«17 kastryčnika — heta 11 vieraśnia»

Mikoła Busieł u №45 uźniaŭ važnuju temu: što rabić dalej nacyjanalnamu ruchu.

Sp.Mikoła na pieršy plan stavić adukacyju hramadztva i źjadnańnie biznesu i palityki. Jak u nas kažuć, najlepšy biznes — heta palityka, ale chaj sp.Busieł pasprabuje prajści sa skryniaj pa kirmašy, tłumačačy źmierzłym handlaram, što achviaravanyja hrošy pojduć na vydańnie hazety. Kali atrymaje niešta ad 5% drobnych biznesoŭcaŭ, heta budzie fajna. Naš drobny biznes — heta nie eŭrapiejskaja siaredniaja klasa, a tyja ž sialanskija dzieci, što vyrvalisia ŭ horad. Siaredniaj klasaj, daść boh, stanuć ich dzieci (darečy, va Ŭkrainie tak i adbyvajecca — bolšaść moładzi zarablaje hrošy na eŭrapiejskich šabaškach, a dachaty viartajecca, kab raspačać ułasnuju spravu). Našy ž pryvatniki hurtujucca, tolki kali ich prycisnuć. Tady ŭspaminajuć i pra svabodnyja prafsajuzy. Daviałosia nazirać, jak admachvalisia handlary sadavinoju ad prapanoŭ dałučycca da strajku, kali vyhaniali z kirmašu handlaroŭ skuraj i aparaturaj. Ich heta nia tyčycca… a tutaka addać hrošy na niejkuju hazetu?

Dyj za apošnija 10 hod takich «Hramadzkich perspektyŭ» i «Sa ściaham času» farmatu A4 vydavałasia stolki… Na žal, čytali ich tolki sami aŭtary.

Narod ža hladzić televizar i čytaje tolki raskład pieradač. I kuplajuć pensijanerki subotniuju «SB», bo tannaja, «prahrama jo i papiery šmat». Tamu brašura, napisanaja «historykam-patryjotam na klučavyja temy», šmat karyści nie pryniasie. Chiba što komiksy hladzielisia b…

Cikavaja dumka pra patrebu palityčnaje adukacyi mastackimi srodkami. Ale zakazy na vieršy i karykatury — zdajecca, było ŭžo ŭsio heta za savietami… Ujaŭlaju: siadzić sp.Labiedźka i faksuje ŭ Sajuz piśmieńnikaŭ z patrabavańniem dać spravazdaču ab vykanańni partyjnych zamoŭ. Čamu zamiest feljetonu vyjšaŭ vierš, a mastak małocić abstrakcyjanizmy…

Zhodny, treba mieć plan. Doŭhaterminovy, ad vybaraŭ da vybaraŭ. Treba praličvać i pradbačyć kroki čynoŭnikaŭ. Toje ž pytańnie ź jurydyčnymi adrasami paŭstała daŭno, ale, niahledziačy na lamant z rehijonaŭ, u Miensku na toje nie zvažali. Nichto nie sabraŭ hrošaj, kab prydbać chatki dla supołak i rehistravać na ich juradrasy. A na padvorku možna było b i śviaty adznačać, i ściahi vyviešvać…

Dziakuj sp.Busłu. Takija dysputy vyjaŭlajuć słabyja baki idej i pradukujuć novyja. Dy ci čytajuć ich našy demakratyčnyja lidery? Ich u rehijonach ani vokam nie vidać, ani słycham nie čuvać… Vidać, adpačyvajuć na mižvybarnych vakacyjach.

Rusłan Raviaka, Baranavičy

• 0
• 0
• 0
• 0
• 0
• 0
• 0
• 0