Банкір Кацарэнка ацэнены ў $150 млн

Расследаванне, заканчэнне якога перад Новым годам анансаваў Следчы камітэт, ахоплівае перыяд дзейнасці банкіра з 2006 года па верасень 2011. У следства ёсць дадзеныя, што незаконнай дзейнасцю Уладзіслаў Кацарэнка займаўся і ў больш раннія перыяды, але яны ў матэрыялы справы не ўвайшлі. Праўда, не выключана, што больш ранняя дзейнасць банкіра стане аб’ектам расследавання ў рамках новай крымінальнай справы. Але да гэтага не толькі вельмі далёка ісці, але і вельмі складана, улічваючы даўнасць падзей.

Прычыны і вынікі

Сам факт, што Кацарэнку не толькі арыштавалі, але і давялі справу да суда, кажа пра многае. Пра тое, што Кацарэнка займаецца абнаяўленнем і трымае самую вялікую ў краіне падпольную біржу па абмене валюты, дзе самыя нязначныя аперацыі пачыналіся з лічбы з трыма нулямі, ведалі практычна ўсе, калі браць у разлік буйны і сярэдні бізнэс і чыноўнікаў такога ж узроўню. Ведалі гэта ў фінансавай міліцыі, і ў МУС, і ў КДБ і ў пракуратуры. Але Кацарэнку чамусьці не чапалі, вельмі доўга не чапалі. Нават у пачатку 2000-х, калі ў краіне пачалася масавая чыстка банкаўскага сектара, Кацарэнка зноў застаўся ўбаку. Можа, збіралі аператыўны матэрыял, а можа…

Казалі нават, што ён вельмі шмат каму патрэбны, і менавіта таму яго не чапаюць.

За пяць з паловай гадоў, якія ахопліваюць матэрыялы справы Кацарэнкі, праз яго кампаніі прайшлі тысячы фінансавых аперацый. Калі адсачыць карані кожнай з іх, можна даведацца шмат цікавага.

Але Следчы камітэт ужо заявіў, што паслугамі фінкампаній Кацарэнкі карысталіся выключна прыватныя фірмы, каб ухіляцца ад падаткаў.

Сутнасць «справы Кацарэнкі»

Сам Уладзіслаў Кацарэнка да гэтага часу не прызнае сваёй віны ні па адным з пунктаў абвінавачання і спадзяецца, што падчас судовых слуханняў яму ўдасца даказаць сваю невінаватасць.

Самі матэрыялы справы даволі шырокія і ў іх даволі складана разабрацца, улічваючы, што асноўную іх частку складаюць фінансавыя дакументы. Але ёсць некалькі сланоў, на якіх трымаецца ўсё абвінавачанне. Гэта тыя самыя фінкампаніі, праз якія праходзілі ўсе аперацыі.

Іх аснову складаюць зарэгістраваныя ў Расіі ТАА «TORGSIN», ТАА «PROMTECHSNAB», ТАА «BAZEL», ТАА «VECTOR», а таксама HENSDEAL TECHOLOGY LIMITED (зарэгістраванае ў Злучаным Каралеўстве Вялікабрытаніі і Паўночнай Ірландыі).

Следства ўпэўненае, што ўсе гэтыя кампаніі кантраляваў Кацарэнка, а таксама нейкія Закалодны, Мацвеенка і Быкаў, што праходзяць з ім па справе. Усім ім выстаўленае абвінавачанне ў здзяйсненні злачынства па ч.3 арт.233 Крымінальнага кодэкса Беларусі (незаконная прадпрымальніцкая дзейнасць, якая ажыццяўлялася арганізаванай групай), а таксама арт.243 (ухіленне ад выплаты падаткаў, збораў), у рознай інтэрпрэтацыі.

Гэта асноўнае абвінавачанне, якое і трэба адбіць Кацарэнку, але акрамя іх ёсць яшчэ крадзеж шляхам злоўжывання службовым становішчам, махлярства і падробка, выраб, выкарыстанне альбо збыт падробленых дакументаў, штампаў, пячатак, бланкаў. Нібыта Кацарэнка падрабіў выпіскі з пратаколаў назіральнай рады. Але гэта так, у нагрузку да асноўнага абвінавачання.

Працяг будзе

Па сваёй сутнасці ўвесь разгляд «справы Кацарэнкі» выльецца ў аналіз фінансавых дакументаў і шматлікіх паказанняў сведкаў, якія даказваюць, што руху тавару, які праходзіў па дакументах пералічаных вышэй фірмаў, насамрэч не было, а было толькі правядзенне і наступнае абнаяўліванне буйных сум грошай.

Куды яны потым паступалі — вось галоўная інтрыга разгляду. Бо гаворка ідзе пра фінансавы абарот у памеры больш за 150 млн даляраў.

Але чым бы ні скончылася судовае разбіральніцтва, якое мае пачацца ўжо ў студзені-лютым, яно наўрад ці будзе апошнім.

Рэч у тым, што частка абвінавачаных, якія праходзяць па справе, цяпер у вышуку. Рана ці позна іх знойдуць і выдадуць беларускаму боку, калі, вядома, яны не звернуцца да стандартнага ходу і не папросяць палітычнага прытулку.

• 0
• 0
• 0
• 0
• 0
• 0
• 0
• 0