Хамутоўскі вяртаецца ў «Сьцяўа»
Галкіпэр нацыянальнай футбольнай зборнай Беларусі Васіль Хамутоўскі вярнуўся ў Бухарэст, дзе распачаў трэніроўкі ў складзе «Сьцяўа». Незадоўга да заканчэньня мінулага чэмпіянату беларускі легіянэр пакінуў клюб праз канфлікт з тагачасным галоўным трэнэрам Вальтэрам Дзэнгам, дарэчы, у «мінулым» жыцьці галкіпэрам зборнай Італіі. Паслугамі Хамутоўскага адразу зацікавілася кіеўскае «Дынама», але ўкраінцаў не задаволіла цана, якую запытала «Сьцяўа», — $1 000 000. Тым часам у бухарэсцкага клюбу зьмяніўся трэнэр, клюб узначаліў экс-гулец днепрапятроўскага «Дняпра» і былы трэнэр грэцкага «Алімпіякосу» Алег Пратасаў. Прагледзеўшы некалькі касэт з гульнёй Хамутоўскага, ён папрасіў вярнуць Васіля ў Бухарэст, назваўшы крок Дзэнгі памылковым.
Пра коней на пераправе
1 ліпеня ў менскім «Дынама» другі раз за паўтара месяца зьмяніўся галоўны трэнэр. Аляксандар Башмакоў, які займаў гэтую пасаду толькі паўтара месяца, адпраўлены ў адстаўку — старшыня праўленьня клюбу бізнэсовец Юры Чыж аказаўся незадаволеным вынікамі, паказанымі клюбам. Цяпер трэніраваць «Дынама» будзе ўкраінскі спэцыяліст Аляксандар Рабаконь, які ў мінулым сэзоне няўдала трэніраваў барыспальскі «Барысфен» і кіеўскую «Абалонь» — каманды пакінулі элітны дывізіён. Між іншым, Рабаконь выступаў як футбаліст у чэмпіянаце Беларусі: у 1994/1995 г. ён гуляў за магілёўскае «Тарпэда». Дапамагаць Рабаконю на трэнэрскім мастку будзе вядомы ў мінулым футбаліст Юры Максімаў.
На наступным тыдні «Дынама» возьме старт у Лізе чэмпіёнаў. У першым кваліфікацыйным раўндзе менчукі згуляюць з кіпрскім «Анартосісам». Першы матч 12 ліпеня на сталічным стадыёне «Дынама».
Беларускі бэйсбол
3 ліпеня ў Берасьці адкрыўся першы ў Беларусі бэйсбольны стадыён. Арэна разьмясьцілася побач зь Лядовым палацам і Лёгкаатлетычным манэжам. Спартовае збудаваньне цалкам адпавядае ўсім міжнародным стандартам і ўжо атрымала прапанову ад старшыні тэхнічнай камісіі Эўрапейскай бэйсбольнай канфэдэрацыі на правядзеньне ў Берасьці гульняў Кубку эўрапейскіх чэмпіёнаў.
На стадыёне ўжо адбыліся фінальныя гульні турніру па бэйсболе, што праходзіў 1—3 ліпеня. Першае месца заняла каманда ЦСКА-УУС (Расея), другое месца — у «Берасьцейскіх зуброў», трэцяе — у «Вільні» (Літва).
Нашы на Ўімбэлдане
Някепска выступілі беларускія тэнісісты на Адкрытым чэмпіянаце Англіі па тэнісе. Вікторыя Азаранка разам з вугоркай Агнэш Шаваі выйграла тэнісны турнір сярод юніёрак у парным разрадзе. Летась Вікторыя перамагала на Ўімбэлдане разам з Вольгай Гаварцовай, а сёлета разам з А.Шаваі перамагла на «Ралян Гарос», разам з Марынай Еракавіч (Новая Зэляндыя) — на «Аўстраліян Оўпэн», дзе выйграла турнір у індывідуальным разрадзе.
Максім Мірны дайшоў да паўфіналу парнага разраду і 1/8 фіналу індывідуальнага разраду, што дало яму магчымасьць павысіць свае пазыцыі ў рэйтынгах Асацыяцыі тэнісістаў-прафэсіяналаў. У «Чэмпіёнскай гонцы-2005» Мірны ўзьняўся з 29-га на 24-е месца. У рэйтынгу парных гульцоў беларус перамясьціўся з чацьвёртай на другую пазыцыю.
АГ, belapan.com, football.by
Каментары