У закрытых рэжымах аналітыкі звяртаюць увагу на дробныя дэталі, каб адгадаць, хто які ўплыў мае і якія тэндэнцыі дамінуюць. Напрыклад, рассадка: хто каля каго і за кім сядзіць? Блогер d-zholik, які адсочвае трэнды ў сілавых ведамствах, звярнуў увагу, што на нарадзе ў Лукашэнкі па энергетыцы начальнік Аператыўна-аналітычнага цэнтра (ААЦ) палкоўнік Сяргей Шпягун сядзеў бліжэй да Аляксандра Лукашэнкі, чым генерал Валер Вакульчык, старшыня Камітэта дзяржаўнай бяспекі. «Хоць, здавалася б, генерал-маёр Валерый Вакульчык вышэйшы па званні, а Сяргей Шпягун толькі палкоўнік». Дый пры рассаджванні ў адпаведнасці з алфавітным парадкам па прозвішчы або найменні ведамстваў Вакульчык аналагічна павінен быў бы сядзець першым, а Шпягун пасля яго (у лукашэнкаўцаў канцылярыя вядзецца па-расейску, а не па-беларуску).
Блогер робіць выснову пра вялікі ўплыў і давер асабіста да Шпегуна і да ААЦ у цэлым. Гэты цэнтр быў створаны за часоў кіравання Лукашэнкі, які спрабаваў стварыць сістэму, пры якой розныя спецслужбы ўраўнаважвалі б і кантралявалі адна другую. ААЦ месціцца побач з прэзідэнтурай, у будынках былой Нацыянальнай бібліятэкі на вуліцы Кірава.
Каментары