Mininfarmacyi 8 listapada vyniesła papiaredžańnie TDA «Pres-servis» — zasnavalniku hazety «Kuŕjer iz Borisova» za parušeńnie Zakonu ab druku. U Słucku 10 listapada zvolnili z pracy staršyniu filii BSDP (NH) Anatola Bałakira, jaki balatavaŭsia ŭ pałatu pradstaŭnikoŭ. Heta adbyłosia… na nastupny dzień paśla taho, jak jon uładkavaŭsia na pracu. Valer Ščukin 11 listapada atrymaŭ papiaredžańnie ad administracyjnaj kamisii Pieršamajskaha rajonu Viciebsku za raspaŭsiud ulotak. 11 listapada zvolnieny z pracy navukovy supracoŭnik Barysaŭskaha krajaznaŭčaha muzeju Valer Rachovič, jaki nadrukavaŭ u hazecie «Homan Barysaŭščyny» seryju artykułaŭ pra miascovaje padpolle ŭ čas fašysckaj akupacyi. 12 listapada Vyšejšy haspadarčy sud admianiŭ zahad Mininfarmacyi pra prypynieńnie na 3 miesiacy vychadu hazety «Vriemia» . Kiraŭnika hramadzkaha abjadnańnia pradprymalnikaŭ «Perspektyva» Anatola Šumčanku 11 listapada vyklikali ŭ Mienski haradździeł milicyi dla tłumačeńniaŭ, navošta jon nabyvaŭ šmattysiačny nakład knihi «Vypadkovy prezydent». 11 listapada kasacyjnaja kalehija Mienskaha harsudu admoviła ŭ zadavalnieńni pazovu Michaiłu Ziemlakovu: jon patrabavaŭ, kab KDB viarnuła kanfiskavanyja ŭ jahonaha syna ŭ 2001 h. rečy. Administracyjnaja kamisija Maskoŭskaha rajonu Miensku 11 listapada aštrafavała na 5 bazavych vieličyń Hary Pahaniajłu za raspaŭsiudžvańnie dakładu Ch.Purhurydesa ab źnikłych palitykach Biełarusi i mahčymaj datyčnaści šerahu vysokich dziaržaŭnych asobaŭ Biełarusi da ciažkich złačynstvaŭ. U Baranavičach sudovyja vykanaŭcy 11 listapada apisali videamahnitafon i televizar u baćkoŭ aktyvistki «Zubra» Maryi Hambieckaj, aštrafavanaj na 30 b.v., 15-ha jana vypłaciła štraf. Haspadarčy sud Bieraściejskaj vobłaści 11 listapada zadavoliŭ pazoŭ «Paleśsieelektramašu» da hazety «Briestskij kuŕjer» : kiraŭnictva pradpryjemstva paličyła niepraŭdzivym artykuł i, nie zadavoliŭšysia nadrukavanymi piarečańniami dyrektara, padało pazoŭ pra abaronu dziełavoj reputacyi. Viarchoŭny sud 12 listapada pryznaŭ abhruntavanym rašeńnie Miniustu ab nierehistracyi Partyi svabody j prahresu. 12 listapada ź Michaiła Maryniča pavodle amnistyi źniali abvinavačańnie pa č.1 i č.2 art.377 KK (vykradańnie ci paškodžańnie dakumentaŭ, štampaŭ, piačatak). U Žłobinie 12 listapada štrafam 5 b.v. sud pakaraŭ aktyvista AHP Piatra Mirašničenku za nabrany na kamputary artykuł. Unačy z 13 na 14 listapada nieviadomyja sprabavali ŭvarvacca ŭ kvateru Alesia Abramoviča, pravaabaroncy z Barysava. U Vaŭkavysku haładoŭnica Valancina Sałdatava, chvoraja na cukrovy dyjabet, 15 listapada była špitalizavanaja. Na troje sutak aryštu asudžany 15 listapada ŭ Horkach aktyvist BSDH Dziamjan Frankoŭski za raspaŭsiudžvańnie ŭlotak.
AŠ
Kamientary