Zavadzki: novaja sprava

Prakuratura Respubliki Biełarusi adnaviła raśśledavańnie pa spravie źnikłaha aperatara ORT Źmitra Zavadzkaha. Maci žurnalista Volha Zavadzkaja atrymała dakument, dzie zaznačajecca, što raśśledavańnie adnoŭlena 4 krasavika ŭ suviazi ź nieabchodnaściu «praviadzieńnia śledčych dziejańniaŭ» pa hetaj spravie. Spadarynia Volha nia vieryć u toje, što źjaviłasia novaja infarmacyja ŭ losie syna. Sprava, chutčej za ŭsio, adnoŭlena «dla ptušački», kaža jana. Žonka źnikłaha žurnalista Śviatłana ŭ svaju čarhu ličyć, što adnaŭleńnie raśśledavańnia źviazana z rezalucyjaj pa Biełarusi, jakaja budzie razhladacca najbližejšym časam na sesii kamisii AAN pa pravach čałavieka.

«Spadar Brančel, jaki ŭznačalvaje śledčuju hrupu, skazaŭ mnie: «Śnieh syšoŭ, my pašukajem». Taksama jon paviedamiŭ, što budzie pryznačany novy śledčy, jaki pahladzić na spravu «śviežym vokam». Sprava raspačataja dla taho, kab stałaja biełaruskaja misija ŭ AAN u Ženevie mahła b choć jak-niebudź davieści, što raśśledavańnie viadziecca. Takaja ž samaja sytuacyja była ŭ studzieni 2003 h., kali pavinna było pravodzicca papiaredniaje słuchańnie pa dakładzie Purhurydesa. Jany dumali, što, raspačaŭšy spravu, zmusiać jaho źmiakčyć svoj dakład».

U samoj prakuratury ad kamentaroŭ admaŭlajucca.

Žurnalist źnik 7 lipienia 2000 h. U hety dzień jon musiŭ sustreć u Nacyjanalnym aeraporcie «Miensk» svajho kalehu Paŭła Šaramieta. Adnak na aŭtastajancy byŭ znojdzieny tolki aŭtamabil Źmitra.

14 sakavika 2002 h. sud pryznaŭ byłych specnazaŭcaŭ Valera Ihnatoviča i Maksima Malika vinavatymi ŭ vykradańni žurnalista, prysudziŭšy ich da vialikich terminaŭ źniavoleńnia. Pavodle aficyjnaj versii pryčynaj vykradańnia była pomsta: žurnalist ahučyŭ infarmacyju, zhodna ź jakoj Ihnatovič vajavaŭ u Čačenii na baku paŭstancaŭ. Supracoŭniki ORT zanialisia niezaležnym raśśledavańniem, a 1 śniežnia 2003 h. Źmicier Zavadzki sudom Frunzenskaha rajonu Miensku byŭ pryznany pamierłym.

20 lipienia 2004 hodu Alaksandar Łukašenka padčas pres-kanferencyi zajaviŭ, što ŭ spravie Zavadzkaha jość niekatoryja dakumenty, jakija, kali ich abnarodavać, pieratvorać «spravu» ŭ «antyspravu». 4 žniŭnia maci žurnalista nakiravała ŭ prakuraturu zajavu z patrabavańniem adnavić spravu «pa znoŭ adkrytych abstavinach» i dapytać A.Łukašenku ŭ jakaści śviedki.

Pavał Šaramiet u interviju «Haziecie.ru» miarkuje, što spravu Zavadzkaha mahli znoŭ adčynić i dla taho, kab paviesić usie palityčnyja zabojstvy na bandu kryminalnikaŭ, jakuju sioleta złavili ŭ Homieli. «Moža być, — kaža žonka źnikłaha teleaperatara. — Ja nie vyklučaju lubyja varyjanty hetaha farsu. Ja vyklučaju tolki toje, što chtości realna choča niekaha znajści».

• 0
• 0
• 0
• 0
• 0
• 0
• 0
• 0