita jon znajšoŭ toj firmovy «eneremaŭski» huk. Z «Tryma čarapachami» hurt abjechaŭ usiu Biełaruś. Vychadu albomu papiaredničaŭ synhł, ci, jak nazvali «eneremaŭcy», — «samotnik». Apošniaja pakul što praca hurtu — «Dom kultury». Albom byŭ vydadzieny pry kancy 2002 h., razyšoŭsia nakładam kala 6000 asobnikaŭ i praciahvaje pradavacca.

Palityka «NRM»

Niezaležnaja Respublika Mroja była zasnavanaja ŭ 1994 h. na asnovie supolnaj «Mroi» baćkoŭ-zasnavalnikaŭ. Va ŭrad respubliki ŭvajšli: Lavon Volski (hitara, vakał), Pit Paŭłaŭ (soła-hitara, bek-vakał), Juraś Laŭkoŭ (bas-hitara, bek-vakał) i Alezis Dziemidovič (bubny). Lavon źjaŭlajecca ministram pracy j adpačynku, Pit zajmajecca pytańniami prapahandy, Juraś asvojtaŭsia na pasadzie ministra pa baraćbie z karupcyjaj i chabarnictvam, Alezis — admysłoviec u sfery turyzmu. Adrazu ž pa prychodzie na svaje pasady kiraŭnictva «NRM» abvieściła, što formaj dziaržaŭnaha kiravańnia budzie vajaŭničaja demakratyja, dziaržaŭnyja symbali — Hierb i Ściah. U krainie panuje dźviuchmoŭje — biełaruskaja-kirylica i biełaruskaja-łacinka. Kožny, chto choča stacca hramadzianinam «NRM», musić zapoŭnić adpaviednuju zajavu (možna znajści jaje na sajcie hurtu www. nrm.by.com). Siarod asnoŭnych dakumentaŭ hetaha ŭtvareńnia — Pašpart hramadzianina «NRM» (hł. adnajmienny albom) i Viza «NRM» (hł. adnajmienny trybjut).

Siarhiej Budkin

• 0
• 0
• 0
• 0
• 0
• 0
• 0
• 0