Ekanamičnaja chronika

12.02.2004

Rost mabilnaj suviazi

Kolkaść abanentaŭ raście jak na draždžach. Za adzin studzień ich pabolšała na 3,8%. Rost u MTS skłaŭ 6,3%, u «Velcom» —1,5%.

Zvyškirmašy ŭ stalicy

Da kanca 2004 u stalicy źjaviacca dva pieršyja hipermarkiety, a ŭ 2005—2007 — jašče 11. Płošča kožnaha ŭ 3—5 razoŭ bolšaja za płošču CUMu. Pieršyja zvyškirmašy budujucca na rahu Rakasoŭskaha i Vaniejeva ŭ Sierabrancy (zamoŭca — zamiežnaje pradpryjemstva «BiełVilesden») i na skryžavańni Łabanka i Akademika Fiodarava ŭ Sucharavie (zamoŭca — SP «Handaloptyma»). Usiaho pad hipermarkiety harvykankam vyłučyŭ 13 placovak u roznych rajonach. Umovy dla zabudoŭnikaŭ takija: z asartymentu (10—40 tys. tavaraŭ) minimum pałovu musić składać pradukcyja biełaruskaj vytvorčaści. Tolki piatuju častku ahulnaj płoščy kramy ŭłaśnik maje prava zdavać u arendu. Narešcie, štomiesiac tre budzie adličvać nia mienš za 1% ad tavaraabarotu na raźvićcio haradzkoj infrastruktury.

Pabudova adnaho markietu kaštuje $4,5—6 młn. Crodki majuć akupicca za 7—10 hadoŭ. Pabudova hipermarkietaŭ ciažka adabjecca na drobnych kramach. Kožnaje pracoŭnaje miesca, stvoranaje ŭ hipermarkiecie, likviduje siem u tradycyjnym handli. Suśvietna viadomyja sietki markietaŭ («Aushan», «Lidl», «Mietro», «Real», «Wal-Mart») u Biełaruś pakul nie iduć.

«Haryzont» pracuje na Rasieju

«Haryzont» vypuściŭ letaś 400 tys. televizaraŭ, ale chacieŭ by padvoić hetuju ličbu ŭ 2004 h. Pry hetym u Rasieju ekspartujecca kala 60% pradukcyi.

Ź pieravykanańniem

Letaś kansalidavany biudžet vykanany na 107,1%. Zamiežnaja zapazyčanaść krainy źniziłasia z $813 da 736 młn. Unutranaja zapazyčanaść składaje 6% ad VUP. (Heta źviestki Minfinu.)

Rost MAZu

Prodažy MAZu vyraśli letaś na 8,9% — da $321,8 młn. Zavod vyrabiŭ 15 431 hruzavik (+9,2% proci 2002), 481 aŭtobus (+3,7%), 4 tys. 109 pryčepaŭ (+15,9%).

Jość miljon jajek!

Za 2003 h. biełaruskija pierapiołački vysiedzieli kala miljona jaječak. Heta ŭ paŭtary tysiačy razoŭ mienš, čym u kurej. Dy ŭsio ž uražvaje. Da taho ž, pierapialinyja jajki dyjetyčnyja i hipaalerhiennyja.

Dalar—eŭra: niajasnaść

ZŠA i ich chaŭruśniki z hrupy G7 «dasiahnuli kampramisu ŭ spravie padzieńnia dalara». Sutnaść rašeńnia zastajecca nastolki ž tumannaju, jak i jaho farmuloŭka. Bolšaść analitykaŭ nia bačać pakul u najbolšych finansavych hulcoŭ śvietu hatoŭnaści mianiać tendencyi na rynku.

U Kazachstanie radaść

Chutkaje ŭviadzieńnie ŭ dziejańnie naftapravodu Adesa—Brody natchniaje Astanu. Kazachstanu dla narmalnaha ekspartu svaich hihanckich (44 młrd barelaŭ) zapasaŭ patrebnyja jašče dźvie truby pamieru isnaj, da Novarasijsku. Pabudova čarhovaje (Baku—Džejchan, turecki terminał na Mižziemnamorji) skončycca ŭ nastupnym hodzie. 1760-kilametrovy šlach stanie pieršym, pa jakim nafta paciače biez kantrolu Rasiei. Na siońnia z 16 hałoŭnych naftazdabyŭnych prajektaŭ u Kazachstanie rasiejskija kampanii ŭdzielničajuć tolki ŭ troch, i toje ŭ jakaści mienšasnych akcyjaneraŭ. Tamu Rasieja sprabuje ŭsialak zatarmazić jak prajekt Adesa—Brody, tak i Baku—Džejchan. Paradaksalna, što jana znachodzić sabie ŭ hetym sajuźnikaŭ — arabskija krainy.

Rasieja pavialičvaje zdabyču

Na dumku staršyni rady dyrektaraŭ «Jukasu», Rasieja ŭ 2009 h. moža vyjści na pieršaje miesca ŭ śviecie pa zdabyčy nafty, abyšoŭšy Saudaŭskuju Arabiju. U 2003 h. vytvorčaść nafty ŭ Rasiei vyrasła na 11%. U 2004 h. jana čakajecca na ŭzroŭni 9 młn barelaŭ u dzień.

MB; RBK, AFN, «Źviazda», «Častnaja sobstviennosť»

• 0
• 0
• 0
• 0
• 0
• 0
• 0
• 0